सुदूपश्चिममा मुख्यमन्त्री एकीकृत बस्ती विकास कार्यक्रम शुरू

मदन गिरी

सुदूरपश्चिम प्रदेश सरकारले चालू आर्थिक वर्षको नीति तथा कार्यक्रममा स्वीकृत मुख्यमन्त्री एकीकृत बस्ती विकास कार्यक्रम शुरू भएको छ । सुदूरपश्चिमका चार जिल्लाका चार स्थानीय तहमा छनोटमा परेको बस्तीमा घर निर्माण शुरू गरिएको हो । 

सोही कार्यक्रम अन्तर्गत वेदकोट नगरपालिका–५ धरमपुरको मुक्त हलिया बस्तीमा घर निर्माण कार्य थालिएको छ । मंगलवार सुदूरपश्चिम प्रदेश सरकारका मुख्यमन्त्री त्रिलोचन भट्टले घरको शिलान्यास गरे । 

सुदूरपश्चिम प्रदेश सरकारको भूमि व्यवस्था तथा सहकारी मन्त्रालयले गरीब तथा विपन्न वर्गको पहिचान गरी बस्ती व्यवस्थापन कार्यक्रम सञ्चालन गरेको हो ।
मन्त्रालयको योजना महाशाखा प्रमुख गोकुल बोहराले विभिन्न क्षेत्रमा छरिएर रहेका भूमीहिन र अव्यवस्थीत बस्ती, प्राकृृतिक प्रकोप पीडित वर्गको पहिचान गरी तिनको संरक्षण एवम् जीवनस्तर उकास्न कार्यक्रम सञ्चालन गरिएको बताए । उनका अनुसार उक्त कार्यक्रम कञ्चनपुरको वेदकोट नगरपालिकासँगै डोटीको सिलगढीस् नगरपालिका, कैलालीको भजनी गाउँपालिका र अछामको मेल्लेख गाँउपालिकामा सञ्चालनको तयारीमा छ । 

कार्यक्रम अन्तर्गत वेदकोटको मुक्त हलिया बस्तीमा १ करोड १५ लाखको बजेटमा २५ घर निर्माण गरिनेछ । मुख्यमन्त्री एकीकृत बस्ती विकास कार्यक्रमका लागि मन्त्रालयले ५ करोड बजेट विनियोजन गरेको छ । तीन स्थानीय तहमा बस्ती विकासका लागि घर निर्माण कार्य मन्त्रालयले अगाडि बढाएको छ भने मेल्लेख गाउँपालिकालाई कार्यक्रमको ६० लाख बजेट हस्तान्तरणको तयारी गरिएको योजना महाशाखा प्रमुख बोहराको भनाइ छ ।

मेल्लेखमा १० ओटा घर निर्माण गरिनेछन् । त्यस्तै भजनीको भुरुवा राजबस्तीमा २५ र सिलगढीको वादी बस्तीमा ७ वडा घर निर्माणका लागि ठेक्का सम्झौता भइसकेको छ ।

मंगलवार शिलान्यास कार्यक्रममा मुख्यमन्त्री भट्टले विपन्न भूमिहीन वर्गको जीवनस्तर उकास्न कार्यक्रम ल्याइएको बताए । उनले एकीकृत बस्ती विकाससँगै रोजगारीका कार्यक्रम पनि सञ्चालन गरिने बताए । साथै प्रदेश सरकारले जन भावना अनुसार समृद्ध प्रदेशको परिकल्पना सहित काम गरिरहेको दाबी गरे । भूमि व्यवस्था तथा सहकारी मन्त्री विनीता चौधरीको अध्यक्षतामा शिलान्यास कार्यक्रम आयोजना गरिएको थियो ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस