विप्लव र प्रकाण्डसहितका नेताविरुद्ध पक्राउ पुर्जी जारी

अभियान संवाददाता

काठमाडौं। नेपाल कम्युनिष्ट पार्टीका महासचिव नेत्रविक्रम चन्द (विप्लव) र प्रवक्ता खड्गबहादुर विश्वकर्मा (प्रकाण्ड)सहितका प्रमुख नेताहरूविरुद्ध जिल्ला अदालत, काठमाडौंले पक्राउ पुर्जी जारी गरेको छ । उनीहरूविरुद्ध जिल्ला अदालत काठमाडौंमा राज्यविरुद्धको कसुरमा ४ वर्षअघि मुद्दा दायर भएको थियो । अदालतको सूचनामा उल्लेख भएअनुसार २०८० मङ्सिर १० गतेको आदेशअनुसार मुलुकी फौजदारी कार्यविधि संहिता २०७४ को ५८ (१३) बमोजिम ३५ दिनको पक्राउ पुर्जी जारी गरिएको अदालतको सूचनामा उल्लेख छ । विप्लव र प्रकाण्डसहित माइला लामा, अखिल नेपाल किसान महासंघ क्रान्तिकारीका अध्यक्ष राजु कार्कीविरुद्ध पक्राउ पुर्जी जारी भएको हो । पक्राउ पुर्जीको सूचना प्रकाशित भएको मितिले बाटोको म्यादबाहेक ३५ दिनभित्र आफूसँग भएको सबुत प्रमाणसहित आफै उपस्थित हुन सूचनामा भनिएको छ । म्याद गुजारी बसेमा मुद्दा कानूनबमोजिम हुने र पछि उजुरबाजुर नलाग्ने पनि उल्लेख छ । २०७६ असोज ९ गते उनीहरूविरुद्ध मुद्दा दायर भएको थियो । 

प्रतिक्रिया [0]