कृषि समाचार सम्प्रेषण सम्बन्धी अभिमुखीकरण

अभियान संवाददाता

विराटनगर। नेपाल उद्योग वाणिज्य महासंघ, कोशी प्रदेशको आयोजनामा कोशी प्रदेशका पत्रकारहरूलाई कृषि समाचार सम्प्रेषण सम्बन्धी अभिमुखीकरण गरिएको छ । कार्यक्रममा महासंघ, कोशी प्रदेशका अध्यक्ष राजेन्द्र राउतले प्रदेशको स्थानीय उत्पादनको प्रवर्द्धन, रोजगारी सृजना गर्न र उद्योगी व्यवसायीको व्यावसायिक क्षमता विकासका लागि महासंघले विभिन्न कार्यक्रम सञ्चालन गरिरहेको जानकारी दिए । राज्य पुन:संरचनापछि कृषिको विकासका लागि केन्द्र, प्रदेश र स्थानीय सरकारबाट विभिन्न कार्यक्रम सञ्चालनमा रहे पनि अपेक्षित उपलब्धि हासिल हुन नसक्दा दिनप्रतिदिन परनिर्भरता बढ्दै गएको राउतले बताए । यो अवस्थामा राज्यको चौथो अंगको रूपमा रहेको पत्रकारिता क्षेत्रले कृषि क्षेत्रका मुद्दालाई बहसमा ल्याउनुपर्नेमा उनले जोड दिए । कार्यक्रममा कोशी प्रदेशमा कृषि, पशुपालन क्षेत्रको व्यवसायीकरणको वर्तमान अवस्था, कोशी प्रदेश सरकारको कृषि तथा पशुपालन विकासका कार्यक्रम, मिडिया प्रवर्द्धन अवसरका लागि कृषि मूल्य शृंखलाका मुख्य मुख्य क्षेत्र र मुद्दाबारे उद्योग कृषि तथा सहकारी मन्त्रालयका वरिष्ठ अधिकृत पशुपति पोखरेलले कार्यपत्र प्रस्तुत गरेका थिए । नेपाल पत्रकार महासंघ, कोशी प्रदेशका महासचिव विवेश गौतमले यो कार्यक्रमले पत्रकार र कृषि क्षेत्रका समाचारका मुद्दाबीच सेतुको काम गर्ने धारणा राखे । नेपाल कृषि बजार विकास कार्यक्रम (सहज)को सहयोगमा आयोजित कार्यक्रममा कोशी प्रदेशका विभिन्न जिल्लाका सञ्चारमाध्यममा कार्यरत ४५ जना पत्रकारको सहभागिता थियो ।

प्रतिक्रिया [0]