प्रधानमन्त्री ओलीको कदमविरुद्ध नागरिक समाज पनि सडकमा

कांग्रेसले पुस १३ गते १६५ ओटै निर्वाचन क्षेत्रमा प्रर्दशन गर्ने

टीपी भुसाल

काठमाडौं । प्रधानमन्त्री केपी शर्मा ओलीले प्रतिनिधिसभा विगठन गरेपछि उक्त कदमविरुद्ध सडक आन्दोलन केन्द्रित भएको छ । प्रतिनिधिसभा विघटनको विरोधमा नागरिक समाजले माइतीघर मण्डलामा प्रदर्शन गरेका छन् । ‘प्रतिगमन विरुद्ध बृहत् नागरिक आन्दोलन’को ब्यानरमा शनिवार भएको प्रदर्शनमा सहभागीहरूले प्रतिनिधिसभा विघटनको विरोध गरे । प्रतिनिधिसभा पुनःस्थापना भएर जनताको सार्वभौम अधिकार जनतामै नफर्किएसम्म आन्दोलन गर्दै जाने नागरिक अगुवाहरूले बताएका छन् । यस्तै उनीहरूले विद्यमान समस्याको समाधान संविधानभित्रैबाट खोज्न सुझाएका छन् । पुस १८ गतेसम्म दिन बिराएर प्रदर्शन गर्ने नागरिक आन्दोलनले जानकारी दिएको छ ।

आन्दोलनका कार्यक्रम अनुसार पुस १३ मा मा डम्फु एपिसोड, पुस १५ मा धिमे एपिसोड, पुस १७ मा च्याब्रुङ एपिसोड र  पुस १८ मा सडक नाटकसहित सभा गरिने कार्यक्रम तय भएका छन् । माइतीघर मण्डलामा शनिवार आयोजित शंख एपिसोडमा प्रधानमन्त्री ओलीले प्रतिनिधिसभा विघटन गरेर प्रतिगमन ल्याएको विरोधमा शंख बजाएर प्रदर्शन गरिएको थियो ।

कार्यक्रममा राष्ट्रिय मानवअधिकार आयोगकी पूर्वसदस्य मोहना अन्सारी, प्राध्यापक बालकृष्ण माबुहाङ, लेखक तथा पत्रकार नारायण वाग्ले लगायतले प्रधानमन्त्री ओलीको कदमलाई प्रतिगमनको संज्ञा दिँदै प्रतिनिधिसभा पुनःस्थापना हुनुपर्ने माग गरेका थिए ।  

प्रधानमन्त्री ओलीलाई पार्टी अध्यक्ष र संसदीय दलको नेताबाट कारबाही गरेसँगै प्रचण्ड–नेपाल नेतृत्वको नेकपाले ओलीविरुद्ध देशव्यापी आन्दालनको घोषणा गरिसकेको छ । नेकपाले शुक्रवार पत्रकार सम्मेलन नै गरेर आन्दोलनका कार्यक्रम घोषणा गरेको हो ।

यस्तै प्रतिपक्ष दल कांगे्रसले प्रतिनिधिसभा विघटन विरुद्ध पुस १३ गते १६५ ओटै निर्वाचन क्षेत्रमा प्रदर्शन गर्ने भएको छ । कांगे्रसले प्रतिनिधिसभा विघटनको कदमलाई असंवैधानिक भन्दै त्यसविरद्ध पुस १३ को प्रदर्शनमा सहभागी हुन आग्रह गरेको छ ।

प्रधानमन्त्रीको कदमविरुद्ध आन्दोलन सडक केन्द्रित भइरहँदा  राजसंस्था र हिन्दू राष्ट्रको माग गर्दै राष्ट्रिय प्रजातन्त्र पार्टी (राप्रपा)ले शनिवार काठमाडौंमा मोटरसाइकल ¥याली निकालेको छ । र्‍यालीमा राप्रपाका अध्यक्षहरू कमल थापा, डा. प्रकाशचन्द्र लोहनी लगायत नेता सहभागी भएका थिए । प्रधानमन्त्री ओलीको कदमविरुद्ध आफ्नै दल नेकपा सहित अन्य दल सडकमा आर्लिंदा प्रधानमन्त्री ओलीले भने शुक्रवार निर्धक्कसँग मन्त्रीमण्डल विस्तार तथा हेरफेर गरेका छन् । ओलीको कदम विरुद्ध असहमति व्यक्त गर्दै प्रचण्ड–नेपाल समूहका पर्यटनमन्त्री योगेश भट्टराई, ऊर्जामन्त्री वर्षमान पुन, वनमन्त्री शक्ति बस्नेत, शिक्षामन्त्री गिरिराजमणि पोखरेल, खानेपानीमन्त्री विना मगर र श्रममन्त्री रामेश्वर राय यादवले पुस ५ गते सामूहिक राजीनामा दिएका थिए ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस