‘निजीलाई कोरोना परीक्षणको अनुमति अव्यावहारिक’

टीपी भुसाल

काठमाडौं । सरकारले निजी प्रयोगशालाहरूलाई पनि कोरोना भाइरस (कोभिड–१९) को परीक्षण गर्न दिने भनी गरेको निर्णय अव्यावहारिक भएको निजीक्षेत्रको भनाइ छ । सरकारले जम्मा गरेकै स्वाब निजी प्रयोगशालामा जाँच्न दिनु गलत भएको जनस्वास्थ्यविद्ले बताएका छन् ।

सरकारी प्रयोगशालाहरूले परीक्षण धान्न नसकेपछि सरकारले निजी प्रयोगशालाहरूलाई समेत परीक्षण गर्ने अनुमति दिने निर्णय गरेको हो । संकलित नमूनाहरू प्रक्रिया पूरा गरी निजी प्रयोगशालाहरूलाई पनि जाँच्न दिइने निर्णय भएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिए ।

आइतवारको नियमित प्रेस ब्रिफिङमा प्रवक्ता डा.गौतमले पीसीआर टेस्टका लागि संकलन भएका नमूना आवश्यक प्रक्रिया पूरा गरी निजी प्रयोगशालालाई पनि परीक्षण गर्न दिने निर्णय भएको बताए । त्यसरी परीक्षण गर्दा लाग्ने खर्च सरकारले नै बेहोर्ने डा. गौतमले बताए । मन्त्रालयले परीक्षणका लागि ५ हजार ५ सय रुपैयाँ शुल्क निर्धारण गरेको छ ।
सरकारको निर्णयअनुसार सरकारले संकलन गरेका स्वाबका नमूना मात्र निजी प्रयोगशालाले परीक्षण गर्न पाउनेछन् । राष्ट्रिय जनस्वास्थ्य प्रयोगशालामा नौओटा निजी प्रयोगशालाले परीक्षणका लागि आवदेन दिए पनि सरकारले हालसम्म कुनै पनि निजी प्रयोगशालालाई परीक्षण अनुमति भने दिएको छैन ।

सरकारले निजी प्रयोगशालालाई पनि कोरोना परीक्षणको अनुमति दिने निर्णय गरे पनि यो निर्णय अव्यावहारिक र अपरिपक्व भएको निजी प्रयोगशालाका सञ्चालकसमेत रहेका जनस्वास्थ्यविज्ञ डा.समीरमणि दीक्षितले बताए । सरकारले निजी प्रयोगशाला सञ्चालकहरूले निवेदन दिएको ३ महीनासम्म पनि ठोस निर्णय गर्न नसकेको र अहिले भनिएका प्रावधानले कोरोना प्ररिक्षण गर्न गाह्रो हुने बताए । ‘सरकारले अहिलेसम्म कति प्रयोगशालालाई अनुमति दिने भन्ने निर्णय गर्न सकेको छैन । अर्को सरकारी प्रयोगशालाले संकलन गरेको नमूनामात्र निजीलाई परीक्षणका लागि दिने भनेपछि मापदण्ड पूरा भए पनि निजी प्रयोगशालामा सबैले स्वेच्छाले परीक्षण गर्छु भन्दा नपाउने भयो । त्यसैले यो निर्णय अपरिपक्व छ,’ उनले भने ।

डा. दीक्षितका अनुसार निश्चित रकम लिएर निजी प्रयोगशालालाई परीक्षण गर्न दिनुपर्छ । जसले रकम तिरेर गर्न सक्छ ऊ आपैm गर्छ । नसक्नेलाई सरकारले निःशुल्क नै गर्छ । यसो गर्दा परीक्षणको दायरा पनि बढ्ने उनको धारणा छ । अहिले नै परीक्षण गर्न हजारौं नमूना बाँकी रहेकाले निजीक्षेत्रलाई नमूना दिँदा पनि सरकारी निकायले कसरी दिने भन्ने नै अन्योल देखिएको उनले बताए ।

नेपालमा आइतवारसम्म कुल संक्रमितको संख्या ५ हजार ७६० पुगेको छ । स्वास्थ्य तथा जनसंख्या मन्त्रालयका अनुसार विभिन्न जिल्लामा गरी आइतवारमात्रै ४२५ जना कोरोना संक्रमित थपिएका छन् । यसैगरी आइतवारसम्म कोरोना संक्रमणका कारण १९ जनाको मृत्यु भएकोे छ । मन्त्रालयका प्रवक्ता डा. गौतमका अनुसार हालसम्म ९७४ जना डिस्चार्ज भएर घर फर्किएका छन् ।

प्रतिक्रिया [0]