दैलोमै कृषि बजार, किसानलाई सहज

रोशन तिवारी

पर्वत । हिउँदमा गाडी चल्ने तर, बर्खामा बन्द हुँदा पर्वत जलजलाका किसानको उत्पादन बारीमा कुहिन्थ्यो । अहिले भने यो समस्या हटेको छ । मौसमी तथा बेमौसमी तरकारी फलाउने किसानले उत्पादन बजारीकरण गर्न कृषि बजार सञ्चालन गरेपछि सहज भएको हो ।

प्रधानमन्त्री कृषि आधुनिकीकरण परियोजना अन्तर्गत सुन्तला जोन, तरकारी पकेट क्षेत्र तथा विभिन्न बालीका ब्लक कार्यक्रम सञ्चालन भएको जलजला पर्वतकै सबैभन्दा बढी व्यावसायिक किसान रहेको पालिका हो । जलजलाका धाइरिङ, नाग्लीवाङ, शालिजा, लेखफाँट, मल्लाज जस्ता गाउँमा बाह्रै महिना तरकारीखेती हुने गरेको छ । तर अनेक सकस झेलेर तरकारी र फलफूल उत्पादन गर्ने किसानले त्यसअनुसारको प्रतिफल पाउन सकेका थिएनन् । आफूले उत्पादन गरेको वस्तुबाट बिचौलिया लाभान्वित भइरहेको महसुस गरेपछि किसानले आफै बजार सञ्चालन गरेका हुन् ।

गत वर्षअघि शुरू गरेको ‘जलजला कृषि बजार’मा अहिलेसम्म ४ सय किसान जोडिइसकेका छन् । राजु आचार्यको नेतृत्वमा प्रदेश सरकार, स्थानीय सरकार र कृषि ज्ञान केन्द्रको आर्थिक सहयोगमा सञ्चालन गरिएको कृषि बजार स्थानीय किसानको सहभागितामा सञ्चालनमा छ । एक जना किसानले १० हजार रुपैयाँका दरले लगानी गरेर शुरू गरेको कृषि बजारमा १० जना कर्मचारी कार्यरत छन् भने कृषि उपजको संकलन र विक्रीका लागि दुईओटा गाडी खरिद गरिएको छ ।

हरेक दिन कृषि उपज संकलन गर्न गाडी किसानको बारीसम्मै पुग्छ । वडा–७ को मिलनचोकमा कृषि उपजको संकलन केन्द्र सञ्चालनमा ल्याइएको छ । करिब १० रोपनी जग्गा भाडामा लिएर कृषि बजारका लागि तरकारी, फलफूल, अन्न, कुखुरा, खसीबोकालगायत संकलन तथा भण्डारणको व्यवस्था गरिएको छ । केन्द्रमै थोक तथा खुद्रा विक्रीका लागि मासु तथा तरकारी पसलसमेत सञ्चालनमा छन् ।

कृषि बजार सञ्चालक समितिका अध्यक्ष आचार्यका अनुसार केन्द्रमा संकलित तरकारी बजारसम्म पु¥याउने काम पनि समूहले नै गर्दै आएको छ । किसानले गाउँमा उत्पादन गरेको कृषि उपज, पशुजन्य उत्पादन नजिकको संकलन केन्द्रमा पु¥याउँछन् । संकलन केन्द्रमा कृषि बजारको गाडी गएर बजारसम्म ल्याउँछ । किसानले पठाएको वस्तुको रकम कृषि बजारले तिर्ने गरेको छ ।

विक्री केन्द्रबाट मात्रै दैनिक ६० हजार रुपैयाँसम्मको कारोबार हुँदै आएको छ । बिचौलियाको मारमा परेका किसान र उपभोक्तालाई राहत दिन शुरू गरेको कृषि बजारले सफलता पाउँदै गएको उपभोक्ता बताउँछन् । कृषि बजारको क्षमता बढाएर यहाँको उत्पादन पोखरा, काठमाडौं, बुटवलसम्म लैजाने तयारीमा रहेको कृषि बजार सञ्चालक समितिले बताएको छ ।

प्रतिक्रिया [0]