बेनीमा सार्वजनिक जग्गा अतिक्रमण गरी घर टहरा निर्माण

अभियान संवाददाता ध्रुवसागर शर्मा

म्याग्दी । म्याग्दीको बेनी नगरपालिकामा सार्वजनिक जग्गा, पुल, सडक,  खोल्सा र गुठी जग्गा अतिक्रमण गरी घर टहरा निर्माण गरिएको पाइएको छ । सार्वजनिक जग्गा अतिक्रमण गरेर व्यक्तिगत प्रयोजनका लागि घर टहरा निर्माण गरेको पाइएको हो ।

बेनी नगरपालिका–२ हाडेभीरको सार्वजनिक जग्गा लिएर कृषि औजार कारखाना चलाउनुका साथै टहरा बनाएर अन्य व्यवसायीलाई भाडामा लगाइएको छ । खाद्य संस्थानबाट किनेको जग्गा र बेनी नगरपालिकालाई दिएको चार आना जग्गाको भवन पनि व्यक्तिको नाममा छ ।

अतिक्रमित जग्गा खाली गर्न अख्तियारले निर्देशन दिएको छ । यद्यपि गलेश्वरको रिभरसाइड होटल र हाडेभीरमा कुलदीप जुग्जालीले मोटरेबल पुल नै अतिक्रमण गरेर बनाएको टहरा हटाउन बेवास्ता गरिएको छ ।

बेनीको क्याम्पस चोक र कालीपुल क्षेत्रका अधिकांश घर सार्वजनिक जग्गामा बनेका छन् । बेनी अस्पतालको जग्गा मिचेर न्यू वेष्ट प्वाइन्ट आवासीय माविले सडक बनाएको छ । कालीपुलस्थित बालमन्दिर आधारभूत विद्यालयको जग्गा र नगरपालिका भवन पछाडिको जग्गा सुकुमबासी र अव्यवस्थित बसोवासीबाट अतिक्रमण भएको छ । पर्वत–बेनी जोड्ने झोलुंगे पुल र न्यूरोड पछाडिको प्रकाश माविको जग्गा पनि अतिक्रमण भएको छ ।

बेनी नगरपालिकामा जनप्रतिनिधि निर्वाचित हुनेबित्तिकै नगर क्षेत्रको सार्वजनिक जग्गाको पहिचान र संरक्षण गर्ने निर्णय गरिएको थियो । अख्तियार दुरुपयोग अनुसन्धान आयोग र अदालतले अतिक्रमित जग्गामा बनेका भौतिक संरचना हटाउन गरेको निर्देशन तथा फैसला कागजमै सीमित भएको छ ।

बेनी बजारमा सडकको क्षेत्राधिकारमा निर्माण भएका संरचना हटाउन प्रशासन, सुरक्षा निकाय र नगरपालिकाको टोलीले नापजाँच गर्दै हटाउन अनुरोध गर्दै आएको छ । पछिल्लो समय बेनी नगरपालिकाले त्यस्ता संरचना हटाउन ३५ दिने सूचना समेत जारी गरेको मेयर सुरत केसीले बताए ।

त्यसैगरी बेनी नगरपालिका–२ ज्यामरुककोटस्थित ऐतिहासिक कोत (खड्गभवानी)को बगरफाँटमा अवस्थित गुठी जग्गा पनि अतिक्रमण गरिएको छ । जग्गा अतिक्रमणबारे पटकपटक जानकारी गराउँदा पनि सम्बन्धित निकाय मौन रहेको गुठियारहरूले बताएका छन् ।

खड्गभवानी कोतको नाममा जग्गाधनी प्रमाणपुर्जा रहेको करीब ३३ रोपनी जग्गामध्ये २० रोपनी जग्गा ज्यामरुककोटको भकुन्डे क्षेत्र र १२ रोपनी ६ आना जग्गा बगरफाँटको कुरुङदीमा रहेको खड्गभवानी कोत पूजा एवं गुठी व्यवस्थापन समितिका अध्यक्ष रामकृष्ण घिमिरेले बताए ।

प्रतिक्रिया [0]