११ महीनापछि खुल्यो मिरगञ्ज पुल, ढुवानी खर्च प्रतिट्रक १६ हजार रुपैयाँले घट्ने

वेदराज पौडेल

विराटनगर । ११ महीनापछि भारतको जोगवनी नाकाबाट चार किलोमीटरनजिक रहेको मिरगञ्ज पुल सञ्चालनमा आएको छ । साविकको पुल भासिएपछि बनेको नयाँ आरसीसी मोटरेबल पुल सञ्चालनमा आएको हो ।

अब भारतलगायत तेस्रो मुलुकबाट आउने औद्योगिक कच्चा पदार्थलगायत सामग्री बोकेका ढुवानी साधनले विराटनगर भन्सार आइपुग्न तय गर्नुपर्ने दूरी ११६ किलोमीटरले छोटिएको छ । यसबाट व्यवसायीको समय र पैसा दुवै बचत हुनेछ भने व्यवसायको लागत पनि केही कम हुनेछ ।

पुल सञ्चालन नहुँदासम्म जोगवनी नाकाबाट चार किलोमीटर पर आइसकेका ढुवानी साधन सुनसरीको भण्टाबारी नाकाबाट घुमेर विराटनगर भन्सार ल्याउनुपथ्र्यो । पुल नहुँदा दैनिक औसत ६८ ओटा मालवाहक साधन घुमेर आइरहेकोमा बुधवार १६८ ओटा भारतको जोगवनी र नेपालको रानीमा बनेको नेपाल–भारत एकीकृत जाँच चौकी (आईसीपी) बाट नेपाल प्रवेश गरेका छन् । घुम्न नपर्दा एउटा ट्रक/कन्टेनरको १६ हजार रुपैयाँ ढुवानी भाडा जोगिने व्यवसायीको भनाइ छ ।

विराटनगर भन्सार कार्यालयका सूचना अधिकारी रामचन्द्र ढुंगानाले उक्त एकीकृत जाँच चौकीबाट बुधवारदेखि मालवाहक साधन आउन थालेको पुष्टि गरे । भन्सार प्रमुख ताराप्रसाद सापकोटाले मिरगञ्जको पुल आधिकारिक रूपमा सञ्चालनमा आउन बाँकी भए पनि मालवाहक गाडी आईसीपी हुँदै आएको र तिनको संख्या बढेको बताए । मिरगञ्ज पुल भासिँदा १० महीनामा विराटनगर भन्सारबाट हुने कारोबार १८ अर्ब ७५ करोडले घटेको थियो । सुनसरीको भण्टाबारी नाकाबाट घुमाएर ल्याउँदा १० महीनामा व्यवसायीले ९ करोड ६० लाख बराबर अतिरिक्त ढुवानी भाडा तिरेका छन् ।

मोरङ व्यापार संघका अध्यक्ष नवीन रिजाललगायत कार्यसमितिले पुल सञ्चालनमा ल्याउन निकै मेहनत गरेको थियो । संघका महानिर्देशक कृष्ण रेग्मीले मिरगञ्ज पुल सञ्चालनमा आएपछि ढुवानी भाडा कटौती हुँदा औद्योगिक उत्पादनको लागत घट्ने बताए । ढुवानीको समय पनि छोटिने उनले बताए ।

भारतको ल्यान्ड पोर्ट अथोरिटीको जोगवनी कार्यालयका प्रमुख रत्नाकर यादवले मिरगञ्ज पुल तयार भई मालवाहक सवारीसाधनका लागि खोल्न मिल्ने देखिएपछि मंगलवार रातिदेखि आईसीपीबाटै आवतजावतको अनुमति दिएको बताए । पुल र फ्लाइओभरको केही काम बाँकी रहे पनि मालवाहक सवारी आवतजावतमा समस्या नहुने भएपछि लामो यात्रा तय गर्नुभन्दा छोटो बाटो खुला गरिएको उनको भनाइ छ । औपचारिक रूपमा दुवै भन्सार कार्यालयलाई पत्राचार हुन बाँकी रहे पनि अब भीमनगर–भण्टाबारी नाकाबाट ढुवानी साधन आउनजान बन्द हुने र एकीकृत जाँच चौकीबाटै आउजाउ शुरू हुने उनले जानकारी दिए । उनले मंगलवार राति १६० भन्दा बढी मालवाहक साधन नेपाल भन्सारतर्फ प्रवेश गरेको जानकारी दिए ।

राजस्व संकलनमा कमी
सुनसरीको भन्टाबारी नाकाबाट घुमाएर ल्याउनुपर्दा व्यापारमा २५ प्रतिशतले गिरावट आएको अधिकारीहरूको भनाइ छ । पुल भासिनुअघिसम्म विराटनगर भन्सार कार्यालयले दैनिक १४ करोड ५० लाख राजस्व संकलन गर्दै आएको थियो । पुल भासिनु, भारतसँगको उधारो व्यापार बन्द हुनु र आर्थिक मन्दीलगायत कारण अहिले दैनिक १० करोड मात्र राजस्व संकलन भइरहेको छ ।

विराटनगर भन्सारका प्रमुख सापकोटाका अनुसार २०७८ पुस २२ गते मिरगञ्जको पुल भासिएपछि विराटनगर नाकाको व्यापार २५ प्रतिशत घटेको हो ।

यहाँबाट हुने व्यापार मेची भन्सारतिर सरेको थियो । चार किलोमीटर पर आइसकेको सामान फेरि ११६ किलोमीटर घुमाएर जाँचपासका लागि विराटनगर भन्सार ल्याउनुपर्ने र त्यसो गर्दा ढुवानी भाडा बढी पर्ने भएकाले कतिपय व्यवसायीले सामान मगाउन कम गर्दा पनि कारोबारमा कमी आएको उनको भनाइ छ ।

पुल भासिनुअघि दैनिक ४ सय गाडी सामान विराटनगर भन्सारबाट जाँचपास हुन्थ्यो । अहिले दैनिक २०० हाराहारीको मात्र जाँचपास हुने गरेको भन्सार प्रमुख सापकोटाले जानकारी दिए । पुल भासिएयताको १० महीनामा १८ अर्ब ७५ करोडले विराटनगर भन्सारबाट हुने कारोबारमा कमी आएको उनको भनाइ छ ।

२०७२ सालमा आएको बाढीले पनि मिरगञ्ज पुल भासिएको थियो । त्यो बेलामा पनि जोगवनी नाकाबाट हुने आयातनिर्यात ६ महीनासम्म वीरपुर नाका हुँदै सुनसरीको भन्टाबारी नाकाबाट गरिएको थियो । त्यसबेला भारतले पुल मर्मत गरेर पूर्ण भारवहन क्षमतामा सञ्चालन गरेको थियो ।

प्रतिक्रिया [0]