चितवन। तिहारअघि नै बारीमा सयपत्री फूल ढकमक्क फुलेपछि चितवनका फूलखेती किसान चिन्तित भएका छन् । अघिल्लो वर्ष यही समयमा परेको तिहारमा फूल बेचेका किसान यो वर्ष कात्तिक अन्तिम साता मात्र तिहार परेकाले फूल खेर जाने चिन्तामा रहेका हुन् । अघिल्ला वर्ष फूलखेतीको माग अत्यधिक देखेर अहिले नयाँ किसानले पनि फूलखेती शुरू गरेका छन् । तिहारलार्ई लक्षित गरेर फूलखेती गरेका किसानका बारीमा अहिले सबैजसो फूल फुलेका छन् ।
भरतपुर महानगरपालिका–२६ का दिपक पाख्रिन तिहारअगावै फूल फुलेपछि आफू चिन्तित रहेको बताउँछन् । ‘तिहार आएकैछैन, अहिले नै फूल फुल्यो,’ उनले भने, ‘माग पनि आएको छैन । यसपालि फूल ओइलाएर जाला जस्तो छ ।’
पाख्रिनले अहिले चार बिघामा कलकत्ते, टेनिस, अरेन्जबल जातका सयपत्री र थप दुई बिघामा अन्य जातका फूल लगाएका छन् । सयपत्री फूल बाह्रैमास विक्री गर्ने भए पनि तिहार लक्षित फूल भने चाँडै फुल्दा खेर जाने चिन्ता भएको उनले बताए । ‘फुलेका फूल अहिले नै टिपौं, विक्री नहोला भन्ने डर, नटिपौं तिहारसम्म ओइलाउला कि भन्ने चिन्ता ।’
कतिपय किसानले चाँडै रोप्दा तिहारअघि नै फूल फुलेको उनले बताए । किसानका अनुसार कलकत्ते जातको सयपत्री रोपेको ५५ दिनमा र टेनिस जातको सयपत्री ४५ दिनमा फुल्न शुरू गर्छ । सय दिनसम्ममा फूल फुलेर तयार हुन्छ । भरतपुर महानगरपालिका–७ स्थित उज्ज्वल नर्सरीका सञ्चालक ईश्वर श्रेष्ठ यस वर्ष फूल चाँडै फुलेको र उत्पादन पनि दोब्बरजसो भएको बताउँछन् । उनले डेढ बिघा क्षेत्रफलमा फूल लगाएका छन् । तिहारअघि नै फूल फुलेकाले टिपेर फाल्नुपरेको उनको भनाइ छ । ‘अहिले फूल ठूलो आकार र पूर्ण रूपमा फक्रेको छ,’ उनले भने, ‘यो फूल टिपेर फालिएन भने नयाँ फूल फुल्दैन ।’ हाल आफूले फूल टिपेर राखेको, तर माग नआएको उनले बताए । सयपत्री फूल धेरै दिनसम्म भण्डारण गर्न नसकिने किसान बताउँछन् । ‘यो फूल धेरैमा १० दिनसम्म शीतभण्डार गर्न सकिन्छ, त्यसपछि काम लाग्दैन,’ भरतपुर–२३ की किसान सुजाता देवकोटाले भनिन् । बाह्रैमास फूलखेती गर्ने किसानले समय हेरेर फूल लगाए पनि अधिकांश किसानले फूल रोप्न हतार गरेकाले तिहारअघि नै फूलेको उनको भनाइ छ ।
लामो समयदेखि फूलखेती गर्ने किसानले समय हेरेर फूल लगाएकाले धेरै फूल खेर नगए पनि तिहार लक्षित फूलखेती गरेका किसानको लगानीमा भने जोखिम रहेको फ्लोरिकल्चर एशोसिएसन चितवनका सचिव सुलभ श्रेष्ठले बताए । अघिल्ला वर्षहरूमा जस्तै अधिकांश किसानले असारमै फूल रोप्दा असोजमा फूलेको उनले बताए । यस वर्ष फूल उत्पादन राम्रो भए पनि बजार नहुँदा किसानहरू चिन्तित बनेको उनको भनाइ छ ।