६० वर्ष नाघेकाहरूले इन्फ्लुयन्जा भ्याक्सिन लगाउनुपर्छ

आर्थिक अभियान

गतवर्ष जेठमा स्थापना भएको नेपाल नेशनल हस्पिटल स्तरीय सेवाका कारण लोकप्रिय बन्दै गएको छ । चिकित्सकको समूहद्वारा स्थापित भएकाले पनि यो अस्पतालप्रति सेवाग्राहीको विश्वास बढेको हो । विशेषज्ञ चिकित्सकको टोली भएको हुँदा आकस्मिक अवस्थामा अन्य अस्पतालबाट विशेषज्ञ डाक्न नपरेको र यसबाट सेवा सहज भएको अस्पतालका मेडिकल निर्देशक डा. प्रकाश पौड्याल बताउँछन् । उनले २००७ मा काठमाडौं मेडिकल कलेजबाट एमबीबीएस तथा २०१४ मा चीनको ल्याउनिङ प्रान्तबाट एमडी गरेका छन् । कलङ्की क्षेत्रमा सुविधासम्पन्न अस्पतालको आवश्यकता महसूस गरी २०१७ मा उनले नेपाल नेशनल अस्पतालको स्थापना गरेका हुन् । प्रस्तुत छ, अस्पतालको सेवासुविधा, छातीरोगको लक्षण, उपचारलगायत विषयमा अस्पतालका मेडिकल डाइरेक्टरसमेत रहेका डा. पौड्यालसँग आर्थिक अभियानका पूर्णभक्त दुवालले गरेको कुराकानीको सम्पादित अंश : नेपाल नेशनल हस्पिटलमा के कस्ता सुविधा छन् ? यो अस्पताल चिकित्सकको समूहद्वारा सञ्चालन हुँदै आएको छ । एउटा सुविधासम्पन्न अस्पतालमा हुने सबै किसिमका सेवासुविधा यहाँ उपलब्ध छ । आईसीयू, नवजात शिशुका लागि एनआईसीयू, बालबालिकाका लागि पीआईसीयू सुविधा, किड्नीको डायलासिस सेवा र सुविधासम्पन्न ट्रमा सेण्टरसमेत अस्पतालमा छ । अस्पतालका अन्य विशेषता के के हुन् ? यहाँ सुत्केरीको डेलिभरीमा सिजरिङभन्दा नर्मल डेलिभरीलाई प्रश्रय दिइन्छ । यसका लागि लेबोर रूम स्थापना गरिएको छ । साथै, अस्पतालमा मल्टिपर्पोज सुपर स्पेसिलिटी, मल्टिसुुपर स्पेसिलिटीका साथै मेडिसिन र सर्जरीका सबै सुविधा छ । मेडिसिनमा मुख्यगरी छाती, किड्नी, रगत, बाथ, सुगरको उपचार हुन्छ । यसैगरी ग्यास्ट्रोलोजी, पेट तथा खाना नलीको उपचार, न्यूरो सर्जरी, क्यान्सर, हेपाटोजी, बाल शल्य चिकित्साको सेवा पनि छ । मेडिसिन, सर्जरी, अर्थोपेडिक्स, पेडियोट्रिक्स, स्त्रीरोग, डेण्टल, एनेस्थेसिया, ईएनटी, प्याथोलोजी र रेडियोलोजी विभाग छन् । चौबीसै घण्टा इमर्जेन्सी, फार्मेसी, एम्बुलेन्स सेवाका साथै आईसीयुमा किड्नी डायलासिस सुविधा उपलब्ध छ । अहिले विशेषगरी कुन रोगको प्रकोप छ ? म छातीरोगमा विशेषज्ञता हासिल गरी त्यसै क्षेत्रमा लागेँ । त्यसैले, छातीरोगीको सङ्ख्या बढिरहेको देख्छु । काठमाडौंमा बढ्दो धूलो, धूँवालगायतले पनि छातीरोगको प्रकोप बढेको देखिन्छ । जताजतै धूलो उडिरहेकाले सर्वसाधारण पीडित छन् । अन्य मुलुकमा जस्तो निर्माणस्थल बन्द गरेर निर्माण नगर्ने र खुला रूपमा धूलो उड्नेगरी निर्माण कार्य हुने गरेकाले समस्या बढेको छ । धूलो–धूँवाले पहिलेदेखि नै छातीरोग भएकाहरूलाई झन् समस्या भएको छ । धूलोकै कारण दम र निमोनियाका रोगी बढेका छन् । धूलोबाट बच्न के गर्ने ? यहाँको धूलो यति साना छन् कि साधारण मास्कले छेक्नै सक्दैन । १० माइक्रोमिटरभन्दा ठूलो धूलो त नाकको रौंले नै छेक्छ । त्योभन्दा सानो भयो भने नाकबाट भित्र जान्छ । ५ देखि १० एमएमसम्मको धूलो स्वासनलीसम्म पुग्छ । ५ एमएमभन्दा पनि साना कण सीधै श्वासनलीको अक्सिजन र कार्बनडाइअक्साइड एक्सचेञ्ज गर्ने युनिट आल्भियोलाइसम्म पुग्छ । यहाँसम्म पुगेको धूलोलाई शरीरले बाहिर निकाल्न सक्दैन । भित्र पसेको धूलोले लामो समयसम्म इरिटेशन रेर इन्फ्लामेशन गरिदिन्छ । यो प्रक्रिया निरन्तर भइरहँदा दमखोकी जस्ता दीर्घरोग देखा पर्छ । अहिलेका नवजात शिशुमा समेत यस्ता किसिमको सीओपीडी (दम) देखिएको छ । यहाँको धूलोले ल्याउने अन्य समस्या के हो ? अहिलेको धूलोमा फोहोर हुन्छ । यसमा सूक्ष्म कीटाणु टाँसिएका हुन्छन् । अर्थात् यहाँको धूलोसँगै भाइरस र अन्य सूक्ष्म कीटाणु सजिलै उडिरहेका छन्, भाइरस सजिलै बाँचिरहेका छन् र मानव स्वास्थ्यमा पस्न सजिलो भइरहेको छ । यी भाइरस सजिलै श्वासनली हुँदै मानव शरीरमा पसिरहेका छन् । भाइरसले शुरूमा रुघाखोकी र पछि श्वासनलीमा इन्फेक्शन गराउँछ । यसैगरी फोक्सोमा इन्फेक्शन र निमोनिया हुन्छ । यसरी इन्फेक्शन भएको बेलामा धूमपान गर्दा झनै खतरा हुन्छ । छातीमा हुने इन्फेक्शनबाट बच्न के गर्नुपर्छ ? धूलोधूँवाबाट बच्न भरपर्दो मास्क लगाउनुपर्छ । बजारमा सजिलै उपलब्ध हुने सस्तो मास्कले सूक्ष्म धूलो छेक्न नसक्ने भएकाले एन९५ मास्क लगाउँदा राम्रो हुन्छ । धूलोधूँवा उड्ने ठाउँमा सकेसम्म नजाने, धूमपानबाट टाढै रहने गर्दा केही हदसम्म भए पनि छातीमा हुने इन्फेक्शन हुन पाउँदैन । छातीमा इन्फेक्शन भएको कसरी थाहा पाउने ? सुक्खा खोकी लागिरह्यो भने इन्फेक्शनको आशङ्का गर्नुपर्छ । यी खोकीले विस्तारै खकार फाल्ने गर्छ । त्यसपछि ज्वरो आउन थाल्छ, श्वास फेर्न गाह्रो हुन्छ र जोनी दुख्न थाल्छ । जीउ कटकटी दुख्ने र गलेर जान थाल्यो भने समयमै उपचार थाल्नुपर्छ । यसको उपचार कसरी हुन्छ ? शुरू शुरूमा छाती दुख्न थालेको र श्वासप्रश्वासमा समस्या देखिएको हो भने एलर्जीका ओखती र एण्टिबायोटिक प्रयोग गरे पुग्छ । रोग क्रोनिकल डिजिजको रूपमा परिणत भइसकेको भए अक्सिजनको प्रयोग गर्नुपर्छ । स्टेरियोड औषधि प्रयोग गर्नुपर्ने र बाफ लिनुपर्ने हुन्छ । यो रोग लामो समयसम्म रहिरह्यो भने फोक्सोले काम गर्न सक्दैन । त्यसैले, छाती दुख्ने समस्या हुँदा समयमै चिकित्सककोमा जानुपर्छ । ज्येष्ठ नागरिकमा छातीरोगको समस्या कत्तिको देखिन्छ ? ज्येष्ठ नागरिकलाई छातीको रोग लाग्यो भने निको पार्न समय लाग्छ । नेपालमा धेरै वयस्कहरूलाई निमोनिया लागेको देखिन्छ । निमोनियाबाट बच्न अहिले भ्याक्सिन आइसकेको छ । ६० वर्ष नाघेका नागरिकले इन्फ्लुयन्जा भ्याक्सिन लगाउनुपर्छ । यो भ्याक्सिन लगाएमा भाइरल इन्फ्लुयन्जाबाट जोगिन सकिन्छ । एकवर्षे र पाँचवर्षे गरी दुई किसिमको भ्याक्सिन लगाउन सकिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस