पर्वतमा ४ हजारभन्दा बढी निजी आवास पुनर्निर्माण

रोशन तिवारी

पर्वत । पर्वतमा ०७२ को भूकम्पबाट घर भत्किएका ४ हजार १६३ निजी आवास पुनर्निर्माण भएका छन् । राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ पर्वतका अनुसार जिल्लामा ६ हजार २६७ लाभग्राही सूचीकृत छन् ।

यीमध्ये ३८८ जना सम्झौता गर्न नै आएनन् । घर निर्माणको सम्झौता गरेका पूर्ण क्षतितर्फ ५ हजार ९२४ जना लाभग्राही सूचीकृत भएकामा प्रबलीकरणतर्फ ३४३ जना लाभग्राही छन् ।

पूर्ण क्षति भएका घर पुनर्निर्माण अन्तिम चरणमा रहे पनि प्रबलीकरणतर्फ २१४ जनाले पहिलो किस्ता लगेका छन् भने दोस्रो किस्ता लैजाने एक जना पनि छैनन् ।

अहिलेसम्म घर पूर्ण क्षति भएका ५ हजार ६६५ जना लाभग्राहीले पहिलो किस्ता, ४ हजार ७१२ जनाले दोस्रो किस्ता र ४ हजार १६३ जनाले तेस्रो किस्ताको रकम पाएका छन् ।

प्राधिकरणको जिल्ला आयोजना कार्यालयका सूचना अधिकारी बालकृष्ण शर्माका अनुसार आर्थिक वर्ष ०७७÷७८ मा पुनर्निर्माणमा ८४ प्रतिशत प्रगति हासिल भएको छ ।

कार्यालयले आर्थिक वर्ष ०७७/७८ मा तेस्रो किस्ता १ हजार ३३६ जना, दोस्रो किस्ता ९५६ जना र पहिलो किस्ता ३६२ जनालाई वितरण गरेको शर्माले जानकारी दिए ।

लाभग्राहीलाई अनुदान वितरण बाहेक कार्यालयले जोखिमयुक्त बस्तीका घरहरूका लागि जग्गा खरीद र व्यवस्थापन, सडक स्तरोन्नति, गुम्बा मर्मत, गुनासो व्यवस्थापन, सामाजिक तथा वातावरणीय सुरक्षण कार्यक्रम समेत सञ्चालन गरेको कार्यालय प्रमुख कृष्णराज गौतमले बताए ।

कार्यालयमार्फत स्तरोन्नति भइरहेको पातीचौर मैदान लप्सीबोट सडकको भौतिक प्रगति ९४ प्रतिशत र वित्तीय प्रगति ८८ दशमलव ६२ प्रतिशत सम्पन्न भएको, सामाजिक तथा वातावरणीय सुरक्षणतर्फ शतप्रतिशत प्रगति भएको कार्यालयले बताएको छ ।

गत आर्थिक वर्ष ४७ करोड ५१ लाख ८८ हजार ५०० रुपैयाँ बजेटको अख्तियारी प्राप्त भएको थियो । पुँजीगततर्फ ११ करोड ७४ लाख रहेकामा ७ करोड ३५ लाख २९ हजार १२५ रुपैयाँ खर्च भएको छ ।

चालूतर्फ ३५ करोड ७७ लाख ८८ हजार ५०० मध्ये ३१ करोड १३ लाख ५२ हजार १३६ रुपैयाँ खर्च भएको कार्यालय प्रमुख गौतमले जानकारी दिए ।

प्रतिक्रिया [0]