भन्सार छलीको सामानबाट रू. ४२ करोडभन्दा बढी राजस्व असुली

अभियान संवाददाता

जनकपुरधाम। मधेश प्रदेशमा भन्सार छलेर भित्त्याइएका सामानबाट चालू आर्थिक वर्ष २०८०/८१ को पहिलो चार महीनामा प्रहरीले रू. ४२ करोड ३६ लाख ७० हजार रुपैयाँ संकलन गरेको छ । मधेश प्रदेशका आठओटै जिल्लाका सीमा नाकाबाट भन्सार छलेर ल्याइएका सामानबाट उक्त परिणाममा राजस्व असुल गरिएको मधेश प्रदेश प्रहरी कार्यालय, जनकपुरधामका प्रहरी उपरीक्षक श्यामकुमार महतोले जानकारी दिए ।

प्रहरीका अनुसार सप्तरीबाट रू. १ करोड ४३ लाख २२ हजार रुपैयाँ संकलन गरिएको छ । यसैगरी सिरहाबाट रू. १ करोड २१ लाख ७९ हजार, धनुषाबाट रू. १ करोड ११ लाख ५७ हजार र महोत्तरीबाट रू. ४ करोड २९ लाख २४ हजार रुपैयाँ राजस्व संकलन भएको छ । त्यस्तै सर्लाहीबाट रू. २ करोड ६४ लाख ४२ हजार, रौतहटबाट रू. २ करोड २८ लाख ९४ हजार, बाराबाट रू. १३ करोड ५ लाख ३१ हजार र पर्साबाट रू. १६ करोड ३२ लाख २१ हजार रुपैयाँ राजस्व संकलन गरिएको मधेश प्रदेश प्रहरी कार्यालयले जानकारी दिएको छ ।

भन्सार छलेर भित्त्याइएका सामानहरूमा विद्युतीय सामग्री, सवारीसाधनका पाटपुर्जा, लत्ताकपडा, शृंगारका वस्तु र चाँदी रहेका छन् । तस्करले भन्सार छलेर ल्याएका सामान जफत गरी कारबाही गर्दा उक्त राजस्व संकलन भएको प्रहरी उपरीक्षक महतोले बताए । मधेश प्रदेशमा तस्करी रोक्न सीमा नाकामा थप कडाइका लागि प्रहरी गस्ती बढाइने उनको भनाइ छ ।

प्रतिक्रिया [0]