बजेट कार्यान्वयनबारे अर्थमन्त्रीले थाले समीक्षा

नयाँ बजेट तथा कार्यक्रमभन्दा चालू बजेट कार्यान्वयनमै जोड दिन सचिवहरूको आग्रह

विजय दमासे

काठमाडौं । चालू आर्थिक वर्ष २०७७/७८ का लागि सरकारले ल्याएको बजेट कार्यान्वयनको पहिलो त्रैमासमा भएका प्रगतिबारे अर्थमन्त्री विष्णु पौडेलले समीक्षा गर्न थालेका छन् ।
असोज अन्त्यबाट अर्थमन्त्रीको जिम्मेवारी सम्हालेका पौडेलले बजेट कार्यान्वयन अवस्थाबारेमा मन्त्रालयगत रूपमा अधिकारीहरूसँग समीक्षा थालेका हुन् ।

पहिलो चरणमा शहरी विकास मन्त्रालय, पर्यटन तथा नागरिक उड्डयन मन्त्रालयसँग चालू आर्थिक वर्षको बजेट कार्यान्वयनको प्रगति, विशेषतः पूँजीगत खर्चको अवस्थाका बारेमा अर्थमन्त्रीले छलफल गरेको अर्थ मन्त्रालयका सहसचिव यमलाल भुसालले बताए ।

कोरोनालाई कारण देखाउँदै धेरै मन्त्रालयहरूले लक्ष्यअनुसार कार्यसम्पादन प्राप्त गर्न सकिरहेका छैनन् । यस्तो अवस्थामा बजेट समीक्षामार्फत विभागीय मन्त्रालयका प्रमुखहरूलाई अर्थमन्त्री पौडेलले कोभिडलाई कारण देखाउँदै बजेट कार्यान्वयनमा अब ढिलासुस्ती नगर्न निर्देशन दिएका छन् । त्यस्तै बजेट कार्यान्वयन कार्ययोजनाअनुसार लक्ष्य भेट्ने गरी कार्यसम्पादन गर्न पनि उनले निर्देशन दिएका छन् ।

सोमवार भएको दुई मन्त्रालयका अधिकारीहरूसँगको बजेट समीक्षामा मन्त्री पौडेलले कोरोना महामारी नियन्त्रण तथा रोकथामका लागि बजेटमार्फत ल्याइएका नीति तथा कार्यक्रम प्रभावकारी रूपमा कार्यान्वयन गर्न निर्देशन दिएका छन् ।

समीक्षामा मन्त्रालयका सचिवहरूले नयाँ बजेट तथा कार्यक्रम भन्दा पनि चालू बजेट कार्यान्वयनका लागि अर्थमन्त्रीसँग सहजीकरण गरिदिन माग गरेका थिए । उनीहरूले सानातिना कार्यक्रम तथा योजनाहरू संघीय मन्त्रालयहरूबाट भन्दा पनि प्रदेश/स्थानीय तहबाट कार्यान्वयनमा लैजानुपर्नेमा जोड दिएका थिए ।

अर्थ मन्त्रालयका अनुसार कुल १४ खर्ब ७४ अर्ब बराबरको बजेट ल्याएको सरकारले असोज मसान्तसम्म २ खर्ब १ अर्ब अर्थात् (१३ दशमलव ६३ प्रतिशत) मात्रै बजेट खर्च गरेको छ, बजेट कार्यान्वयन लक्ष्य भने २० प्रतिशतभन्दा माथि खर्च गर्ने रहेको थियो ।

चालू आवको पहिलो त्रैमासमा चालूतर्फ रू. १ खर्ब ८२ अर्बभन्दा बढी बजेट खर्च भएको छ । चालू वर्षमा कोरोनासँग जुध्दै विकासको गतिलाई तीव्रता दिने सरकारले बताए पनि पहिलो त्रैमाससम्ममा सरकारले गरेको पूँजीगत खर्च निकै कमजोर अर्थात् १५ अर्ब ४ करोड रुपैयाँ मात्रै भएको अर्थ मन्त्रालयले जानकारी दिएको छ ।

मन्त्री पौडेलले सबै मन्त्रालयहरूसँग बजेट कार्यान्वयनबारे छलफल गर्ने कार्यतालिका रहेको र चालू बजेट कार्यान्वयनमा देखिएका समस्याहरूका बारेमा समेत मन्त्रीले विभागीय मन्त्रालयका प्रमुखहरूसँग छलफल गर्ने कार्यतालिका रहेको अर्थमन्त्रीको सचिवालयले बतायो ।

‘समस्याहरू सुन्ने प्रयास अर्थमन्त्रीबाट भएको छ, कुनै बहानामा अब बजेट कार्यान्वयन प्रभावित हुन नदिन अर्थमन्त्रीले मन्त्रालयका सचिवहरूलाई निर्देशन दिनुभएको छ,’ अर्थ स्रोतले बतायो ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस