बीमा कम्पनीको व्यवसाय घट्दो

अभियान संवाददाता

काठमाडौं। आर्थिक गतिविधिमा आएको कमीसँगै बीमा कम्पनीको व्यवसाय निरन्तर घट्न थालेको छ । बैंक, वित्तीय संस्थाको कर्जा प्रवाह, व्यापार व्यवसायका साथै व्यक्तिको आम्दानी समेत घटेपछि बीमा व्यवसायमा असर देखिएको हो । 

नेपाल बीमा प्राधिकरणका अनुसार चालू आर्थिक वर्षको कात्तिकसम्ममा निर्जीवन बीमा कम्पनीहरूको व्यवसाय अघिल्लो वर्षको सोही अवधिको तुलनामा ४ दशमलव ५७ प्रतिशतले घटेको छ । गत आर्थिक वर्षको कात्तिकसम्ममा निर्जीवन बीमा कम्पनीहरूले कुल १३ अर्ब ३५ करोड रुपैयाँ बीमाशुल्क संकलन गरेकोमा चालू आर्थिक वर्षको सोही अवधिमा १२ अर्ब ७४ करोड रुपैयाँ मात्र संकलन गरेका छन् । चालू आर्थिक वर्षमै पनि निर्जीवन बीमा कम्पनीको व्यवसाय निरन्तर घटिरहेको छ । चालू आर्थिक वर्षको साउनमा निर्जीवन बीमा कम्पनीहरूले नयाँ बीमालेख विक्री र नवीकरणबाट ३ अर्ब ९८ करोड रुपैयाँ बीमाशुल्क संकलन गरेकोमा कात्तिकमा २ अर्ब २९ करोड रुपैयाँ मात्र संकलन गरेका छन् । 

कात्तिकमा निर्जीवन बीमा कम्पनीहरूले २ लाख १० हजार बीमालेख विक्री गरेका छन् । गत साउनदेखि कात्तिकसम्ममा उनीहरूले ८ लाख ९४ हजार बीमालेख जारी गरेका छन् । अघिल्लो वर्षको तुलनामा यस अवधिमा विक्री भएको बीमालेखको संख्या पनि घटेको छ । जीवन बीमा कम्पनीहरूको व्यवसायमा भने सामान्य वृद्धि देखिएको छ । गत आर्थिक वर्षको कात्तिकसम्ममा जीवन बीमा कम्पनीहरूले बीमालेख विक्री र नवीकरणबाट ४६ अर्ब रुपैयाँ बीमाशुल्क संकलन गरेकोमा यसपालि सोही अवधिमा बढाएर ४९ अर्ब ४४ करोड रुपैयाँ पुर्‍याएका छन् । 

चालू आर्थिक वर्षको साउनको तुलनामा भने जीवन बीमा कम्पनीहरूको पनि व्यवसाय घटिरहेको छ । गत साउनमा उनीहरूले नयाँ बीमालेख तथा पुरानो नवीकरणबाट १९ अर्ब ६० करोड रुपैयाँ बीमाशुल्क संकलन गरेकोमा कात्तिकमा ८ अर्ब ६३ करोड रुपैयाँमा खुम्चिएको छ । आर्थिक मन्दीसँगै बैंक, वित्तीय संस्थाको कर्जा प्रवाह घट्नुका साथै व्यावसायिक गतिविधि प्रभावित भएपछि बीमा कम्पनीको व्यवसायमा असर परेको हो । बैंकको ऋण लिनका लागि बीमा अनिवार्य भएकाले ऋण लगानी नहुँदा बीमा कम्पनीको व्यवसायमा पनि असर परेको छ । त्यस्तै आर्थिक गतिविधिमा कमी आउँदा सर्वसाधारणको आम्दानी समेत घटिरहेको छ । आम्दानी घटेपछि बीमा गर्नेको संख्या घटेको बताइन्छ । बरु बीमा कम्पनीहरूमा बीमालेख ‘सरेन्डर’ गर्नेको संख्या बढिरहेको देखिन्छ । 

प्रतिक्रिया [0]