गोल्डेन शेयर खरीद प्रकरण : आरोपितमाथि अर्थ मन्त्रालयदेखि अख्तियारसम्मको अनुसन्धान

विजय दमासे

काठमाडौं । बुक बिल्डिङ विधिबाट बढी मूल्यमा सर्वसाधारणलाई शेयर निष्कासनको तयारीमा रहेको सर्वोत्तम सिमेन्टको शेयर खरीद गरी नियमविपरीत काम गरेको आरोप लागेका नेपाल धितोपत्र बोर्डका अध्यक्ष भीष्मराज ढुंगाना र नेपाल स्टक एक्सचेन्जका महाप्रबन्धक चन्द्रसिंह साउदमाथि अर्थ मन्त्रालयदेखि अख्तियारसम्मले अनुसन्धान तथा छानविन अघि बढाएका छन् ।

बुक बिल्डिङ विधिमार्फत धितोपत्र निष्कासनको तयारी गरिरहेको सर्वाेत्तम सिमेन्टको शेयर आफन्तको नाममा खरीद गरेकाबारे अर्थ मन्त्रालयले दुवै निकायलाई स्पष्टीकरण सोधेर अनुसन्धान अघि बढाएको छ भने अख्तियार दुरुपयोग अनुसन्धान आयोगले समेत यसबारे अनुसन्धान प्रक्रिया अघि बढाएको हो ।

गत साउन १३ गते अर्थ मन्त्रालयले धितोपत्र बोर्ड र साउन १४ मा नेपाल स्टक एक्सचेन्जलाई यसबारे यथार्थ के हो, त्यसको स्पष्ट, तथ्यपरक जवाफ ३ दिनभित्र पेश गर्न पत्र काटेर भनेको थियो । अर्थ मन्त्रालयले बोर्ड अध्यक्ष तथा नेप्सेका महाप्रबन्धकसँग स्पष्टीकरण नमागी बोर्ड र नेप्सेका नाममा पत्र पठाएको थियो ।

अर्थ मन्त्रालय वित्तीय व्यवस्थापन तथा संस्थान समन्वय महाशाखाका अधिकारीहरूका अनुसार धितोपत्र बोर्ड र नेपाल स्टक एक्सचेन्जले स्पष्टीकरण बुझाएका छन् । छोरी तथा श्रीमतीले शेयर खरीद गरेको तर भित्री कारोबार भने नगरेको बेहोरासहितको दुवै निकायले स्पष्टीकरण बुझाएको अर्थ स्रोतको दाबी छ ।

अर्थ मन्त्रालयका सहसचिव महेश आचार्यले अब पत्रहरूको आवश्यक अध्ययन गरेर मन्त्रालयले आफ्नो तयार गर्दै छ । ‘गलत भएको भए कारबाही हुन्छ, पत्रसँगै हामीले सूक्ष्म अध्ययन तथा छानविन थालिसकेका छौं,’ आचार्यले अभियानलाई बताए ।

नियामक संस्थाका प्रमुख जस्तो व्यक्तिले व्यक्तिगत लाभका लागि कानूनविपरीत छोरी तथा श्रीमतीको नाममा शेयर खरीद गरेको बारे अख्तियारले समेत चासो देखाएको छ । यसका लागि अख्तियारले उजुरी यकिन गर्दै छ ।

अख्तियारका प्रवक्ता नारायणप्रसाद रिसालले उजुरीका आधारमा छानविन अघि बढाउने बताए । ‘केकति कस्तो प्रकृतिको उजुरी आएका छन् पहिला हामीले यकिन गरिरहेका छौं, त्यसपछि थप छानविन अघि बढाउँदै छौं ’ उनले बताए । त्यससम्बन्धी कागजातसहित आरोपितलाई बयानका लागि झिकाउने तयारी भइरहेको अख्तियारका अधिकारीहरूको भनाइ छ ।

सर्वोत्तम कम्पनीको ११ हजार ९१२ कित्ता शेयर धितोपत्र बोर्डका अध्यक्ष भीष्मराज ढुगांनाको छोरी रेविका ढुंगाना र सोही बरारको शेयर नै नेपाल स्टक एक्सचेन्जका महाप्रबन्धक चन्द्र सिंह साउदकी श्रीमती सुशीलाकुमारी बोहोराको नाममा रहेको प्रमाणसहित समाचार प्रकाशित भएको थियो ।

धितोपत्र बोर्डका अध्यक्ष ढुंगानाले छोरीका नाममा र नेप्सेका सीईओ चन्द्रसिंह साउदले पत्नीका नाममा २५० रुपैयाँका दरले शेयर किनेपछि छानविनका लागि अर्थ मन्त्रालयसहित अख्तियारलाई समेत दबाब पर्दै आएको थियो । सर्वोत्तमले बुक बिल्डिङङमार्फत आईपीओ जारी गर्दा यसको प्रतिकित्ता मूल्य ७५० रुपैयाँ हाराहारीमा आउने आकलन भइरहेको छ ।

निलम्बन गर्न माग
सर्वाेत्तम सिमेन्टको शेयर प्रकरणमा आरोपित अध्यक्ष भीष्मराज ढुंगानासहितका नियामक निकायका अधिकारीहरूलाई तत्काल निलम्बन गरी छानविन थाल्न दबाब पर्न थालेको छ ।

आइतवार मात्रै धितोपत्र बोर्ड कर्मचारी युनियनले बोर्ड अध्यक्षको इमानदारी, कानूनी प्रावधान, आचारसंहिताअनुसार गम्भीर नैतिक पतन देखिएको भन्दै बोर्डको गरिमालाई आँच आउन नदिन आरोपित व्यक्तिमाथि निलम्बन गरी छानविन अघि बढाएर कारबाही गर्न माग गर्‍यो ।

कर्मचारी युनियनका अनुसार अध्यक्षले गरेको गल्तीमा सिँगै संस्थालाई मुछेर अर्थ मन्त्रालयले पत्र पठाएकोप्रति पनि ध्यानाकर्षण भएको जनाएको छ । अर्थ मन्त्रालयले १३ साउनमा धितोपत्र बोर्डलाई सम्बोधन गर्दै मिडियामा आएका विषयमा ३ दिनभित्र स्पष्टीकरण दिन भनेको थियो ।

आइतवार युनियनका अध्यक्ष राजुबहादुर जीसी र वरिष्ठ उपाध्यक्ष गौरव विष्टले जारी गरेको विज्ञप्तिमा कर्मचारी युनियनले बुक बिल्डिङमार्फत धितोपत्र जारी गर्ने प्रक्रियामा गएको संस्थाको धितोपत्र र त्यससँग निहित संवेदनशील जानकारीका आधारमा आफ्नो निकट पारिवारिक सदस्यका नाममा धितोपत्र खरीद गर्नु बोर्डका अध्यक्षको गम्भीर विचलन भएको तर यसमा सिँगो संस्थालाई नै मुछिनु गलत भएको बताएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस