हवाई उडान र लामो दूरीको यातायात भदौ १५ गतेसम्म नखुल्ने

नेपाल भारत सीमा नाका थप कडाई गर्ने सरकारको निर्णय

२०७७ सावन, २६

समाचार

टीपी भुसाल

साउन २६, काठमाडौं । सरकारले भदौ १ बाट सुचारु गर्ने भनेको आन्तरिक तथा अन्तरराष्ट्रिय उडान र लामो दूरीको यातायात खोल्ने मिति भदौ १५ गतेसम्मलाई सार्ने निर्णय गरेको छ ।

सोमवार बसेको मन्त्रिपरिषद् बैठकले हवाई उडान तथा लामो दूरीको यातायात सुचारु गर्ने मिति पछि सार्ने निर्णय गरेको हो । कोभिड–१९ क्राइसिस म्यानेजमेन्ट सेन्टर (सीसीएमसी) को आइतवार बसको बैठकले मुलुकभर कोरोना संक्रमण बढ्दै गएपछि हवाई उडान तथा यातायात १५ दिन पछि सार्न मन्त्रिपरिषद्मा प्रस्ताव लैजाने निर्णय गरेको थियो । यद्यपी यसबारे मंगलवार या बुधवार पत्रकार सम्मेलन मार्फत जानकारी दिइने एक मन्त्रीले बताए ।

कोरोना संक्रमण बढ्दै जाँदा सरकारले फेरि लकडाउन गर्ने हो कि भन्ने चासोका बीच लकडाउन भने नगरिने बताइएको छ । यसअघि मन्त्रिपरिषद्को साउन ५ को बैठकले अन्तरजिल्ला यातायात, अन्तरराष्ट्रिय तथा आन्तरिक उडान तथा विद्यालय भर्ना लगायत भदौ १ गतेदेखि खुला गर्ने निर्णय गरेको थियो । यस्तै मन्त्रिपरिषद् बैठकले अन्तरराष्ट्रिय सीमा नाकामा थप कडाइ गर्दै भारतबाट आउने नेपालीहरूका लागि तोकिएको प्रवेश विन्दु आधा घटाएर १० मा राख्ने निर्णय पनि गरेको छ ।

सरकारले भदौ १ गतेदेखि उडान गर्न दिने निर्णय गरेपछि वायु सेवा कम्पनीहरूले कर्मचारीहरूलाई तालीम दिएर उडानको तयारी थालेका थिए । त्यस्तै कतिपय कम्पनीहरूले भाडादर तय गरी टिकट बुकिङसमेत शुरू गरेका थिए ।

संस्कृति, पर्यटन तथा नागरिक उड्डयन मन्त्रालयले ‘सीमित नियमित हवाईसम्बन्धी मापदण्ड–२०७७’ मस्यौदा तयार पारेर कोभिड–१९ संकट व्यवस्थापन केन्द्र (सीसीएमसी)लाई पेश गरेको थियो ।