दैनिक खपत १ हजार ३०० मेगावाटसम्म

मिलन विश्वकर्मा

काठमाडौं । बन्दाबन्दी खुकुलो भएर उद्योग, कलकारखाना तथा व्यावसायिक कार्यालयहरू सञ्चालनमा आउन थालेपछि विद्युत् खपतमा पनि सुधार भएको छ । बन्दाबन्दीमा कडाइ भएको बेला उद्योग, कलकारखाना, होटेल लगायत क्षेत्रहरू बन्द भएपछि विद्युत् खपत निकै घटेको थियो । तर, सरकारले १ गतेदेखि केही क्षेत्र खुुकलो बनाएसँगै सरकारी तथा गैरसरकारी कार्यालय, उद्योग कलकारखाना सञ्चालनमा आएपछि विद्युत् खपत बढेको हो ।

गर्मी बढेसँगै एयर कण्डिशन (एसी), पंखा जस्ता विद्युतीय उपकरणको प्रयोग बढेको र काठमाडौं सिँचाइमा पनि विद्युत्को प्रयोग हुन थालेपछि यसको खपत बढेको हो । पछिल्लो समय घरायसी ग्राहकसँगै औद्योगिक लगायत ग्राहकबाट विद्युत्को माग बढ्दै गएको छ । लकडाउनको समयमा दैनिक औसत १ करोड ४० लाख युनिट विद्युत् खपत हुने गरेको थियो । तर, अहिले त्यो बढेर २ करोड ७० लाख युनिटभन्दा माथि पुगेको छ । सामान्य अवस्थामा यही सिजनमा पनि सोही मात्रामा विद्युत् खपत हुने गर्दथ्यो । हालको विद्युत् खपत सन्तोषजनक रहेको नेपाल विद्युत् प्राधिकरणको भनाइ छ ।

सरकारले कोरोना भाइरस नियन्त्रण तथा रोकथाम गर्न गत चैत ११ गतेदेखि मुलुकभर लकडाउन लगाएको थियो । तर, सरकारले असारको १ गतेदेखि लकडाउन खुकुलो बनाएपछि विभिन्न क्षेत्रहरू चलायमान हुँदै गएका छन् । फलस्वरूप विद्युत् खपत बढेको प्राधिकरणको भारप्रेषण केन्द्रका प्रमुख सुरेश भट्टराईले बताए । ‘अहिले गर्मी बढेपछि एसी, पंखा जस्ता विद्युतीय उपकरणको प्रयोग पनि बढ्दै गएको छ । साथै, सिँचाइमा पनि विद्युतीय उपकरण प्रयोेग हुन थालेका छन्,’ उनले भने, ‘उद्योग र होटेलहरू पूर्ण रूपमा सञ्चालन भए विद्युत् खपत थप बढ्छ ।’

नेपालमा अधिक विद्युत् खपत गर्ने क्षेत्र नै उद्योग, कालकारखाना, होटल, व्यापारिक भवन, कार्यालय हुन् । तर, लकडाउन कारण तिनीहरू बन्द हुँदा विद्युत् खपतमा ह्रास आएको थियो । त्यतिबेला घरायसी प्रयोजनका लागि मात्र विद्युत् खपत हुने गरेको थियो ।

अहिले दैनिक करीब १ हजार ३०० मेगावाटसम्म विद्युत् खपत हुने गरेको छ । पूर्ण लकडाउनमा विद्युत्को औसत माग ५०० मेगावाट थियो भने भने पिकआवरमा ९०० मेगावाटसम्म खपत हुने गरेको थियो । तर, अहिले पिकआवरमा १३०० मेगावाट भन्दा बढी विद्युत् माग हुने गरेको भारप्रेषण केन्द्रका प्रमुख भट्टराई बताउँछन् ।

काठमाडौं उपत्यकामा भने ३०० मेगावाटको हाराहारीमा विद्युत् माग हने गरेको छ । सामान्य अवस्थामा उपत्यकामा दैनिक ३५० मेगावाट विद्युत् माग हुने गर्छ । कोरोनाको त्रासले काठमाडौंका अस्थायी बासिन्दा गृह जिल्ला गएपछि यहाँ पनि विद्युत् खपत घटेको थियो । काठमाडौं फर्किनेहरूको संख्या बढ्दै जाँदा विद्युत्् खपत पनि बढ्दै गएको छ ।
विद्युत् खपत मौसमको आधारमा हुने बताइएको छ । केन्द्रका अनुसार गर्मी बढ्यो भने विद्युत् खपत बढ्ने सम्भावना हुन्छ । झरी भइरह्यो भने खपतमा केही ह्रास आउन सक्ने केन्द्रको भनाइ छ ।

अहिले नेपालमा विद्युत् आपूर्ति सहज गर्न भारतबाट १०० मेगावाटको हाराहारीमा विद्युत् आयात गरिँदै आएको छ । स्वदेशी उत्पादन पनि बढी भएकाले भारतबाट आयात हुने विद्युत््को परिमाण घटेको छ । लकडाउनमा विद्युत् खपत घटेसँगै प्राधिकरणको विद्युत् महशुलबाट हुने आम्दानी पनि प्रभावित भएको थियो । विद्युत् खपत बढेसँगै प्राधिकरणको आम्दानीमा पनि सुधार आउने देखिएको छ ।

प्रतिक्रिया [1]

---

पुरा नाम: *

इमेल: *

प्रतिकृया: *
पठाउनुहोस