काठमाडौं उपत्यकामा शर्तसहितको निषेधाज्ञा थप खुकुलो

आलोपालो प्रणालीबाट पसल खोल्न पाइने, सवारीसाधनमा जोरबिजोर लागू

टीपी भुसाल

काठमाडौं । व्यावसायिक क्षेत्रले निषेधाज्ञा जारी भए आआफ्ना व्यवसाय सञ्चालन गरी अवज्ञा गर्ने बताइरहँदा काठमाडौं उपत्यकामा जारी निषेधाज्ञालाई बिहीवारबाट केही खुकुलो बनाइने भएको छ ।

बुधवार बसेको उपत्यकाका तीनओटै जिल्लाका प्रमुख जिल्ला अधिकारीहरूको बैठकले भदौ २५ देखि निषेधाज्ञालाई केही खुकुलो पार्दै व्यापार, व्यवसाय र उद्योग कलकारखाना चलाउन शर्तसहित अनुमति दिएको हो ।

बैठकले बुधवार मध्यरातदेखि भदौ ३१ गते मध्यरातसम्मका लागि लागू हुने गरी निषेधाज्ञाका बेलामा विभिन्न सेवा सञ्चालन गर्न छूट दिने निर्णय गरेको छ । कोरोना संक्रमण बढ्दै गएपछि स्थानीय प्रशासनले भदौ ३ गतेदेखि उपत्यकामा निषेधाज्ञा लागू गर्दै आएको छ ।

पछिल्लो समय निजीक्षेत्रले सरकारलाई निषेधाज्ञा खुकुलो बनाउन दबाब दिन थालेको थियो । निजीक्षेत्र र प्रधानमन्त्री केपी शर्मा ओलीबीचको आइतवारको छलफलमा पनि निजीक्षेत्रको यही माग थियो । यसबीचमा अटोमोबाइल व्यवसायीले निषेधाज्ञा थपिए अवज्ञा गर्ने चेतावनी दिएका थिए भने यातायात व्यवसायीले असोजबाट सार्वजनिक यातायात सञ्चालन गर्ने बताएका थिए ।

स्थानीय प्रशासनको पछिल्लो निर्णयअनुसार उपत्यकाभित्र जोरबिजोर प्रणालीमा निजी र सार्वजनिक यातायात सञ्चालन गर्न पाइने भएको छ । १६ सीट क्षमताभन्दा माथिका सार्वजनिक यातायातका साधन सञ्चालन गर्न दिने, भाडाका ट्याक्सीको हकमा चालकसहित ३ जना र परिवारभित्रमा ५ वर्षमुनिका बालबालिका २ जना राखी चलाउन सकिने निर्णय गरेको जिल्ला प्रशासन कार्यालय काठमाडौंले जारी गरेको सूचनामा उल्लेख छ । यस्तै, निजी सवारीसाधन पनि स्वास्थ्य मापदण्ड पालना गरी जोरबिजोर प्रणालीमा सञ्चालन गर्न दिइनेछ । तर, मालवाहक तथा अत्यावश्यक सामग्री आपूर्ति गर्ने सवारीसाधनको हकमा भने जोरबिजोर लागू हुने छैन ।

निषेध गरिएका क्षेत्रहरू
जारी निषेधाज्ञामा खुला स्थानमा भीडभाड हुन, भेला हुन तथा जुलुस गर्न तथा नित्य पूजापाठबाहेक धार्मिक स्थलमा अन्य गतिविधि सञ्चालन गर्न पाइने छैन ।

भीडभाड हुने उद्योग कलकारखाना, व्यापार व्यवसायअन्तर्गतका स्वास्थ्य मापदण्डविपरीत हुने क्रियाकलाप गर्न पनि निषेध गरिएको छ ।

शैक्षिक संस्थाहरू सञ्चालन गर्न, सुरक्षा मापदण्डविपरीत श्रमिकको ओसारपसार गर्न, सभा, गोष्ठी, तालीम, सेमिनार सिनेमा हल, पार्टी प्यालेस, सैलुन ब्युटीपार्लर, चिडियाखाना सञ्चालनमा पनि रोक लगाइएको छ ।

आलोपालो प्रणालीबाट पसल खोल्न पाइने
बिहीवारदेखि उपत्यकामा वारअनुसार आलोपालो गरी पसल खोल्न दिने व्यवस्था गरिएको छ । बजारमा बढी भीड बढ्न नदिन समय र वारअनुसार पसल खोल्न दिन लागिएको हो ।

खाद्यान्न, दूध, फलफूल, तरकारी, मासु विक्री गर्ने पसलहरू दैनिक बिहान ११ बजेसम्म र बेलुका ५ बजेदेखि ७ बजेसम्म खुला रहनेछन् । त्यस्तै, विकास निर्माणसँग सम्बद्ध सामग्री विक्री गर्ने पसल व्यवसाय र सोको ढुवानी गर्ने सवारीसाधन दिउँसो २ देखि बेलुका ७ बजेसम्म मात्र सञ्चालन गर्न पाइनेछ ।

यस्तै, तयारी खाद्यवस्तुको टेकअवे र अनलाइन डेलिभरी दिउँसो १२ देखि बेलुका ७ बजेसम्म मात्र गर्न पाइनेछ ।

सहकारी संस्थाहरू स्वास्थ्य मापदण्ड अपनाएर बिहान ११ देखि दिउँसो ३ बजेसम्म सञ्चालन गर्न पाइनेछ । सपिङ मल, फेन्सी स्टोर, कपडा, जुत्तापसल, कस्मेटिकलगायत पसल मापदण्ड पालना गरेर साताको सोमवार, बुधवार र शनिवार खोल्न पाइनेछ ।

भाँडा र भान्साजन्यका साथै सोही प्रकृतिका अन्य पसल साताको आइतवार, मंगलवार र शुक्रवार मात्र खोल्न पाइनेछ ।

फर्निचर र अटोमोबाइलसम्बन्धी पसल सातामा सोमवार र बुधवार खुला रहनेछन् । फुटपाथ, ठेला, स्टेशनरी इलेक्ट्रिक र इलेक्ट्रोनिक पसल र डिपार्टमेन्ट स्टोरहरू बिहान ११ सम्म र बेलुका ४ देखि ७ बजेसम्म खुल्नेछन् ।

सवारीसाधनका वर्कसपहरू बिहान ८ देखि बेलुका ८ बजेसम्म सञ्चालन गर्न पाइनेछ । तर, यी सबैमा स्वास्थ्य मापदण्ड अनिवार्य पालना गर्नुपर्ने जिल्ला प्रशासन कार्यालय काठमाडौंले जानकारी दिएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस