पूर्वाधारका ८०% योजना पूरा भइसकेका छन्

आर्थिक अभियान

बेनी नगरपालिकामा सञ्चालित योजना, कार्यप्रगति, आगामी योजनालगायत विषयमा नगरका वरिष्ठ कार्यकारी अधिकृत लोकनाथ भुसालसँग आर्थिक अभियानका म्याग्दी संवाददाता ध्रुवसागर शर्माले गरेको कुराकानी : तपाईं बेनी नगरपालिकामा प्रमुख प्रशासकीय अधिकृत भएर आएपछि विकासका काम कसरी अघि बढेका छन् ? विशेषगरी भौतिक निर्माणतर्फका धेरैजसो काम उपभोक्ता समितिमार्फत भइरहेका छन् । पूर्वाधारका ठूला योजना बोलपत्र आह्वान भएर सञ्चालनमा छन् । अन्य नियमित कामकारबाही पनि जारी छ । नगरपालिकाका आगामी योजना के–के छन् ? नगरपालिकाका आगामी योजना नगरसभाले तय गर्दै छ । सडकलगायत पूर्वाधारका कामलाई प्राथमिकता दिइनेछ । लक्षित वर्गको सशक्तीकरण, सामाजिक आर्थिक विकास र संस्थागत सुद्दढीकरणलाई जोड दिएर काम अघि बढाउँछौं । नगरपालिकाको बजेटको भौतिक प्रगति कस्तो छ ? गत नगरसभाबाट स्वीकृत भएका योजना कार्यान्वयनको चरणमा छन् । पूर्वाधारका योजना करीब ८० प्रतिशत सम्पन्न भइसकेका छन् । अन्य योजना कार्यान्वयनको चरणमा छन् । तीमध्ये अधिकांश यसै महीनाको अन्त्यसम्ममा पूरा हुने अपेक्षा छ । नगरपालिकाका वडामा योजना सङ्कलनको क्रममा लापरबाही गरिएको गुनासा आएका छन् नि ! योजना सङ्कलन बस्तीस्तरबाट गरी उक्त योजनालाई वडा समितिले प्राथमिकीकरण गरी नगरपालिकामा पेश गर्नुपर्नेछ । अहिले बस्तीस्तरमा योजना सङ्कलन भइरहेका छन् । ती योजनालाई वडा समितिले प्राथमिकता क्रम निर्धारण गरेपछि नगरपालिकामा पेश हुन्छ । प्रश्नमा भनिएजस्तो यससम्बन्धी गुनासो आएको थाहा छैन । कस्ता योजनालाई प्राथमिकता दिइएको छ ? हामी पूर्वाधारका योजनामा बढी केन्द्रित छौं । कृषि, पशुपालन, सिँचाइ र खानेपानीका कार्यक्रमलाई पनि प्राथमिकता दिइनेछ । शिक्षातर्फ पूर्वाधार विकास र शैक्षिक गुणस्तर बढाउने कार्यक्रम अघि सञ्चालन हुनेछ । नगरमा कर सङ्कलनको अवस्था कस्तो छ ? प्रभावकारी कर प्रणाली स्थापना नभएसम्म नगरको समृद्धि कायम गर्न सकिँदैन । यसलाई दृष्टिगत गर्दै कर सङ्कलनका लागि छुट्टै शाखाको व्यवस्था गरिएको छ । आगामी आर्थिक वर्षदेखि नगर क्षेत्रमा एकीकृत सम्पत्ति कर लगाइनेछ । यसबाट नगरको राजस्व सङ्कलनमा ठूलो योगदान पुग्नेछ । साउनदेखि नगरक्षेत्रका विभिन्न पेशा–व्यवसायी एवम् संस्थालाई दर्ता गरी करदर्ता नम्बर प्रदान गरिनेछ । साथै, नगर क्षेत्रमा रहेका धार्मिक तथा पर्यटकीय क्षेत्रका पूर्वाधार विकास गरी त्यसको उपयोगमा सेवाशुल्क लिने नीति कार्यान्वयनमा ल्याइनेछ । नगरपालिकाका मापडण्डविपरीत घरटहरा कसरी व्यवस्थित गरिँदै छ ? नगर क्षेत्रमा रहेका घरटहराको साउनदेखि लगत सङ्कलन गरिनेछ । अवैध घरटहरा भत्काउन सम्बन्धित व्यक्तिलाई समयसीमा तोक्छौं । भत्काउन सम्भव नभए त्यस्ता घरटहरा नगरपालिकाको स्वामित्वमा ल्याइनेछ । सार्वजनिक स्थानमा भएका टहरालाई नगरको आम्दानीको स्रोतको रूपमा लिई व्यावसायिक प्रयोग गरिनेछ । पानी पर्नेबित्तिकै बाढी आएर ढल भरिएर बजार डुबानमा पर्ने गरेको छ । यसको दिगो व्यवस्थापनका लागि कस्तो योजना छ ? ढल पुरानो भएकाले क्षमता बढाउनुपर्ने भएको छ । अब नगरको ढलसम्बन्धी डीपीआर तयार पारी सोअनुसार दिगो व्यवस्थापन गरिनेछ । यसका लागि खानेपानी तथा सरसफाइ सब–डिभिजन कार्यालयसँग पनि समन्वय भइरहेको छ । नगरपालिकाको काममा ढिलासुस्ती हुने गरेको गुनासो आउने गरेका छन् नि ! नगरपालिकाबाट प्रदान गरिने सेवामा ढिलासुस्ती हुने गरेको गुनासो यदाकदा आए तापनि पहिलेभन्दा चुस्त भएको छ । अधिकांश काम वडा कार्यालयबाटै सम्पादन भइरहेका छन् । सेवा लिन नगरमा आउनुपर्ने अवस्था न्यून छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस