गठबन्धनबाट बाहिरिएर कांग्रेस–एमाले समीकरण : कोशी प्रदेशको आठौं मुख्यमन्त्रीमा केदार कार्की

वेदराज पौडेल

विराटनगर। नेकपा माओवादी लगायत दलसँगको गठबन्धन तोड्दै कोशी प्रदेशमा नेकपा एमालेको सहयोगमा नेपाली कांग्रेसका सांसद केदार कार्की मुख्यमन्त्री नियुक्त भएका छन् । शनिवार एमालेका ३९ र नेपाली कांग्रेसका ८ जना सांसदको समर्थनमा उनी मुख्यमन्त्री भएका हुन् । उनी र मन्त्रीमण्डलका केही सदस्यको शपथ ग्रहण आज (आइतवार) हुनेछ ।

शुक्रवार नै कार्की र माओवादीका संसदीय दलका नेता इन्द्रबहादुर आङ्बोले मुख्यमन्त्रीमा दाबी पेश परेका थिए । त्यसपछि शनिवार दुवैलाई प्रदेश प्रमुखको कार्यालयमा गएर हस्ताक्षर सनाखत गरी आफ्नो पक्षमा बहुमत सिद्ध गर्न सूचना जारी गरिएको थियो । सोहीअनुसार शनिवार कार्कीले बहुमत सिद्ध गरेका हुन् । कोशी प्रदेशमा ९३ सांसद छन् ।

कोशी प्रदेशको प्रदेशसभामा मोरङको क्षेत्र नं ६ को २ बाट प्रदेशसभामा दोस्रोपटक नेपाली कांग्रेसबाट निर्वाचित सांसद कार्की प्रदेशसभामा सक्रिय सांसदमध्ये पर्छन् । शुक्रवार प्रदेश प्रमुख परशुराम खापुङले आह्वान गरेबमोजिम बहुसंख्यक सांसदको हस्ताक्षर बुझाउँदै कार्कीले मुख्यमन्त्रीको दाबी पेश गरेका थिए । शनिवार सांसदहरूले आफ्नो पक्षमा हस्ताक्षर सनाखत गरेपछि कार्कीले मुख्यमन्त्रीमा नियुक्ति पाएका हुन् । उनले अबको एक महीनाभित्र प्रदेशसभाबाट विश्वासको मत लिनुपर्नेछ ।

कोशीमा यसअघि विश्वासको मत नपाउने अवस्था बनेपछि असोज २० गते एमालेका हिक्मत कार्कीले मुख्यमन्त्रीबाट राजीनामा दिएका थिए । उनी ३० दिनमै मुख्यमन्त्रीबाट बिदा भएका थिए ।

केन्द्रीय गठबन्धनले मुख्यमन्त्री बनाउन सिफारिश गरेका माओवादी केन्द्रका नेता आङ्बोले पनि दाबी पेश गरेका थिए । तर, कांग्रेसका २९ मध्ये आठ सांसदले प्रदेश प्रमुखको कार्यालयमा आफूहरूको समर्थन कार्कीलाई रहेको भन्दै हस्ताक्षर सनाखत गरेपछि आङ्बो पक्ष गएन ।

कोशीमा यसअघि विश्वासको मत नपाउने अवस्था बनेपछि असोज २० गते एमालेका हिक्मत कार्कीले मुख्यमन्त्रीबाट राजीनामा दिएका थिए । उनी ३० दिनमै मुख्यमन्त्रीबाट बिदा भएका थिए । त्यसअघि मुख्यमन्त्री रहेका उद्धव थापाले भदौ ४ मा लिएको विश्वासको मत संविधानसम्मत नदेखिएपछि सर्वोच्च अदालतले भदौ २१ मा कोशीमा संविधानको धारा १६८ को उपधारा ३ अनुसार सबैभन्दा ठूलो दलको नेतृत्वमा सरकार गठन गर्न परमादेश दिएको थियो ।

सर्वोच्चको परमादेशपछि भदौ २२ मा एमाले नेता कार्की दोस्रोपटक प्रदेशको मुख्यमन्त्री बनेका थिए । प्रदेशसभा गठनको १० महीनामा कोशीमा सरकार निर्माणको सबै संवैधानिक प्रावधान प्रयोग भएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस