पर्यटन मन्त्रालयद्वारा विभिन्न विधातर्फका पुरस्कार सार्वजनिक

 विज्ञान विधातर्फको पुरस्कार राष्ट्रिय आविष्कार केन्द्रलाई

टीपी भुसाल

असार १५, काठमाडौं ।  संस्कृति, पर्यटन तथा नागरिक उड्डयन मन्त्रालयले विसं २०७६ सालको लागि प्रदान गर्ने विभिन्न पुस्कार पाउने व्यक्ति तथा संस्थाको नाम सार्वजनिक गरेको छ ।

मन्त्रिपरिषद्को निणर्य अनुसार मन्त्रालयले सोमवार पुरस्कार पाउने व्यक्ति तथा संस्थाको नाम सार्वजनिक गरेको हो । मन्त्रालयले ०७६ सालको साहित्य, संस्कृति र विज्ञान विधातर्फको पुष्पलाल राष्ट्रिय पुरस्कार राष्ट्रिय आविष्कार केन्द्रलाई दिने निर्णय गरेको छ । उक्त आविष्कार केन्दका संस्थापक महाविर पुन हुन् । 

त्यस्तै, संस्कृति विधातर्फको राष्ट्रिय प्रतिभा पुरस्कार बुद्धिनारायण श्रेष्ठ र भाषा साहित्य विधातर्फ महाकवि लक्ष्मीप्रसाद देवकोटा पुरस्कार भैरव रिसाललाई दिने निर्णय गरेको छ ।

श्रेष्ठ सिमाविद् हुन् भने रिसाल सिमाको खोज अध्ययनकर्र्ता मात्र नभएर भाषा, साहित्य र पत्रकारिता क्षेत्रमा पनि उक्तिकै शसक्त व्यक्तित्व हुन् । नाटक विधातर्फ गोपालप्रसाद रिमाल राष्ट्रिय पुरस्कार वरिष्ठ साहित्यकार अभि सुवेदीलाई दिने निर्णय भएको छ । 

ती सबै पुरस्कारको राशी जनही रू.१ लाख रहेको छ । यस्तै समाज सुधार अभियान विधातर्फ २०७६ सालको भगत सर्वजित मानव मर्यादा राष्ट्रिय पुरस्कार जाजरकोटका नवराज विकलाई मराणोपरान्त दिने निर्णय भएको छ ।

 गत जेठ १० मा प्रेमिका लिन साथीहरुसहित पश्चिम रुकुम पुगेका विकसहित ६ जनाको स्थानीयहरुबाट हत्या गरिएको थियो । 

समाज सुधार, सामाजिक न्याय, समता तथा  दलित मुक्ति आन्दोलनमा अविस्मरणीय योगदान पुर्‍याएका भगत सर्वजित विश्वकर्माको कदर स्वरुप नेपाल सरकारले विसं २०७३  सालदेखि भगत सर्वजित मानव मर्यादा राष्ट्रिय पुरस्कार स्थापना गरेको छ । 

यसबाहेक संस्कति, भाषा, ललितकला, संगीत तथा नाट्य गरि चारै विधामा एक– एक जनालाई जनही रू.१ लाख राशीको राष्ट्रिय प्रतिभा पुरस्कार र ती प्रत्येक विधामा सात–सात जनालाई जनही रू.५० हजार राशीको प्रादेशिक प्रतिभा पुरस्कार पनि घोषणा गरिएको छ ।  

महाकवी देवकोटा पुरस्कार भाषा सहित्य विधासहित कविता, निवन्ध, गद्यआख्यान/ नाटक र बाल साहित्य/ लोकसाहित्य गरि पाँच ओटा विधामा पाँच जना स्रष्टालाई दिने निर्णय भएको छ । 

गोपालप्रसाद रिमाल राष्ट्रिय पुरस्कार नाटकसहित कविता विधामा एक जनालाई, पुष्पलाल राष्ट्रिय पुरस्कार साहित्य, संस्कृतिसहित राजनीतिक र सैद्धान्तिक तथा ईतिहास गरि तीन ओटा विधामा तीन जनालाई र भगत सर्वजित मानव मर्यादा राष्ट्रिय पुरस्कार समाज सुधार अभियानसहित मानवअधिकार र सीप कला, शिक्षा, साहित्य, लेखन तथा अनुसन्धान गरी तीन जानलाई दिने निर्णय भएको छ । 

ती प्रत्येक पुरस्कारको राशी जनही रू. १ लाख रहेको मन्त्रालयले बताएको छ ।

प्रतिक्रिया [0]