पर्यटन क्षेत्रको विकासमा सक्रिय छौं

आर्थिक अभियान

तनहुँको व्यास नगरपालिका सुधारका लागि नगर प्रमुख वैकुण्ठ न्यौपानेले विभिन्न योजना अगाडि सारेका छन् । प्रस्तुत छ : स्थानीय तहको निर्वाचनपछि नगरमा भएका सुधार, विकासका योजना लगायत विषयमा आर्थिक अभियानका सुरेन्द्र पौडेलले नगर प्रमुख न्यौपानेसँग गरेको कुराकानी : जननिर्वाचित प्रतिनिधि आएपछि नगरपालिकामा सुधारका काम के के भएका छन् ? स्थानीय तहको निर्वाचनपछि यहाँ सुधारका काम धेरै भएका छन् । आन्तरिक आम्दानी बढाएका छौं । ४ करोडको हाराहारीमा रहेको आन्तरिक आम्दानी करीब १० करोड पुर्‍याएका छौं । यस वर्ष १४ करोडको लक्ष्य राखेका छौं । विकासका काममा पनि ध्यान दिएका छौं । सबै वडामा विकासमा आयोजना पुर्‍याएका छौं । सामाजिक तथा राजनीतिक विवादका कारण काम रोकिएका छैनन् । यस्ता विवाद भएका छैनन् । वडाहरूलाई समानुपातिक विकासको सन्दर्भमा प्राथमिकतामा राखेका छौं । नगरपालिकालाई पनि धेरै व्यवस्थित बनाएका छौं । प्रमुख भएपछि के–कस्ता काम गर्न सक्षम हुनुभएको छ ? करीब १० करोड लागतमा बहुउद्देश्यीय भवनको निर्माण सम्पन्न गरी प्रयोग शुरू भएको छ । नगरवासीका समस्या सम्बोधन गर्ने र दीर्घकालीन रूपमा अगाडि बढ्ने सोच बनाएर काम गरेका छौं । शहरी आयोजना व्यवस्थित बनाउन ‘एकीकृत शहरी व्यवस्था आयोजना’ बनाएका छौं । घना आवादी भएका वडा नं २, ३, ४ मा डिजिटल घर नम्बरको व्यवस्था गरेका छौं । विकासमा हामी क्रमिक रूपमा अगाडि बढिरहेका छौं । हामीसँग भएका साधन तथा स्रोतको अधिकतम प्रयोग गरी नागरिकका अपेक्षा तथा विकास निर्माणका कामलाई पूरा गर्नतर्फ लागेका छौं । हरेक महीनाको ७ गते र २२ गते हामी नियमित बैठक बस्छौं । यो एउटा संस्थागत प्रक्रिया पनि हो । नागरिकका केही गुनासा÷समस्या भए बैठकबाट सम्बोधन हुन्छ भन्ने सन्देश पनि हामीले दिएका छौं । नगरपालिकाले कस्ता योजनालाई प्राथमिकता दिएको छ ? सबै हिसाबले नगरपालिकालाई व्यवस्थित, विकसित र शान्त ढंगले क्रमिक विकासको अभियानमा नगरपालिका लागेको छ । खानेपानीलाई प्राथमिकतामा राखिएको छ । खानेपानीको समस्या रहेका स्थानमा त्यसलाई समाधान गर्ने लक्ष्य छ । तर, सडकमा धेरै बजेटको माग आएको मैले पाएको छु । त्यसैले, नरपालिकाको लगानी सडकमै धेरै हुन्छ । नयाँ सडक बनाउने भन्दा पनि पुराना सडक स्तरोन्नति गर्नुपर्ने छ । नगर क्षेत्रमा पर्यटन प्रवर्द्धनका लागि के गरिँदै छ ? नगरपालिकाको पर्यटकीय तथा सांस्कृतिक पक्षको विकासका लागि पनि योजना बनाएका छौं । व्यास नगरपालिकामा रहेका धार्मिक तथा सांस्कृतिक सम्पदा र भाषासंस्कृतिको प्रवर्द्धनमा लागेका छौं । पर्यटन प्रवर्द्धनका लागि हामीले गुरुयोजना निर्माण गरेका छौं । धार्मिक पर्यटनका लागि व्यास नगरपालिकामा धेरै सम्भावना छन् । यस क्षेत्रको पर्यटन प्रवर्द्धनका लागि व्यासको मूर्ति बनाउन लागेका छौं । गुरुयोजनासहित काम अघि बढाउन समिति पनि बनाइसकेका छौं । परासर क्षेत्रको विकासमा पनि लागेका छौं । पार्क निर्माणका काम पनि भइरहेको छ । परासर क्षेत्रमा मन्दिर निर्माण गर्ने काम पनि भएको छ । कालिका शहीद जंगल पार्कलाई पनि व्यवस्थित गर्न करीब ५० लाख बजेट छुट्ट्याएका छौं । मन्दिर पनि निर्माण भइरहेको छ । सरकारले समेत पर्यटकीय गन्तव्यको रूपमा यसलाई छनोट गरेको छ । छाब्दी वराही जाने बाटो कालोपत्र गर्न यस वर्ष २ करोड रुपैयाँ विनियोजन गरेका छौं । अहिले सोहीअनुसार काम भइरहेको छ । तनहुँसुर जुन ऐतिहासिक स्थल पनि हो, त्यस क्षेत्रको विकासका लागि पनि कार्यक्रम सञ्चालन गरिनेछ । पर्यटन क्षेत्रमा भएका अन्य प्रगति र सम्भावनाबारे बताइदिनुहोस् न । पर्यटन प्रवर्द्धनकै उद्देश्यले मानुङबाट पुलिमराङसम्म राष्ट्रियस्तरको म्याराथोन प्रतियोगिता पनि गरेका थियौं । यो वर्ष अर्को म्याराथोन दौड प्रतियोगिताको तयारी गरेका छौं । उक्त म्याराथोन दौड व्यास ६ को कोट भैरवीबाट तनहुँसुरसम्म गर्ने प्रस्ताव आएको छ । नगरभित्र रहेका डाँडालाई व्यवस्थित गर्न खोजेका छौं । यस्ता डाँडामा भ्यू टावर निर्माण तथा पिकनिक स्थलको रूपमा विकास गरिनेछ । पुलिमराङमा पार्क बनाउने योजना पनि छ । दमौलीमा रहेको अनसन चौतारीलाई आकर्षक बनाएका छौं । व्यास–१० मा ताल निर्माणको योजना पनि छ । काम शुरू गर्नुभन्दा पहिला धेरै प्रक्रिया पूरा गर्नुपर्छ । विविध समस्या समाधान गरेर मात्र काम अगाडि बढाउन सकिन्छ । त्यसकारण पनि काम गर्न समय लाग्ने हो । यहाँँको पर्यटकीय विकासमा नगरपालिका प्रतिबद्ध छ । कानून नबनेकाले काममा अप्ठ्यारो परेको हो ? कानून निर्माण गर्ने विभिन्न चरण र अभियानमा छौं । संघीय तथा प्रदेशका कानून नआएकाले केही अन्योल भएको छ । संघ तथा प्रदेशसँग नबाझिने गरी कानून बनाउनुपर्ने अवस्था छ । कानून अभावले कतिपय काम अघि बढाउन छ । सामुदायिक वनको सदुपयोग कसरी गर्ने भन्ने अन्योल छ । सहकारीको व्यवस्थापनमा पनि समस्या आएको छ । शिक्षाक्षेत्रका आफ्नै समस्या छन् । यी क्षेत्रका समस्याको समाधान र व्यवस्थापनमा अपेक्षित काम गर्न सकिएको छैन । मालपोतले मूल्यांकन बढाएकाले कर बढेको जनगुनासो छ । यहाँको अवस्था के छ ? जग्गाको मूल्यांकन धेरै भयो भन्ने गुनासो व्यास नगरपालिकामा छैन । मालपोत कार्यालयले पनि ५ देखि १० प्रतिशतभन्दा धेरै बढाएको छैन । त्यसै आधारमा हामीले सम्पत्ति कर लिने हो । यहाँ एकीकृत सम्पत्ति कर लिएका छौं । बढ्यो भनेर हामीलाई गुनासो आएको छैन । तपाईंको पाँचवर्षे कार्यकाल सकिँदा व्यास नगरपालिकामा के परिवर्तन देखिनेछ ? ५ वर्ष पुगेर मेरो कार्यकाल पूरा हुँदा सबै वडा व्यवस्थित हुनेछन् । सडक सञ्जाल राम्रो बन्नेछ । यहाँका धार्मिक तथा ऐतिहासिक पर्यटकीय स्थलले धेरै गति लिनेछन् । शैक्षिक स्थितिमा सुधार हुनेछ । खेलकुद क्षेत्रको विकास हुनेछ । युवा तथा महिलामा शीप विकास हुनुका साथै नेतृत्व विकास पनि गरेका हुनेछन् । स्वरोजगारका काम पनि अगाडि बढ्नेछन् । नगरपालिकालाई विभिन्न क्षेत्रबाट आत्मनिर्भर बनाउने प्रयत्न हुनेछन् । कृषिक्षेत्रको विकासका लागि अभियान सञ्चालन हुनेछन् ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस