सुक्खा बन्दरगाहले नेपालकै नं १ व्यापारिक हब बन्दै बल्खु-कलंकी क्षेत्र, न्यूरोडका ३५०० होलसेल बल्खु सर्दै

२२०० सटर भएको आदर कम्पलेक्सको निर्माण अन्तिम चरणमा, १ हजार सटर भएको एनबीटीसी सञ्चालनमा

अमर बडुवाल

पुस २९, काठमाडौं। चोभारमा निर्माण भएको सुक्खा बन्दरगाह सञ्चालनमा आएमा नेपालकै सबैभन्दा ठूलो व्यापारिक हब बल्खु-कलंकी क्षेत्र हुने भएको छ ।

चोभारमा सुक्खा बन्दरगाह निर्माण अघि बढेसँगै न्यूरोडका ५०० भन्दा बढी व्यवसायीले बल्खुमा होलसेल पसलहरु मात्रै सञ्चालन गर्ने उद्धेष्यले कम्पलेक्स निर्माणको काम अघि बढाएका थिए ।

२०७२ को भूकम्पपछि न्यूरोडका व्यवसायीले बल्खु कलंकी क्षेत्रमा दुई ओटा ठूला होलसेल सपिङ कम्पलेक्सको निर्माण अघि बढाएका थिए । सुक्खा बन्दरगाहको निर्माण सकिएको छ । १ हजार सटर भएको नेशनल बिजनेश ट्रेड सेन्टर (एनबीटीसी) दुई वर्ष अघिनै सञ्चालनमा आइसकेको छ । २ हजार २०० बढी सटरसहितको आदर कम्पलेक्सको निर्माण भने अन्तिम चरणमा छ ।

त्योभन्दा अघिदेखि नै भाटभटेनी सुपर मार्केटले पनि कलंकीमा आफ्नो शाखा सञ्चालनमा ल्याइसकेको छ ।  कलंकीमै थप दुई ओटा व्यापारिक कम्पलेक्स निर्माणाधीन छन् । मालपोत कार्यालय, आन्तरिक राजस्व कार्यालय, ३ ओटा ठूला अस्पताल, ३ ओटा ठूला स्कुल/कलेज लगायतका पूर्वाधारहरु भएको उक्त क्षेत्र नेपालकै नं १ व्यापारिक हब हुने अपेक्षा गरिएको छ ।

८ अर्ब लागतको नेपालकै ठूलो कम्पलेक्स सञ्चालनमा आउँदै

बल्खुमा ४० रोपनी क्षेत्रफलमा फैलिएको नेपालकै सबैभन्दा ठूलो होलसेल सपिङ कम्पलेक्स अवको एक वर्षभित्र सञ्चालनमा आउने भएको छ । शुरुमा ९ तला निर्माण गर्ने गरि अघि बढेको कम्पलेक्स महानगरपालिकाले स्विकृती नदिएपछि ८ तला मात्रै निर्माण गरिएको आदर कम्पलेक्समा लगानीकर्ता उमानाथ सिटौलाले बताए ।

‘९ तला निर्माण भएको भए कम्पलेक्सका भवनभित्रै २ हजार ६०० ओटा सटर निर्माण गर्ने योजना थियो’, उनले आर्थिक अभियानलाई भने, ‘८ तला मात्रै निर्माण गर्न दिएपछि भवनभित्र २ हजार २०० ओटा सटर तथा पार्किङ, गोदाम र खुल्ला क्षेत्रमा ससाना सटरसमेत गरि करीब ३ हजार सटर निर्माण हुनेछन् ।'

न्यूरोडका ५४३ जना व्यावसायी मिलेर शुरु गरेको कम्पलेक्सको भौतिक संरचनाको स्वरुप तयार भइसकेको छ । शुरुमा ३७ रोपनी जग्गा किनेर अघि बढेको यो कम्पलेक्सले पछि थप ३ रोपनी जग्गा किनेको सिटौलाले बताए ।

सबैभन्दा तलका दुई तलामध्ये पहिलो तलामा पार्किङ र दोस्रो तलामा गोदाम रहने छ । त्यो बाहेक ६ तलामा मात्रै २ हजार २०० सटर  निर्माण गर्न  लागिएको उनले बताए ।

कम्पलेक्सको निर्माण लागत करीब ८ अर्ब रुपैयाँ रहेको छ । आदर मल्टिपर्पोज इन्भेष्टमेन्ट कम्पनीले यो कम्पलेक्स निर्माण गरिरहेको छ । पब्लिक कम्पनीनेले निर्माण गरेको यो कम्पलेक्स सञ्चालनमा  आएपछि  सर्वसाधारणलाई शेयरसमेत विक्री गर्ने योजना रहेको सिटौलाले बताए ।

कोटेश्वर-कलंकी चक्रपथ खण्डको खुल्ला बाटो र कम्पलेक्स भित्र रहेको पर्याप्त पार्किङ यहाँको आकर्षण हुने उनको भनाइ छ । 

अवको एक वर्षभित्रै यो कम्पलेक्स सञ्चालनमा आउँदा न्यूरोडमा रहेका करीब ३ हजार होलसेल पसलहरु बल्खु सर्ने छन् । एनबीटीसीमा  अहिलेनै ७०० भन्दाबढी होलसेल पसल विक्री भइसकेका छन् । सुक्खा बन्दरगाह पनि सञ्चालनमा आउँदा नेपालको नं १ व्यापारिक केन्द्र बल्खु कलंकी क्षेत्रनै हुने काठमाडौं महानगरपालिका - १४ की वडा अध्यक्ष सोभा सापकोटाले बताइन् ।

एनबीटीसी र भाटभटेनी सञ्चालनमा

होलसेल मार्केटकै लागि निर्माण गरिएको एनबीटीसी र खुद्रा  सपिङको लागि भाटभटेनी सुपर स्टोरको शाखा भने सञ्चालनमा आइसकेको छ । यी दुवै कम्पलेक्समा पर्याप्त पार्किङ र खुल्ला क्षेत्र राखिएको छ । जहाँ हजारौ मानिसहरु एकै पटक किनमेल गर्न सक्छन् ।

एउटै लाइनमा रहेका यी बिजनेस सेन्टरले अहिले नै कलंकी क्षेत्रको आर्थिक गतिविधिहरु चलायमान बनाई सकेका छन् । २५ रोपनी क्षेत्रफलमा फैलिएको एनबीटीसीमा १ हजार सटरहरु निर्माण गरिएको छ । पौने २ अर्ब रुपैयाँ लागतमा निर्माण गरिएको यो कम्पलेक्सको विक्री मूल्य अहिले ३ अर्ब रुपैयाँ पुगेको एनबीटीसीका सञ्चालक चिरञ्जिवी पौडेलले बताए ।

सिनेमा हलसहितको यो कम्पलेक्स सञ्चालनमा आएको केही समयमै कोभिड १९ शुरु भएको थियो ।  कोभिड - १९ ले समग्र व्यापार व्यवसाय सुस्ताएपछि यो कम्पलेक्समा सटर किनेका व्यवसायीहरु पनि कलंकी सरेका छैनन् । तर अव छिट्टै होलसेल व्यावसायीहरु यी कम्पलेक्समा आउने कुरामा आशावादी रहेको सञ्चालक पौडेलले बताए ।

खुद्रा सपिङको लागि केबीटीसीको निर्माण 

एनबीटीसीले नै निर्माण गरेको कलंकी बिजनेश ट्रेड सेन्टर (केबीटीसी) को निर्माण पनि अन्तिम चरणमा पुगेको  छ । एनबीटीसी होलसेललाई मात्रै लक्षित गरिएको कम्पलेक्स थियो भने केबीटीसी खुद्रा सपिङ कम्पलेक्स रहेको एनबीटीसीका व्यवस्थापक शैलेश चित्रकारले बताए ।

७ रोपनी क्षेत्रफलमा फैलिएको केबीटीसीमा करिब ५०० सटर रहने छन् । सिनेमा हलदेखि फुटकोर्टसम्म निर्माण हुने कम्पलेक्सको काम ६ महीनाभित्र सकिने चित्रकारले बताए ।

७० करोड रुपैयाँ लगानीमा निर्माण शुरु गरिएको केबीटीसीको बजार मूल्य १ अर्ब २५  करोड रुपैयाँ रहेको सञ्चालक पौडेलको भनाइ छ ।

एडभान्स इन्जिनयरिङ कलेज बल्खु सर्दै
कुपण्डोलमा रहेको एडभान्स इन्जिनियरिङ कलेज पनि आगामी साउन सम्म बल्खुमा सर्दै छ । रमेशकुमार सिलवाल अध्यक्ष रहेको यो कलेजले बल्खुमा भवन निर्माणको काम सकेको छ । अवको नयाँ शैक्षिक सत्र बल्खुबाटै सञ्चालन गर्ने योजना रहेको कलेजका सञ्चालकहरु बताउँछन् ।

९ तला अग्लो भवनको अधिकांस काम सकिएको छ । अहिले आन्तरिक फिनिसिङका कामहरु मात्रै बाँकी रहेका छन् । ती काम पनि धमाधम भइरहेका छन् ।

बल्खुमा वयोधा अस्पताल, कलंकीमा शहिद र नेशनल अस्पताल सञ्चालनमा छन् । बल्खुदेखि कलंकीसम्मको क्षेत्रमा बर्न हट कलेज, एडभान्स इन्जिनयरिङ कलेज, एलआरआई कलेजलगायत चल्तिका स्कुल/ कलेज पनि रहेका छन्  । यी कारणले पनि अवको व्यापारिक हब बल्खु कलंकी क्षेत्र हुनेमा स्थानीयहरु पनि आशावादी  छन् । 

अरु ठूला कम्पलेक्स पनि निर्माण हुने चरणमा

बल्खु कलंकी क्षेत्रमा होलसेल पसलहरु आउने भएपपछि अहिले वरपर दर्जनौ व्यापारिक कम्पलेक्सहरु निर्माणाधीन  छन् । ग्यास व्यवसायी मनोज खड्काले पनि भाटभटेनी नजिकै ७० हजार वर्गफिटको ९ तले भवन तयार पारेका छन् । श्रीकृष्ण र साईबाबा ग्यासका मालिक खड्काले बनाएको टावरमा कर्पोरेट हाउसका अफिस रहने छन् । अवको ६ महीना भित्रै टावरको निर्माण सकिने खड्काले बताए । 

यी बाहेक पनि अहिले बल्खुदेखि कलंकीसम्मको क्षेत्रमा दर्जनौ व्यवसायीक कम्पलेक्सहरु निर्माणको योजनामा छन् । चोभारमा रहेको बन्दरगाह सञ्चालनमा आउँदा सामान ल्याउन सजिलो हुने भएकाले यी क्षेत्रमा ठूला व्यापारिक कम्पलेक्सको निर्माण अघि बढेको एनबीटीसीका सञ्चालक पौडेलले बताए ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस