सन् २०२५ मा नेपाल भ्रमण वर्ष मनाउने तयारी

अभियान संवाददाता

काठमाडौं। कोभिड–१९ का कारण सरकारले स्थगन गरेको नेपाल भ्रमण वर्ष अभियानलाई पुन: २०२५ मा गर्ने तयारी भएको छ । सन् २०२० मा नेपालमा २० लाख पर्यटक ल्याउने घोषणासहित शुरू भएको उक्त कार्यक्रम स्थगन भएको थियो । 

नेपाल पर्यटन बोर्डको २५औं वार्षिकोत्सवको अवसरमा संस्कृति, पर्यटन तथा नागरिक उड्डयनमन्त्री सुदन किरातीले नेपालीपनको पर्यटन विकासमा जोड दिए । काठमाडौं र केही चर्चित गन्तव्यबाहेक नेपालका अन्य गन्तव्य पनि चर्चा र घुम्नलायक भएको भन्दै उनले यसतर्फ ध्यान दिन आवश्यक रहेको बताए । 

उक्त अवसरमा पर्यटन बोर्डका प्रमुख कार्यकारी अधिकृत धनञ्जय रेग्मीले नेपाल भ्रमण वर्ष घोषणा गर्ने तयारी गरिएको बताए । उनले निजीक्षेत्रसमेत तयार रहेको अवस्थामा कार्यक्रम गर्ने घोषणा गरेका हुन् । 

नेपालले यसअघि सन् २०११ मा नेपाल भ्रमण वर्ष सम्पन्न गरेको थियो । रेग्मीले १० वर्षपछि वार्षिक ३५ लाख पर्यटक नेपाल भित्त्याउने गरी सरकार र निजीक्षेत्रले काम गर्नुपर्नेमा पनि जोड दिए । 

प्रतिक्रिया [0]