ताप्लेजुङको मैवाखोलामा पर्यटन तथा पर्वतारोहण विषय अध्यापन शुरू

चासो राख्ने ठाउँमा पर्यटन विषयको पढाइ गरिने

टीपी भुसाल

कात्तिक २५, काठमाडौं । सरकारले पर्यटनका लागि स्थानीयस्तरमा समेत दक्ष जनशक्ति उत्पादनका लागि पर्यटन शिक्षाको आवश्यकता ठान्ने क्षेत्रमा पर्यटन पढाइ शुरू गर्ने भएको छ । सोहीअनुरूप ताप्लेजुङको मौवाखोलास्थित नेपाल नारायणी माविमा पर्यटन तथा पर्वतारोहण विषयको पठाइ शुरू गरिएको छ । 

संस्कृति, पर्यटन तथा नागरिक उड्डयनमन्त्री योगेश भट्टराईले उक्त विद्यालयमा पर्यटन तथा पर्वतारोहण विषय अध्यापनको मंगलवार शुभारम्भ गरे । विश्व पर्यटनका केन्द्रमध्ये नेपाल पनि एक भएकाले पर्यटन प्रवद्र्धनसँगै विकासका लागि हिमाल आरोहणमा चासो राख्ने विभिन्न क्षेत्रमा पर्यटन पढाइ शुरू गरिने मन्त्री भट्टराईले बताए ।

विश्वका ८ हजारभन्दा माथिका १४ ओटा हिमालमध्ये आठओटा नेपालमा रहेको भन्दै मन्त्री भट्टराईले हिमाल आरोहणका लागि वर्षेनि हजारौं मानिस नेपाल आउने र स्वदेशी पनि हिमाल चढ्ने हुँदा आवश्यक पर्ने शैक्षिक दक्ष जनशक्ति उत्पादनका लागि पर्यटन विषय अध्यापन शुरू गरिएको बताए ।

नेपाल पर्वतीय प्रशिक्षण प्रतिष्ठान कार्यकारी निर्देशक रोमनाथ ज्ञवाली र नारायण माविका प्रधाध्यापक गणेशबहादुर प्रसाईबीच कक्षा ११ र १२ मा पर्यटन विषय अध्यापनका लागि शनिवार सम्झौतापत्रमा हस्ताक्षर भएको छ । सम्झौतापत्रमा प्रतिष्ठानको तर्फबाट कक्षा ११ र १२ को पर्यटन र पर्वतारोहणसँग सम्बन्धित विषय अध्ययन अध्यापन गराउन अनुभवी प्रशिक्षक उपलब्ध गराउने, पर्यटन तथा पर्वतारोहण विषयका पाठ्यक्रम र अध्ययन सामग्री उपलब्ध गराउने, आवश्यकता अनुसार अन्य प्राविधिक तथा शैक्षिक सहयोग गर्ने उल्लेख छ ।

यस्तै विद्यालयको तर्फबाट पर्यटन तथा पर्वतारोहण विषय कक्षा ११ र १२ मा अध्यापन गराउने, अध्यापन गराउन आउने शिक्षको व्यवस्थानपन, पुस्तकालय लगायतका सामग्री विद्यालय उपलब्ध गराउने सहमति भएको नेपाल पर्वतीय प्रशिक्षण प्रतिष्ठानले जानकारी दिएको छ ।

प्रतिक्रिया [0]