साउन ७ गतेसम्म लकडाउनलाई निरन्तरता दिने सरकारको निर्णय

उद्धार बाहेकका सबै हवाई उडान बन्द

टीपी भुसाल

असार १५, काठमाडौं । सरकारले अहिलेको लकडाउनको मोडललाई साउन ७ गतेसम्म निरन्तरता दिने निर्णय गरेको छ । मन्त्रिपरिषदको सोमवार बसेको बैठकले अहिलेकै मोडलको लकडाउनलाई निरन्तरता दिने निर्णय गरेको एक संस्कृति पर्यटन तथा नागरिक उड्यन मन्त्री योगेश भट्टराइले जानकारी दिए । 

सरकारले केन्द्रसँग समन्वय गरी प्रदेश, जिल्ला र स्थानीय तहले ठाउँअनुसार कडाई र खुकुलो बनाउन सक्ने निर्णय गरेको उनले जानकारी दिए । मन्त्री भट्टराइका अनुसार उद्धार बाहेकका सबै हवाई उडान, सार्वजनिक सवारीका साधन तथा  विद्यालय तथा शैक्षिक संस्थाहरू पनि बन्द नै रहनेछन् भने सरकारले तोकेका २० बाहेक अरू अन्तरराष्ट्रिय सीमा नाका पनि बन्द नै रहनेछ । 

मन्त्री परिषद्को अघिल्लो निर्णय अनुसार नेपाल नागरिक उड्डयन प्राधिकरणले व्यवसायिक रुपमा हुने सबै राष्ट्रिय तथा अन्तरराष्ट्रिय उडानहरुमा असार २१ गते (५ जुलाई, २०२०) सम्मका लागि पुनः प्रतिबन्ध लगाएको थियो । प्राधिकरणको अनुमतिमा यो समयमा पनि उद्धार, मेडिकल कार्गो जस्ता उडानहरु भने हुने मन्त्री भट्टराइले जानकारी दिए । 

सरकारले सुरक्षा मापदण्ड पालना नभएको भन्दै सबैलाई सर्तक रहन  मास्क, सेनेटाइजरको प्रयोग तथा सामाजिक दूरी कायम गर्न पनि आग्रह गरेको उनले बताए । 

सरकारले झन्डै ३ महीनादेखि जारी लकडाउनको मोडालिटी परिवर्तन गर्दै जेठ २८ गतेबाट गरी केही खुकलो बनाएको थियो । अघिल्लो मन्त्रिपरिषद्को बैठकले सरकारी तथा गैरसरकारी कार्यालय, बैंक वित्तीय संस्थाहरू, शैक्षिक संस्थाका कार्यालयहरू बिहान ८ बजेदेखि दिउँसो १ बजे र दिउँसो १ बजेबाट साँझ ६ बजेसम्म गरी दुई सिफटमा चलाउनुपर्ने निर्णय गरेको थियो । 

सभा समारोह, प्रदर्शन गर्न पाइने छैन भने सिनेमा हल, डान्सबार, पुस्तकालय, संग्रहालय, समूहमा खेलिने खेल, स्वीमिङ पुलहरू पनि साउन ७ सम्म बन्द नै रहनेछन् । रेस्टुरेन्टहरू प्याकिङ र टेक अवे सेवा दिने गरी खुला गर्न सकिनेछ भने क्वारेन्टाइन बनाइएका बाहेकका होटलहरू बन्द नै रहने उनले बताए । मन्त्री भट्टराइका अनुसार अवस्थाको विश्लेषण गरी मोडालिटीको बारेमा पछि थप निर्णय हुनेछ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस