गण्डकी प्रदेशमा थप २८ जनामा संक्रमण, संक्रमितको संख्या ९९४ पुग्यो

नरहरि पौड्याल

असार १७, कास्की । गण्डकी प्रदेशमा बुधवार थप २८ जनामा कोरोना संक्रमण पुष्टि भएको छ । प्रदेश क्षयरोग केन्द्र पोखरा, पोखरा स्वास्थ्य विज्ञान प्रतिष्ठान, राष्ट्रिय जनस्वास्थ्य प्रयोगशाला काठमाडौं र भरतपुर अस्पताल चितवनमा गरिएको परीक्षणमा गण्डकी प्रदेशमा थप २८ जनामा कोरोना संक्रमण पुष्टि भएको हो ।

गण्डकी स्वास्थ्य निर्देशनालयका निर्देशक डा. विनोदविन्दु शर्माका अनुसार नयाँ संक्रमितहरुमा स्याङ्जाका ८, तनहुँका १, बागलुङका ३, गोरखाका ३, कास्कीका १ र नवलपरासी पूर्वका १२ जना रहेका छन् ।  

नवलपरासी र कास्कीका सबै संक्रमितलाई आईसोलेशनमा राखिएको छ भने गोरखा शहिद लखन गाउँपालिकाको संक्रमितलाई कोरोना अस्पताल भरतपुरमा राखिएको छ । अन्य जिल्लाका सबै संक्रमितहरुलाई सम्बन्धित जिल्लाहरुमा रहेका आईसोलेशनमा लैजाने तयारी भइरहेको स्वास्थ्य निर्देशक डा. शर्माले जनाकारी दिए । 

यो सँगै गण्डकी प्रदेशमा संक्रमितको संख्या ९९४ पुगेको छ । हालसम्म प्रदेशमा संक्रमण निको भएर घर फर्कनेको संख्या २१४ रहेको प्रदेश स्वास्थ्य निर्देशनालयले जानकारी दिएको छ ।

प्रतिक्रिया [0]