पर्यटनमन्त्रीको चेतावनी : राम्रो कार्य सम्पादन नगर्ने कर्मचारीलाई हटाउँछु

चालू आवका वाँकी काम १५ दिन भित्र गर्न निर्देशन

टीपी भुसाल

असार १४, काठमाडौं । संस्कृति, पर्यटन तथा नागरिक उडड्यन मन्त्री योगेश भट्टराईले राम्रो कार्य सम्पादन नगर्ने कर्मचारीलाई हटाइने बताएका छन् ।
 

मन्त्रालयमा आयोजित मन्त्रालय अन्र्तगतको एसएमटी (सिनियर मेनेजमेण्ट टीम) को बैठकमा बोल्दै मन्त्री भट्टराईले आगामी आर्थिक वर्षको शुरुवातवाटै मन्त्रालय काममा ‘प्रोएक्टिभ’ भएर लाग्ने बताए । 

हरेक १ वर्षमा कक्षा चढेजस्तै आफूहरुको पनि एउटा कक्षा चढ्ने बेला आएको उल्लखे गर्दै मन्त्री भट्टराईले चालू वर्षमा सम्पन्न हुन वाँकी काम पनि १५ दिन भित्र गर्न निर्देशन दिए । उनले अब प्रत्येक हप्ता प्रत्येक महाशाखाहरुको कामको रिर्पोटिङ गरिने पनि बताए ।

‘अहिल्यै मैले पूर्व सूचना गरेको छु, साउनवाट हामी काममा ‘प्रोएक्टिभ’ भएर लाग्छौं,राम्रो काम नगर्ने कर्मचारीलाई हटाइन्छ, त्यो बेला मन्त्रीले बलपूर्वक हटायो नभन्नु होला,’ उनले भने । 
आफूले प्रधामन्त्रीसँग, सचिवले आफूसँग कार्यसम्पादन सम्झौता गर्ने गरेको जानकारी दिंदै मन्त्री भट्टराईले अब कर्मचारीहरुले सचिवसँग कार्य सम्पादनको सम्झौता गर्नुपर्ने र उक्त सम्झौताअनुसार काम भए÷नभएको हरेर कसैमाथि पूर्वाग्रह नराखी पुरस्कृत र कार्वाही जे गर्नुपर्ने हो त्यो गरिने बताए । 

मन्त्री भट्टराईले कोभिड–१९ पछि सबै विमानस्थलहरु संचालन गर्ने गरि प्रोटोकलको पूर्वतयारी गर्न, होटल तथा रेष्टुरेण्ट व्यवसाय संचालनका लागि जारी भएको प्रोटोकलको कार्यन्वयन र अनुगमन गर्न पनि सम्बन्धित महाशाखा÷निकाय प्रमुखलाई निर्देशन दिए ।

मन्त्रालयले यस अघि हवाई उडानको लागि र अघिग्लो साता होटल तथा रष्टुरेण्ट,पर्यटनसँग सम्बन्धित कार्यालय  तथा पर्यटकीय गतिविधि सञ्चालनका लागि कार्यविधि जारी गरेको थियो । मन्त्रालयका सचिव केदार बहादुर अधिकारीका अनुसार अब पर्यटन क्षेत्रसँग सम्बन्धित अन्य क्षेत्रको लागि पनि कार्यविधि बनाउँदै लगिने छ ।

प्रतिक्रिया [0]