ऊर्जा व्यापारमा कोसेढुंगा : प्रधानमन्त्री

अभियान संवाददाता

काठमाडौं। नेपाल–भारतबीच सम्पन्न दीर्घकालीन विद्युत् व्यापार सम्झौतामाथि टिप्पणी गर्दै प्रधानमन्त्री पुष्पकमल दाहालले १० वर्षमा १० हजार मेगावाट विद्युत् भारत निर्यात गर्ने ग्यारेन्टी भएको बताउनुभएको छ । दुई देशबीच दीर्घकालीन विद्युत् व्यापार सम्झौता भएको यो दिन ऊर्जा व्यापारका दृष्टिले कोसेढुंगा साबित हुने उहाँको अपेक्षा छ । अब नेपालले ऊर्जा व्यापारका क्षेत्रमा गुणात्मक फड्को मार्ने प्रधानमन्त्री दाहालले बताउनुभयो ।

‘यो आफैमा ऐतिहासिक उपलब्धि हुनुका साथै यसले आगामी दिनमा भारतमा मात्रै होइन, बंगलादेशमा समेत विद्युत् निर्यातको ढोका खोल्नेछ । अब भारतको ग्रीड प्रयोग गरी बंगलादेशसँग विद्युत् व्यापार हुनेछ,’ उहाँले भन्नुभयो । 

निजीक्षेत्र उत्साहित

नेपालबाट १० हजार मेगावाट बिजुली निर्यातको ग्यारेन्टी भएपछि निजीक्षेत्रका ऊर्जा उत्पादकहरू उत्साहित बनेका छन् । सम्झौताले निजीक्षेत्रका ऊर्जा उत्पादकलाई उत्साहित बनाउनुका साथै आत्मविश्वास पनि बढाएको स्वतन्त्र ऊर्जा उत्पादकहरूको संस्था नेपाल (इप्पान)का अध्यक्ष गणेश कार्कीले बताए ।

उनका अनुसार नेपालको ऊर्जा क्षेत्रका लागि यो सम्झौता ऐतिहासिक छ । ‘यसबाट निजीक्षेत्रलाई धेरै फाइदा हुनेमा हामी विश्वस्त छौं । यसले निजीक्षेत्रलाई ऊर्जा उत्पादनमा लगानी गर्न अझ बढी प्रेरित गर्नेछ,’ कार्कीले भने । अब सरकारले केही नीतिगत कुरामा सुधार गर्दै लगानीमैत्री वातावरण बनाउन सक्नुपर्ने उनले बताए । ‘यो सम्झौताले भविष्यमा बंगलादेशसम्म विद्युत् निर्यात गर्ने ढोका खोल्न सक्ने भएकाले नेपालको ऊर्जा विकासमा कोसेढुंगा साबित हुनेछ,’ उनले आर्थिक अभियानसँग भने ।

प्रतिक्रिया [0]