आधुनिक प्रविधि प्रयोगले हिउँदे तरकारीमा आत्मनिर्भर बन्दै म्याग्दीका किसान

२०७९ पुस, १५

समाचार

म्याग्दी। म्याग्दीका किसान हिउँदे तरकारीमा आत्मनिर्भर बन्दै गएका छन् । हिउँदे तरकारीखेतीमा यहाँका किसानको आकर्षण बढेपछि परनिर्भरता पनि घट्दै गएको हो ।

तरकारीखेती म्याग्दीको बेनी नगरपालिकासहित मंगला र अन्नपूर्ण गाउँपालिकाका किसानको आम्दानीको मुख्य स्रोत बनेको छ । यस वर्ष बेनी नगरपालिका, मंगला र अन्नपूर्ण गाउँपालिकाका विभिन्न क्षेत्रमा करीब १३ हजार हेक्टर क्षेत्रफलमा तरकारीखेती गरिएको छ ।

विगत वर्षहरूमा सोही क्षेत्रका स्थानीयले किनेर तरकारी उपभोग गर्दै आएका थिए । तर केही वर्षयता यहाँका किसानले उत्पादन गरेको तरकारीले स्थानीय माग पूरा गरेको मात्र छैन, बाहिर निकासी समेत हुने गरेको छ ।

हिउँदे तरकारीखेतीका लागि परिचित पश्चिमी र उत्तरी म्याग्दीका विभिन्न भू–भागहरूमा किसानले काउली, ब्रोकाउली, आलु, सिमी, गोलभेडा र खुर्सानी खेती गरेको कृषि ज्ञान केन्द्र म्याग्दीले जानकारी दिएको छ ।

म्याग्दीका विभिन्न स्थानमा यस वर्ष गरिएको काउली, बन्दागोभी, गोलभेडा, खुर्सानीलगायत तरकारीखेतीबाट करीब ४ करोड रुपैयाँ आम्दानी हुने अनुमान गरिएको केन्द्रले बताएको छ । जिल्लाका विभिन्न क्षेत्रमा उत्पादन भएका तरकारी सदरमुकाम बेनीका साथै गलेश्वर, दरबाङ, तातोपानी, पोखरेबगरलगायत बजारमा विक्री गरिँदै आएको छ ।
विगतमा परम्परागत रूपमा गरिने अन्नबालीको तुलनामा आधुनिक तरकारीखेतीबाट बढी आम्दानी हुने र जीविकोपार्जनमा समेत सहज हुने स्थानीय किसान बताउँछन् । अन्नपूर्ण पदमार्गले छोएको म्याग्दीको अन्नपूर्ण गाउँपालिकाका साथै रघुगंगा, मालिका, मंगला, धवलागिरि गाउँपालिका र बेनी नगरपालिकाका दर्जनभन्दा बढी गाउँका ३ हजारभन्दा बढी स्थानीयले व्यावसायिक तरकारी तथा फलफूल खेती गरेर मनग्गे आम्दानी गर्दै आएका छन् ।

२ लाख २९ हजार ७०६ हेक्टर क्षेत्रफलमा फैलिएको म्याग्दीमा ३० हजार ८५६ हेक्टर जमीन मात्र खेतीयोग्य रहेको कृषि ज्ञान केन्द्र म्याग्दीले बताएको छ । १ लाख १३ हजार ६४१ जनसंख्या रहेको जिल्लामा ३२ प्रतिशत कृषिमा आत्मनिर्भर छन् ।

अन्नपूर्ण गाउँपालिकाका हिस्तान दोसल्ले, राम्चे, मंगला गाउँपालिकाका बाबियाचौर, अर्मन, बरंजा, कुँहू, धवलागिरि गाउँपालिकाको ताकम, मालिका गाउँपलिकाका बीम, दरबाङ, ओखरबोट, रघुगंगा गाउँपालिकाका पिप्ले, भगवती, बेग, झीँ, पात्लेखेत र बेनी नगरपालिकाका रत्नेचौर, ज्यामरुककोट, भकिम्ली, सिंगालगायत गाउँका अधिकांश बासिन्दा कृषिबाटै स्वरोजगार बनेका छन् । यी गाउँमा वार्षिक ५ करोड रुपैयाँभन्दा बढीको तरकारी उत्पादन हुने गरेको जिल्ला कृषि ज्ञान केन्द्रको तथ्यांक छ ।