वैशाख ३०, काठमाडौं । भरतपुर महानगरपालिकाको मेयरकी उम्मेदवार रेणु दाहालले भरतपुरलाई देशकै नमुना शहर बनाउने घोषणा गरेकी छिन् ।
मतदान गरेपछि सञ्चारकर्मीहरुसँग बोल्दै उनले जनताले विगतको कामका मूल्यांकन गरेर आफूलाई जिताउनेमा सतप्रतिशत विश्वस्त रहेको पनि बताएकी छिन् ।
आगामी दिनमा भरतपुरको समृद्धिका लागि पनि आफूलाई मतदाताले जिताउने उनको दाबी छ । उनले आफूले जितपछि भरतपुरलाई देशकै नमूना शहर बनाउने पनि घोषणा गरिन् ।
दाहालले भनिन्, ‘हामी संघीयतापछिको दोस्रो स्थानीय तहको निर्वाचनमा छौँ । जनताले विगतको कामको मूल्यांकन र भरतपुरको आगामी समृद्धिको लागि मलाई जिताउनुहुनेछ । भरतपुर देशको एउटा नमूना शहर बनाउने कुरालाई बुझेर त्यो उद्देश्यका साथ मेरो उम्मेवारी हो । गठबन्धनले जित्नेमा म शतप्रतिशत ढुक्क छु ।’
दाहाल सत्ता गठबन्धनमा माओवादी केन्द्रको तर्फबाट भरतपुर महानगरपालिकाको लागि प्रमुखमा उम्मेदवार छिन् । उनको मुख्य प्रतिष्पर्धीको रुपमा नेकपा एमालेबाट विजय सुवेदी र नेपाली काँग्रेसका स्वतन्त्र उम्मेदवार जगन्नाथ पौडेल रहेका छन् । देशवासीले भरतपुर महानगरपालिकाको निर्वाचनलाई मुख्य चासोका साथ हेरेका छन् ।