वायुसेवा कम्पनीले लाइसेन्स नविकरणमा ५० र पार्किङ शुल्कमा ७५ % छूट पाउने

टीपी भुसाल

साउन १, काठमाडौं  । सरकारले वायुसेवा कम्पनी र विमानस्थलमा सञ्चालित व्यवसायमा विभिन्न छूट तथा सहुलियत दिने निर्णय गरेको छ । मन्त्रिपरिषद् बठैकले वायुसेवा कम्पनीलाई लाइसेन्स नवीकरणमा ५० र पार्किङ शुल्कमा ७५ प्रतिशत छूट दिने निर्णय गरेको हो ।

मन्त्रिपरिषद् बैठकले नेपालभरका विमानस्थलमा आन्तरिक तथा अन्तरराष्ट्रिय उडान गर्ने वायुयान तथा मनोरञ्जनात्मक वायुसेवालाई  विसं २०७६ चैत १ गतेदेखि लकडाउन खुलेको मितिपछि एक महीनासम्म पार्किङ शुल्कमा ७५ प्रतिशत छूट दिइने निर्णय गरेको छ । 

यस्तै आन्तरिक तथा बाह्य विमानस्थल परिसरमा विमान कम्पनीले भाडामा लिएका कोठा, सञ्चालित पसल/ कवल, रेष्टुराँ/ लाउन्ज, मनि एक्सचेन्ज, सवारी पार्किङलगायत सेवा दिएका फर्मलाई समेत सरकारले छूट घोषणा गरेको अर्थ र सञ्चार तथा सूचना प्रविधिमन्त्री डा युवराज खतिवडाले जानकारी दिए ।

यी व्यवसायलाई पनि गत  चैत १ गतेदेखि लकडाउन खुलेको  एक महीनासम्म कोठा स्थानको बहालमा ७५ प्रतिशत दरले छूट दिने निर्णय भएको छ । 

उनका अनुसार सरकारले विमानस्थल सेवा शुल्क नियमावली अनुसार नियमित रुपमा बुझाउनुपर्ने विमानस्थल शुल्क भुक्तानी गर्ने अवधि सन् २०२० डिसेम्बर ३१ सम्म कायम गरी बुझाएमा विलम्ब शुल्क नलिने निर्णयसमेत भएको छ ।

सरकारको यो निर्णयलाई व्यवसायिहरुले सकारात्मक रुपमा लिएको नेपाल वायुसेवा सञ्चालक संघ (आयोन) का प्रवक्ता योगराज शर्मा कँडेलले बताए । कोरोना भाइरस (कोभिड– १९) ले उडान सेवा पूर्णरुपमा प्रभावित भएको अवस्थामा सरकारले गरेको यो निर्णयले व्यवसायिहरुलाई पक्कै केही राहत हुने उनले बताए । 

‘उडानहरु बन्दहुँदा व्यवसाय ठप्प छ, व्यवसायिहरुले सहुलियतका लागि नियामक निकाय मार्फत पनि आफ्ना धारणा राखेका थियौं, जेजति सम्बोधन भयो यसलाई हामीले सकारात्मक रुपमा नै दिएका छौं,’ उनले भने ।

कोरोना भाइरसको कारण जारी लकडाउनसँगै चार्टर, कार्गो तथा उद्धार उडान बाहेक अन्य सबै व्यवसायिक उडान बन्द भएपनि व्यवसायिहरुले क्यानमार्फत सरकासँग विभिन्न छूट तथा सहुलियत माग गर्दै आएका थिए ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस