के तपाईंलाई पनि बिहेको निम्तोसँगै नयाँ लुगाको तनाव आउँछ ? अब भाडामा पाइन्छन् लुगा !

प्रतिक्षा कडेल

चैत २९, काठमाडौं। तपाईं हामीमध्ये कतिपयको घरमा आफन्तको बिहेको निम्तो आउँदा खुसी होइन दुःखको माहोल बन्छ ।

बिहे भोजमा जाने र रमाइलो गर्ने रहर त सबैलाई हुन्छ । तर बिहेमा जाँदा लगाउने लुगाको विषय कहिलेकाही झगडाको कारण समेत बन्छ ।

एउटा समारोहमा लगाइसकेको लुगा अर्को समारोहमा लगाउँदा आफन्तले नै कुरा काट्छन् भन्ने पीरले महिला दिदी बहिनीहरूले नयाँ लुगा किन्ने जिद्धी गर्छन् । तर मध्यम वर्गिय परिवारमा हरेक बिहे, भोज वा अन्य कुनै पार्टी हुँदा नयाँ लुगा किन्न सक्ने क्षमता हुँदैन ।

तर अब भने बिहेमा जानलाई नयाँ लुगा किन्नै पर्ने बाध्यताको अन्त्य भएको छ । काठमाडौंको अनामनगरमा खुलेको खुलेको रेन्टल सेवा ले तपाईंलाई चाहिने जस्तो सुकै लुगा कपडा भाडामा दिने गरेको छ ।

न्युनतम ८०० देखि अधिकतम १ हजार २०० रुपैयाँसम्म तिरेर आफूलाई चाहिएको जस्तो सुकै लुगा भाडामा लिन सकिन्छ । लुगा भाडामा लिइसकेपछि ३ दिनपछि फिर्ता गर्नुपर्छ ।

हरेक पार्टी, समारोह, भोज, विवाह जस्ता ‍औपचारिक कार्यक्रममा जान हरेक पटक नयाँ पोशाक खरीद गर्नु मध्यम वर्गिय परिवारको लागि क्षमताभन्दा बाहिरको कुरा हो । 

एउटै कपडा लगाएर धेरै पार्टीमा जान नरुचाउने अहिलेको पुस्तालाई ध्यानमा राखेर कपनकी २३ वर्षीया युवती निस्ता न्यौपानेले भाडामा लुगा दिने व्यवसाय शुरु गरेकी हुन् ।

'धेरै लगाउनुहोस्, कम तिर्नुहोस्' भन्ने स्लोगनसहित उनले लुगा भाडामा दिने व्यवसाय शुरु गरेको बताइन् ।  

अहिलेको पुस्ताले आफू उपस्थित हुने समारोह तथा कार्यक्रमको प्रकृती हेरेर पोषाक तथा त्यसको डिजाईन छनौट गर्ने गर्दछन् ।  विभिन्न साँस्कृतिक कार्यक्रमका लागि भाडामा पोषाक उपलब्ध हुने भए पनि विवाह पार्टीलगायतका समारोहका लागि भाडामा लिन पाईंदैनथ्यो ।

बजारको यहि कमीलाई व्यवसाय बनाउने सोचसहित न्यौपानेले १ लाख रुपैयाँ लगानीमा उक्त स्टोर सञ्चालनमा ल्याएकी हुन् । व्यवसाय शुरू गरेको एक वर्ष मात्रै भएपनि यसबाट उनले सकारात्मक प्रतिक्रिया पाएकी छिन् ।  

यस्ता कपडाहरु प्रायजसो बिहेको सिजनमा धेरै भाडामा जान्छन् । बिवाहको लगन हुने महीनामा मासिक १ लाख रुपैयाँभन्दा बढी आम्दानी गर्ने गरेको उनले बताइन् ।

हरेक पेशा व्यवसायमा जोखिम रहेको भन्दै जोखिम लिन सकेमात्र सफल भईने उनले बताइन् । ‘जोखिम लिन नडराउनुहोस्, आफू र आफ्नो क्षमतामा विश्वास गर्नुहोस्, एकदिन सफल भईन्छ’, उनले भनिन् ।

उनले लुगा भाडामा दिंदा तीन दिनको लागि भाडामा दिने गरेको बताइन् । ग्राहकलाई हतारो नहोस भन्ने मनसायले तीन दिनको लागी लुगा भाडमा दिएको उनको भनाइ छ ।

ग्राहकले स्टोरमै आएर आफूलाई मनपर्ने कपडा र डिजाईन अनुसार छानेर लगाउन सक्छन् । उनको स्टोरमा हरेक उमेर समूहका महिलाको लागि लुगा भाडामा पाइन्छ ।

प्रतिक्रिया [0]