रसुवागढी नाकामा १६ ओटा मालवाहक ट्रक लोड

व्यवसायीले स्वघोषणा गरेलगत्तै जाँचपास भएर सामान छुट्ने

विजय दमासे

काठमाडौं । विगत ५ महीनादेखि ठप्प रहेको चीनतर्फको रसुवागढी नाका सोमवारदेखि सञ्चालन आएसँगै १६ ओटा मालवाहक ट्रक लोड भएका छन् । सोमवार र मंगलवार गरी ४/४ ओटा कन्टेनरमा चिनियाँ मालवाहक गाडीले विद्युतीय उपकरण, लत्ताकपडा लगायत सामान मितेरी पुलमा ल्याइदिएपछि ती सामान नेपालबाट गएका ट्रकहरूमा लोड गरिएको हो ।

चीनतर्फ रहेका १० जना ड्राइभर र १५ जना कामदारले उक्त सामान लोड गरेका हुन् । चीनसँग भएको समझदारी अनुसार उक्त कामदारलाई क्वारेन्टाइनमा राखिएको छ । चालक र कामदारको दैनिक स्वास्थ्य परीक्षण गरिएको भन्सार कार्यालय रसुवाले जानकारी दिएको छ । सो नाकाबाट दैनिक ५० मालवाहक गाडी भिœयाउने सरकारको तयारी छ ।
व्यवसायीले भन्सार बिन्दुमा स्वघोषणा नगरेकाले जाँचपास गरेर छुटाउने काम भने नभएको रसुवागढी भन्सार कार्यालयका प्रमुख पुण्यविक्रम खड्काले बताए । उनका अनुसार व्यवसायीले सामानको स्वघोषणा गरे २ दिनभित्र सामान जाँचपास गरेर नाकाबाट छुटाइनेछ ।

‘नाका अब निर्बाध रूपमा सञ्चालनमा आएको छ, भन्सार प्रशासनमा कुनै ढिलासुस्ती छैन,’ उनले बताए । उनका अनुसार केरुङमा करोडौं रुपैयाँ बराबरको मालसामान लोड भएर महीनौंदेखि अड्किएका ३०० गाडी छुटाउने पहिलो चरणमै भन्सारले सहयोग गर्ने तयारी गरिरहेको छ ।

रसुवागढी नाका निर्बाध सञ्चालनमा आएसँगै उद्योगी व्यापारी उत्साहित देखिएका छन् । नेपाल चेम्बर अफ कमर्शका भन्सार सभापति नीरज राईले लामो समयदेखि बन्द नाका निजीक्षेत्रको पहलमा सञ्चालनमा आएसँगै आफूहरूलाई राहत मिल्ने बताए । उनका अनुसार नाकामा रहेका सामानको स्वघोषणा छिट्टै गरेर नेपाल भिœयाइनेछ । अहिले नाकामा आएका सामान विशेषगरी विद्युतीय र लत्ताकपडा रहेको उनको भनाइ छ ।

लामो समयदेखि चीनतर्फको उक्त नाका बन्द हुँदा केही स्वास्थ्य सामग्री सिन्धुपाल्चोकको तातोपानी भन्सारबाट आइरहेको थियो । यस्तै नाका बन्द हुँदा चैत, वैशाख र जेठ महिनाको राजस्व संकलन शून्य भएको थियो । उक्त भन्सारबाट अन्य बेला दैनिक करोडौं राजस्व संकलन हुने गरेको थियो ।

रसुवागढी नाकाबाट सामान भित्र्याउन थालिए पनि सर्वसाधारण आवतजावत गर्न भने पाएका छैनन् । रसुवाका प्रमुख जिल्ला अधिकारी हरिप्रसाद पन्तले सबै तयारी पूरा गरेर नाका सञ्चालनमा ल्याइएको र कुनै तयारीको कमी हुन नदिइने बताए । उनका अनुसार स्वास्थ्य परीक्षण, सीमाक्षेत्रमा विशेष सुरक्षा, क्वारेन्टाइनजस्ता व्यवस्थापनलाई स्थानीय प्रशासनले पूर्णरूपमा चुस्तदुस्त बनाएको छ ।

प्रतिक्रिया [0]