थप तीनओटा देशमा हवाई सम्झौता गर्ने सरकारको तयारी

नियमित उडानमा बढी भाडा नलिन सचेत गराउने मन्त्रालयको निर्णय 

टीपी भुसाल

भदौ, १४ काठमाडौं । सरकारले तीनओटा देशमा हवाई सम्झौता गर्ने तयारी गरेको छ । संस्कृति पर्यटन तथा नागरिक उड्डयन मन्त्रालयमा आइतवार भएको मन्त्रालयको उच्च स्तरीय व्यवस्थापन समूहको बैठकले इन्डोनेसिया, फिनल्याण्ड र रसियासँग हवाई सम्झौताको प्रकृया अघि बढाउने निर्णय गरेको हो । 

नेपालले हालसम्म ४० ओटा मुलुकहरुसँग द्विपक्षीय हवाई सेवा सम्झौता तथा समझदारी–पत्रमा हस्ताक्षर गरेको छ । अन्तरराष्ट्रिय उडानतर्फ ३ ओटा नेपाली वायुसेवा र २७ ओटा विदेशी वायुसेवा गरी ३० ओटा वायुसेवाले १५ मुलुकका ३२ ओटा गन्तव्यमा उडान सञ्चालन गरिरहेका छन् ।  

नेपालले पछिल्लो पटक १ अक्टोबर २०१९ मा अस्ट्रेलियासँग हवाई सम्झौता गरेको थियो । अष्ट्रेलिया नेपालसँग हवाई सम्झौता गर्ने ४० औं मुलुक हो । नेपालले दक्षिण एशिया, दक्षिण पूर्व एशिया र मध्यपूर्वका कुनै २ विन्दु उपयोग गर्दै मध्यवर्ती विन्दु भएर पाँचौ ट्राफिक अधिकार (फिफ्थ फ्रीडम) उपभोग गर्न पाउन गरी अष्ट्रेलियासँग सम्झौता गरेको थियो । त्यसअघि नेपाल ३९ औं मुलुकका रुपमा कम्बोडियासँग हवाई सम्झौता गरेको थियो । 

सम्झौताको तयारी गरिएका देशमध्ये फिनल्यान्ड आफैले नेपालसँग हवाई सम्झौताका लागि रुचि देखाएको थियो । अन्य मुलुकसँग नेपाल आफैले चासो बढाएको थियो । 

यसैबीच आइतवारको बैठकले भदौ १६ गतेदेखि नियमिति उडान हुने हुँदा वायुसेवा कम्पनीहरुले कोभिड-१९ को महामारी पूर्व नियमित अवस्थामा लिने हवाई भाडा दरभन्दा बढी नलिनतर्फ सबै वायुसेवा निगमहरुसँग समन्वय गर्ने र नेपाल नागरिक उड्डयन प्राधिकरणमार्फत वायुसेवा कम्पनीहरुलाई सचेत गराउने निर्णय गरेको छ । 

यसअघि भएका विभिन्न चार्टर उडानमा विमान सेवा कम्पनी र ट्राभल एजेन्सीहरु मिलेर बढि भाडा लिएको भन्दै मन्त्रालयले छानविन समिति गठन समेत गरेको थियो । तर समितिले दिएको प्रतिवेदन अनुरुप मन्त्रालयले कारबाही भने गरेको छैन । 

बैठकमा संस्कृति पर्यटन तथा नागरिक उड्डयन मन्त्री योगेश भट्टराईले मन्त्रालयको वार्षिक कार्ययोजनामा समावेश गरिएका माईलस्टोनहरुलाई तोकिएको समयमै सम्पन्न गर्न निर्देशन दिएका थिए । उनले कामलाई प्रभावकारी बनाउन र समयमै सम्पन्न गर्नतर्फ सबैको ध्यान जानुपर्ने बताए ।  

यसैबीच मन्त्रालयले नेपालीहरु स्वदेश फिर्ति लगायतका विषयलाई अनुगमन र सहजीकरण गर्न पर्यटन मन्त्रालयका उपसचिव रामकृष्ण लामिछानेको संयोजकत्वमा चार सदस्यीय समिति बनाएको छ । समितिको सदस्यहरुमा पर्यटन विभागका निर्देशक सुरेन्द्र थापा, नेपाल नागरिक उड्डयन प्राधिकरणका हिराजन काफ्ले र नेपाल पर्यटन बोर्डका प्रबन्धक सुुनिल शर्मा रहेका छन् । 

समितिलाई हवाई उडान भाडादर यात्रुहरुको परिवहनका विषयमा अनुगमन गर्ने, होटलले प्रदान गर्ने मापदण्डको विषयमा स्थलगत अनुगमन गरी पृष्ठपोषण प्रदान गर्ने, हान लगायतका संघ संस्थाहरुसँग आवश्यक समन्वय गर्ने र स्वदेश फिर्ता प्रकृयासँग जोडिएको गुनासो व्यवस्थापन गर्ने कार्यादेश तोकिएको छ । 

यस्तै बैठकले हिमाल आरोहणका लागि खटाईने सम्पर्क अधिकृत र रेस्क्यु लगायतका विषयमा मापदण्ड र कार्यविधि बनाउने निर्णय समेत गरेको पर्यटन मन्त्रालयले जानकारी दिएको छ ।

प्रतिक्रिया [0]