बाँडफाँटको झन्डै ५ वर्षपछि त्रिशूली जलविद्युत्को शेयर कारोबार

अभियान संवाददाता

काठमाडौं। २०७५ चैत १४ गते सर्वसाधारणलाई बाँडफाँट भएको त्रिशूली जलविद्युत् कम्पनीको शेयर बिहीवारबाट दोस्रो बजारमा किनबेच शुरू भएको छ । सर्वसाधारणमा शेयर बाँडफाँट भएको करीब ५ वर्ष वर्षपछि दोस्रो बजारमा कारोबार शुरू भएको हो । कम्पनीले जनताको जलविद्युत् कार्यक्रमअन्तर्गत सर्वसाधारणमा २०७५ चैत ७ गतेदेखि ११ गतेसम्म शेयरको प्रारम्भिक निष्कासन तथा विक्री गरेको थियो । कम्पनीले १ लाख ५४ हजार ५५९ सर्वसाधारणलाई शेयर बाँडफाँट गरेको थियो । 

त्यस बेला सर्वसाधारणबाट प्रतिशेयर १० रुपैयाँ मात्र असुल गरेको कम्पनीले बाँकी ९० प्रतिशत रकम २०७९ असोज ४ देखिदेखि संकलन गरेको थियो । कम्पनीले बाँकी रकम संकलनका लागि २०७९ कात्तिक १७ गतेसम्मको मिति तय गरे पनि सो अवधिमा लक्ष्यअनुरुप रकम संकलन नभएपछि २०७९ फागुन १७ गतेसम्म म्याद थप गरेको थियो । कम्पनीले शुरूमा संकलित १० रुपैयाँले आर्जन गरेको ब्याज घटाएर प्रतिकित्ता ८७ रूपैयाँका दरले थप रकम संकलन गरेको थियो । सो समयमा करीब ७ करोड रूपैयाँ मात्र संकलन भएको कम्पनीले जानकारी दिएको छ ।

पहिलो कारोबार दिनमै १० प्रतिशत मूल्यवृद्धि

बाँकी रकम संकलनमा ढिलाइ हुँदा कम्पनीको धितोपत्र सूचीकरण पछाडि धकेलिएको बताइएको छ । कम्पनीले मङ्सिर १२ गते संस्थापकतर्फको समेत गरी कुल १ करोड ८५ लाख २५ हजार कित्ता शेयर धितोपत्रको दोस्रो बजारमा सूचीकृत गरेको थियो । 

सर्वसाधारणतर्फ कर्मचारी समेतमा वितरण भएको ३७ लाख ५ हजार कित्ता र संस्थापकतर्फ कायम रहेको १ करोड ४८ लाख २० हजार कित्ता शेयर कम्पनीले दोस्रो बजारमा सूचीकृत गराएको हो । टीभीसीएल स्टक संकेतबाट सूचीकृत भएको कम्पनीको शेयर आठ दिनपछि कारोबार भएको हो । पहिलो कारोबार दिनमा कम्पनीको शेयरमूल्य १० प्रतिशत बढेको छ । नेपाल स्टक एक्सचेन्ज लिमिटेड (नेप्से) ले पहिलो कारोबारका लागि ८९ देखि २६८ रूपैयाँ १४ पैसासम्मको मूल्य रेन्ज तोकेको थियो । कम्पनीको पहिलो शेयर कारोबार अधिकतम मूल्यमै भएको नेप्सेले जानकारी दिएको छ । 

प्रतिक्रिया [0]