अख्तियारका कामबारे संसदीय समितिले अध्ययन गर्ने

विजय दमासे

काठमाडौं । ठूला घटनाको अनुसन्धानमा अख्तियारले तदारुकता देखाउन नसकेकोमा आलोचना भइरहेका बेला अख्तियार दुरुपयोग अनुसन्धान आयोगका कामबारे संसदीय समितिले अध्ययन गर्ने भएको छ ।

स्वास्थ्य सामग्री, वाइडबडी विमान किन्दा भएको अनियमितता, स्थानीय र प्रदेश तहमा देखिएको भ्रष्टाचार छानविनमा अख्तियारको भूमिका कमजोर देखिएपछि संसदीय समितिले छुट्टै समिति बनाएर उसको कामकारबाहीबारे अध्ययन गर्ने भएको हो ।

प्रतिनिधिसभाको राज्य व्यवस्था तथा सुशासन समितिले मुलुकमा बढ्दो बेथिति, भ्रष्टाचार, अनियमिततामा अख्तियारको कामकारबाहीमाथि प्रश्न उठेपछि उपसमिति बनाएर अख्तियारका पछिल्ला ३ वर्षदेखिका प्रतिवेदन झिकाएर अध्ययन गर्न लागेको हो ।

समितिकी सभापति शशी श्रेठले पछिल्ला क्रम देखिएका ठूला भ्रष्टाचारमा अख्तियारले अहिले गरिरहेको अनुसन्धान परिणाममुखी नभएको बताइन् । उनका अनुसार राजनीतिक संरक्षणमा हुने अनियमितता, मन्त्रिपरिषद्बाट हुने गरेका नीतिगत भ्रष्टाचारलगायत विषयमा अख्तियारको भूमिका प्रभावकारी हुनुपर्नेमा त्यसो हुन सकेको छैन ।

मुलुकमा सुशासन स्थापना गराउन संवैधानिक आयोग अख्तियारको महŒवपूर्ण भूमिका रहने भए पनि उसले प्रभावकारी रूपमा काम गर्न नसक्नु ठूलो कमजोरी भएको उनको भनाइ छ । ‘पछिल्ला वर्षमा अख्तियारले गरेका कामकारबाहीको प्रतिवेदन झिकाएर अध्ययन गर्न लागिएको छ, सूक्ष्म अध्ययनपछि निर्देशन दिइनेछ,’ उनले भनिन् ।

विशेषगरी अख्तियारले साना घटनामा मात्रै कारबाही गरेको तर नीतिगत रूपमा हुने ठूला भ्रष्टाचारमा अनुसन्धान नगरी बसेको भन्दै पछिल्लो समय अख्तियारको भूमिकामाथि नै प्रश्न उठ्दै आएको छ । हालै समितिले अख्तियारका प्रमुख आयुक्त नवीनकुमार घिमिरेसँग अख्तियारको कामकारबाहीका बारेमा जानकारी लिएको थियो । ठूला घटनामा छानविन चलिरहेकाले परिणाम देखिन समय लागेको अख्तियारका प्रमुख आयुक्त घिमिरेले बताएका थिए । उनले निजीक्षेत्रमा अख्तियारलाई प्रवेश गराउनुपर्ने आशयसमेत समिति बैठकमा
राखेका थिए ।

तर, आइतवार बसेको समिति बैठकमा बोल्ने अधिकांश सांसदले अख्तियारमा राजनीतिक भागबन्डा हुँदा बढ्दो बेथिती रोक्न र निष्पक्ष ढंगले काम गर्न नसकेको भन्दै आक्रोश पोखेका थिए । सत्तारूढ नेकपाका नेता जनार्दन शर्माले भ्रष्टाचारको केन्द्र राजनीतिक क्षेत्र भएको बताएका छन् । प्रमुख प्रतिपक्षी दल नेपाली कांग्रेसका अमरेश सिंह तथा देवेन्द्रराज कँडेललगायतले अख्तियारले आफूलाई सुधार्दै लैजानुपर्नेमा जोड दिए । स्थानीय तहमा जनप्रतिनिधि नै ठेक्कापट्टामा लाग्दा झनै बेथिती बढेको भन्दै उनीहरूले छानविनको समेत माग राखेका थिए । समितिले सोमवार अख्तियारको कामकारबाहीबारे छुट्टै समिति बनाएर अघि बढ्नेबारे छलफल गरेको थियो । छुट्टै समितिले बनेपछि विस्तृत अध्ययन थालिने र आयोगलाई थप निर्देशन दिइने तयारी राज्य व्यवस्था समितिको छ ।

 

प्रतिक्रिया [1]

---

पुरा नाम: *

इमेल: *

प्रतिकृया: *
पठाउनुहोस