मधेश प्रदेशमा साढे १३ लाख मेट्रिक टन धान उत्पादन

अभियान संवाददाता

जनकपुरधाम। यस वर्ष मधेश प्रदेशका आठ जिल्लामा वर्षे धान साढे १३ लाख मेट्रिक टनभन्दा बढी उत्पादन भएको छ । मधेश प्रदेशको भूमि व्यवस्था कृषि तथा सहकारी मन्त्रालयका अनुसार मधेशमा यस वर्ष उक्त धान १३ लाख ५५ हजार मेट्रिक टन उत्पादन भएको हो । यस वर्ष मधेशका आठ जिल्लामा ३ लाख ७० हजार ३५० हेक्टर क्षेत्रफलमा वर्षे धान लगाइएको थियो ।

मधेश प्रदेशको भूमि व्यवस्था कृषि तथा सहकारी मन्त्रालयका अनुसार यस वर्ष धनुषामा ४२ हजार हेक्टर क्षेत्रफलमा वर्षे धान लगाइएकोमा १ लाख ७६ हजार मेट्रिक टन उत्पादन भएको छ । यस्तै सिरहामा ४५ हजार ९०० हेक्टर क्षेत्रफलमा १ लाख ६६ हजार ४८६ मेट्रिक टन, बारामा ४६ हजार २० हेक्टर क्षेत्रफलमा १ लाख ९१ हजार ६२ मेट्रिक टन र पर्सामा ५७ हजार हेक्टर क्षेत्रफलमा १ लाख ९७ हजार ९४६ मेट्रिक टन धान उत्पादन भएको मन्त्रालयका वरिष्ठ कृषि प्रसार अधिकृत रोशनकुमार मेहताले जानकारी दिए । 

यसैगरी महोत्तरीमा ३९ हजार ८७० हेक्टर क्षेत्रफलमा १ लाख २२ हजार ७०० मेट्रिक टन, सप्तरीमा ६८ हजार हेक्टर क्षेत्रफलमा २ लाख १७ हजार ६०० मेट्रिक टन, रौतहटमा ३५ हजार ६३० हेक्टर क्षेत्रफलमा १ लाख ४१ हजार २३३ मेट्रिक टन र सर्लाहीमा ४५ हजार ८०० हेक्टर क्षेत्रफलमा १ लाख ४१ हजार ९८० मेट्रिक टन वर्षे धान उत्पादन भएको छ ।

गतवर्षको तुलनामा यस वर्ष मधेशमा वर्षे धान ९२ हजार मेट्रिक टन कम उत्पादन भएको मन्त्रालयका प्रवक्ता मेहताले बताए । उनका अनुसार प्रदेशमा यस वर्ष समयमा वर्षा नहुदा वर्षे धान उत्पादन घटेको हो । यस्तै स्थायी सिँचाइ तथा मलखादको अभावले पनि उत्पादनमा ह्रास आएको उनको भनाइ छ ।

यता, सरकारी स्वामित्वको खाद्य व्यवस्था तथा व्यापार कम्पनी लिमिटेड, जनकपुरधामले मङ्सिरयता ६१ क्वीन्टल मन्सुली धान मात्र खरीद गरेको छ । संघीय सरकारले चालू आर्थिक वर्षमा उक्त कार्यालयलाई ३० हजार क्वीन्टल मन्सुली धान खरीदको लक्ष्य दिए पनि किसानले गल्ला व्यापारीलाई बेचेकाले कम्पनीले खरीद गर्न नसकेको कार्यालय प्रमुख गंगाप्रसाद साहले बताए । संघीय सरकारले यस वर्ष मन्सुली धानको न्यूनतम समर्थन मूल्य प्रतिक्वीन्टल रू. ३ हजार ३६२ रुपैयाँ निर्धारण गरेको छ । तर गल्ला व्यापारीले उक्त धान सरकारले तोकेको मूल्यभन्दा प्रतिक्वीन्टल ४०० देखि ५०० बढीमा खरीद गरेका छन् । बढी मूल्य पाएकाले किसानले उनीहरूलाई नै धान बेचेका हुन् ।

प्रतिक्रिया [0]