आयोजना बैंक व्यवस्थापन सूचना प्रणालीसम्बन्धी अभिमुखीकरण

अभियान संवाददाता

विराटनगर। स्थानीय तहमा आयोजना बैंक व्यवस्थापन सूचना प्रणालीसम्बन्धी एकदिने अभिमुखीकरण कार्यक्रम सम्पन्न भएको छ । विराटनगर महानगरपालिकाको सभाहलमा आयोजित कार्यक्रममा आयोजना बैंक व्यवस्थापन सूचना प्रणाली सञ्चालन गर्दा हुने लाभका विषयमा जानकारी दिइएको थियो । अभिमुखीकरणमा योजना महाशाखाका कर्मचारी, प्राविधिक, १९ ओटै वडाका सचिवलगायतको सहभागिता थियो । कार्यक्रममा योजना बैंकविज्ञ डा. गणेश गौतमले ७५३ ओटै पालिकामा एउटै प्रणाली लागू गर्न सके सहज हुने बताए । एउटै प्रणालीमा रहेर काम गरेमा राम्रो हुने भन्दै उनले टोल बस्तीमा छलफल गरेर योजना छनोट गरे पनि त्यसलाई आयोजना बैंकको सर्भरमा प्रविष्ट गर्न सकिने जानकारी दिए । आयोजना बैंकमार्फत एकअर्का पालिकाबीच तथ्यांक आदानप्रदान गर्नसमेत सजिलो हुने र तीनै तहको सरकारले एउटै प्रणालीमार्फत आयोजना प्रविष्ट तथा भण्डारण गर्दा आयोजना नदोहोरिने गौतमको भनाइ थियो ।

राष्ट्रिय योजना आयोगले पूर्वतयारीविना कुनै पनि आयोजनालाई बजेट विनियोजन नगर्न, आयोजनामा दोहोरोपन हुन नदिन र आयोजनासँगै सम्बन्धित कागजातको डिजिटल कपी अनलाइनमा प्रविष्ट गर्न आयोजना बैंक व्यवस्थापन सूचना प्रणाली सञ्चालनमा ल्याइएको बताएको छ । उक्त अवसरमा स्थानीय आयोजना बैंक सञ्चालनका लागि मेयर नागेश कोइरालालाई प्रमाणपत्र समेत हस्तान्तरण गरिएको थियो । कार्यक्रममा प्रमुख प्रशासकीय अधिकृत राजेन्द्र पराजुलीले सफ्टवेयर प्रणाली वडादेखि पालिकास्तरसम्म कार्यान्वयनमा ल्याउने प्रतिबद्धता व्यक्त गरे ।

प्रतिक्रिया [0]