बजेट कार्यान्वयनमा लाग्न मुख्यमन्त्री कार्कीको निर्देशन

अभियान संवाददाता

विराटनगर। खर्च गर्ने क्षमता बढाउँदै चालू आर्थिक वर्षको बजेटको सफल कार्यान्वयनमा लाग्न कोशी प्रदेशका मुख्यमन्त्री केदार कार्कीले निर्देशन दिएका छन् । मुख्यमन्त्री कार्कीले प्रदेश मन्त्रालयका सचिवहरूसँग सोमवार छलफल गरी चालू आर्थिक वर्षको बजेट कार्यान्वयन प्रभावकारी बनाउन निर्देशन दिएका हुन् ।

‘अब बजेट कार्यान्वयनमा ढिलासुस्ती गर्ने कुनै पनि बहाना छैन । बजेट कार्यान्वयन गर्न ऐन, कार्यविधि, नियमावली जे जे बाधक बनेका छन्, ती सबै संशोधन गर्न वा नयाँ बनाउन परे पनि सरकार तयार छ,’ कार्कीले भने । जनताको काम गर्न अलमल गर्ने छूट कसैलाई नभएको भन्दै उनले वातावरणमैत्री विकास प्रदेश सरकारको प्राथमिकता भएको बताए । 

उनले भने, ‘सेवाग्राहीलाई प्राथमिकतामा राख्दै जनमुखी विकासमा जोड दिनुपरेको छ । खर्च गर्ने क्षमता बढाएर सुशासन कायम गर्दै अगाडिका चुनौती समाधान गर्नुपर्दछ ।’ सेवा प्रवाह छिटो, छरितो र गुणस्तरीय बनाउन सुधार गर्ने, जनसेवा, नागरिक अधिकारको रक्षा र सुशासन कायम गर्ने, निकायगत समन्वय कायम गरी कामलाई गति दिने नीति सरकारको भएको उनले बताए ।

छलफलमा प्रदेशका प्रमुख सचिव दीपककुमार काफ्लेले सबै मन्त्रालय तथा निकायले १० दिनभित्र बजेट कार्यान्वयन कार्ययोजना निर्माण गरी मुख्यमन्त्री कार्यालयमा पेश गर्ने र सोही कार्ययोजना अनुसार कार्यान्वयन गर्ने बताए । ‘संविधान, प्रचलित कानून तथा प्रदेश आर्थिक ऐनले पहिचान गरेका प्रदेशको अधिकार क्षेत्रभित्रका राजस्वका क्षेत्रहरूबाट अनुमान गरेको राजस्व संकलन गर्न सबै संयन्त्र अनुशासित ढंगले क्रियाशील हुनुपर्छ,’ उनले भने । 

प्रतिक्रिया [0]