गौतमबुद्ध अन्तरराष्ट्रिय विमानस्थल : दोस्रोे टर्मिनलका लागि टेन्डरको तयारी

२०७७ मंसिर, ७

समाचार

काठमाडौं । नेपाल नागरिक उड्डयन प्राधिकरणले भैरहवास्थित गौतमबुद्ध अन्तरराष्ट्रिय विमानस्थल र काठमाडौंको त्रिभुवन अन्तरराष्ट्रिय विमानस्थलको क्षमता विस्तारका लागि टेन्डर प्रक्रियामा जाने तयारी गरेको छ । एशियाली विकास बैंक (एडीबी)ले गौतमबुद्ध अन्तरराष्ट्रिय विमानस्थल र त्रिभुवन अन्तरराष्ट्रिय विमानस्थलको क्षमता विस्तारका लागि थप १८ अर्ब ऋण स्वीकृत गरेपछि प्राधिकरणले सो तयारी थालेको हो ।

बैंकको बोर्ड बैठकले केही समयअघि नेपालका मुख्य विमानस्थलको स्तरोन्नतिका लागि १५ करोड अमेरिकी डलर ऋण स्वीकृत गरेको थियो । एडीबीसँग यस विषयमा सम्झौता भई कार्यान्वयनको चरणमा गइसकेको नेपाल नागरिक उड्डयन प्राधिकरणका महानिर्देशक राजन पोखरेलले जानकारी दिए ।

यो रकमबाट मूल रूपमा भैरहवामा निर्माणाधीन गौतमबुद्ध अन्तरराष्ट्रिय विमानस्थलको दोस्रो टर्मिनल भवनलगायत काम र त्रिभुवन विमानस्थलको समानान्तर ट्याक्सी वेको निर्माण, एप्रोन तथा पार्किङजस्ता पूर्वाधार निर्माण गरिने उनले बताए ।

‘त्रिभुवन विमानस्थल र गौतमबुद्धको मास्टर प्लानअनुसार नै यी काम हुनेछन् । एडीबीसँग सम्झौता भएकाले अब हामी छिट्टै टेन्डरको प्रक्रियामा जान्छौं,’ महानिर्देशक पोखरेलले भने ।

एडीबीको ऋण सहयोगमा यसअघि पनि त्रिभुवन विमानस्थलमा रनवे रि≈याबिलेटेशनदेखि धावनमार्ग विस्तारलगायत काम सम्पन्न गरिएको थियो ।

भैरहवामा दोस्रो चरणको कामअन्तर्गत सो ऋणबाट एरोब्रिजसहितको दोस्रो टर्मिनल भवनका साथै समानान्तर ट्याक्सी वे, पार्किङ वेलगायत भौतिक संरचनाहरू निर्माण गरिने महानिर्देशक पोखरेलले बताए ।

प्राधिकरणका अनुसार अहिले गौतमबुद्ध अन्तरराष्ट्रिय विमानस्थलको दोस्रो टर्मिलन भवन निर्माणका लागि डिजाइनको काम भइरहेको छ । यी सबै पूर्वाधार सम्पन्न गर्न करीब १० अर्ब रुपैयाँसम्मको लागत लाग्ने अनुमान छ ।

पहिलो चरणको भौतिक निर्माणका लागि पनि एडीबीले नै ऋण उपलब्ध गराएको थियो । यसको निर्माण कार्य सन् २०२० को अन्त्यसम्म सक्ने गरी काम भइरहेको छ ।

भैरहवामा विमानस्थलको निर्माण सन् २०१५ देखि शुरू गरिएको थियो । हाल विमानस्थलको धावनमार्ग, टर्मिनल तथा अन्य भौतिक काम सकिएको र उपकरण जडानको काम बाँकी रहको छ । उपकरण जडानका लागि विदेशी कामदार तथा प्राविधिक नेपाल ल्याउनुपर्ने तर कोभिड १९ का कारण ढिला भएको प्राधिकरणको धारणा छ । अहिले अन्तरराष्ट्रिय उडानसमेत खेलेको र उनीहरूलाई भिसा अनुमतिको प्रक्रिया शुरू भइसकेकाले अब छिट्टै उपकरण जडानलगायत काम सम्पन्न हुने गौतमबुद्ध विमानस्थल आयोजनाले जानकारी दिएको छ ।

२०७१ सालमा निर्माण शुरू भएको भैरहवा विमानस्थलमा दुईओटा ठेकेदार कम्पनी छन् । यसको भौतिक निर्माणको जिम्मा चीनको नर्थवेस्ट सिभिल एभिएशन कन्स्ट्रक्शनले पाएको छ । ६ अर्ब ७० करोड रुपैयाँमा ठेक्का पाएको यो कम्पनीलाई समय थप गर्दै आइएको छ । त्यस्तै यही आयोजनाका लागि उपकरण जडानको जिम्मा एरो थाइ नामक कम्पनीले गर्दै आएको छ ।