खुले साना तथा पर्यटकीय होटेल

अन्तरराष्ट्रिय उडानको प्रतीक्षामा ठूला होटेल, नजिकिँदै गरेको मुख्य पर्यटकीय सिजनका लागि तयारी गर्ने मौका पाएको व्यवसायीको भनाइ

हिमा वि.क.

काठमाडौं । सरकारले औपचारिक रूपमा होटेल तथा रेस्टुराँ सञ्चालन गर्ने अनुमति दिएसँगै बिहीवारबाट साना तथा पर्यटकीयस्तरका होटेल खुलेका छन् । होटेल एशोसिएशन नेपाल (हान)का अनुसार काठमाडौं उपत्यकासँगै पोखरा, चितवनलगायत प्रमुख पर्यटकीय गन्तव्यका एकतारेदेखि तीनतारेस्तरका पर्यटकीय होटेलले आफ्नो सेवा पुनः सञ्चालनमा ल्याएका छन् ।

होटेलसँगै पर्वतारोहण, पदयात्रा तथा ट्राभल÷टूर्ससम्बन्धी व्यवसाय गर्ने कम्पनीहरूले पनि बिहीवारबाट आफ्ना कार्यालय सञ्चालनमा ल्याएका छन् ।

तर, चारतारे तथा पाँचतारे स्तरका होटेल भने कमै सञ्चालनमा आएका छन् । पाँचतारे होटेल सोल्टी क्राउन प्लाज, काठमाडौं अलफ्ट र मेरियट होटेल खुले पनि काठमाडौंका अन्य पाँचतारे होटेल तत्काल ग्राहक नपाउने  देखिएपछि आफ्नो सेवा तत्काल शुरू नगर्ने मनसायमा छन् ।

हाल आन्तरिक रूपमा होटेल सञ्चालनको गृहकार्यमा जुटेका यी होटेल अन्तरराष्ट्रिय उडानको प्रतीक्षामा छन् । सरकारले भदौ १ गतेदेखि आन्तरिक र अन्तरराष्ट्रिय उडान खुला गर्ने निर्णयसमेत गरिसकेको छ ।

आन्तरिक तथा अन्तरराष्ट्रिय उडान सञ्चालन नहुँदासम्म आन्तरिक र बाह्य पर्यटकको आगमन शून्यप्रायः हुने भएकाले तत्कालै होटेल सञ्चालन गरिहाल्नुपर्ने अवस्था नदेखिएकाले विस्तारै होटेल सञ्चालन गर्ने तयारी होटेल व्यवसायीहरूको छ । ‘अहिले होटेलहरूको बुकिङ नभए पनि अब नेपालमा होटेल व्यवसाय पुनः सञ्चालन भएको सन्देश गएको छ,’ हानका महासचिव साजन शाक्यले भने, ‘भदौ १ देखि अन्तरराष्ट्रिय उडान हुने भनिएको छ । त्यसअनुसार कस्तो परिस्थिति हुन्छ, पर्ख र हेरको अवस्थामा छौं ।’

होटेल सञ्चालनमा आउन थाले पनि स्वास्थ्य मन्त्रालयले जारी गरेको प्रोटोकलको अस्पष्टताले अन्योलमा परेको होटेल व्यवसायीहरू बताउँछन् । खासगरी विदेशबाट आउने पर्यटकका विषयमा स्पष्ट मापदण्ड नहुँदा अन्योल रहेको उनीहरूको भनाइ छ । विदेशबाट आउने पर्यटक क्वारेन्टाइनमा १४ दिन नै बस्नुपर्ने वा नपर्ने अथवा पीसीआर रिपोर्ट नेगेटिभ भए मात्रै पुग्नेलगायत विषयमा अन्योल रहेको हानको भनाइ छ ।

नेपाली पर्यटनको मुख्य सिजन नजिकिँदै जाँदा यसपटक १०–१५ प्रतिशत पर्यटन आउने प्रारम्भिक प्रक्षेपण हानको छ । गतवर्ष (सन् २०१९) को यही सिजनमा २ लाखदेखि २ लाख ५० हजारसम्म विदेशी पर्यटक नेपाल आएका थिए । तर, यो अवस्थामा फर्कन पुनः ३÷४ वर्ष लाग्ने व्यवसायीको भनाइ छ ।

मुलुकका अन्य पर्यटकीय गन्तव्य पोखरा, चितवनको सौराहा तथा अन्य स्थानका होटेल आंशिक रूपमा खुलेका छन् । हान पोखरा च्याप्टरका अध्यक्ष विकल्प तुलाचनले सरकारले अनुमति दिए पनि आन्तरिक र बाह्य उडान शुरू नभएको र सार्वजनिक यातायातसमेत नखुलेकाले पोखराका ठूला होटेल सञ्चालनमा नआएको बताए ।

‘होटेल खोल्ने निर्णयले नजिकिएको पर्यटकीय सिजनको तयारी गर्ने मौका दिएको छ ।

यस क्षेत्रका होटेललाई सञ्चालन र बुकिङलगायत गृहकार्य गर्न पर्याप्त समय मिलेको छ,’ तुलाधनले भने ।

होटेल सञ्चालनभन्दा पनि स्वास्थ्य मन्त्रालय तथा पर्यटन मन्त्रालयले जारी गरेको स्वास्थ्य प्रोटोकल पालना चुनौतीपूर्ण भएको होटल व्यवसायीहरूको भनाइ छ । ‘विशेषगरी साना तथा मझौला होटेललाई थप व्ययभार पर्ने देखिन्छ,’ तुलाचनले भने ।

हानका चितवन च्याप्टरका अध्यक्ष दीपक भट्टराईले चितवनमा आंशिक रूपमा होटेलहरू खुलेको जानकारी दिए । ११० पर्यटकीय होटेल रहेको चितवनमा अहिले सौराहा घुम्न खुला गरिएको उनले बताए । सबै पर्यटकीय गतिविधि खुला गरिएको जानकारी दिँदै भट्टराईले पर्यटन क्षेत्रका लागि जारी स्वास्थ्य प्रोटोकल कडाइका साथ पालना गर्न सबै होटेललाई परिपत्र गरिएको बताए । तत्काल विदेशी पर्यटकको बुकिङ नभए पनि अहिले आन्तरिक पर्यटकलाई लक्षित गरेर सौराहाका होटेल तथा पर्यटकीय गतिविधि सञ्चालनमा ल्याइएको उनको भनाइ छ । यद्यपि बन्दाबन्दीअघि विदेशी पर्यटकबाट गरिएको केही बुकिङ बाँकी रहेको र सेप्टेम्बर अक्टोबरका लागि पनि कतिपय पर्यटकले बुकिङका लागि चासो दिइरहेको होटेल व्यवसायी बताउँछन् ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस