दाङमा एक हजार घरेलु उद्योग दर्ता

१ अर्ब ३८ करोड लगानी थपियो

उदय बीसी

दाङ । दाङमा गत आर्थिक वर्षमा १ हजारभन्दा बढी नयाँ घरेलु उद्योग दर्ता भएका छन् । गत आवमा जिल्लाका विभिन्न स्थानमा विभिन्न प्रकृतिका १ हजार ७२ नयाँ उद्योग दर्ता भएको घरेलु तथा साना उद्योग कार्यालय दाङले बताएको छ । 

कार्यालयका अनुसार सबैभन्दा बढी ५३५ ओटा कृषि तथा वनजन्य उद्योग दर्ता भएका छन् । यस प्रकृतिका उद्योगहरूमा पोल्ट्री फार्म, गाईभैंसी फार्म, बाख्रापालन, मौरीपालन, बंगुरपालन, माछापालन र बहुद्देश्यीय सहकारी संस्थाहरू पर्दछन् । त्यसैगरी सेवामूलकमा २२९, उत्पादन मूलकमा १८८, पर्यटनमा ११९ र खनिजमा एउटा उद्योग दर्ता भएको कार्यालयका उद्योग अधिकृत एवम् सूचना अधिकृत वामदेव शर्माले बताए । जिल्लामा उद्योग थपिएसँगै लगानी पनि १ अर्ब ३८ करोड ५२ लाख रुपैयाँ थपिएको छ ।

‘उद्योग दर्ता गरेर मात्रै सञ्चालन गर्नुपर्छ र उद्योग सञ्चालन गर्दा राज्यको तर्फबाट पनि सहयोग हुन्छ भन्ने सचेतना बढेसँगै दर्ता गर्ने क्रम बढेको छ’, शर्माले भने । त्यति मात्रै होइन, पछिल्लो समयमा सरकारले दर्ताविना सञ्चालनमा आएका उद्योगहरूलाई कडाइ गरेपछि उद्योग दर्ताको क्रम बढेको कार्यालयको भनाइ छ । 

गत आवमा १ हजार ७२ उद्योगसँगै दाङमा उद्योगको संख्या ६ हजार ७२६ पुगेको छ भने लगानी झण्डै रू. १४ अर्ब पुगेको छ । गएको आर्थिक वर्षभन्दा चालू आवमा दर्ता क्रम बढेको शर्माले बताए । विगत वर्षहरुमा दैनिक ४/५ ओटा दर्ता हुन आउने गरेकोमा चालू आवको साउनमा दैनिक १० देखि १५ ओटा उद्योगहरू दर्ता भएका छन् । 

३० प्रतिशत उद्योग ऋण लिन दर्ता 
कुल उद्योगमध्ये करीब ३० प्रतिशत बैंकबाट ऋण लिन, संघसंस्था तथा कार्यालयबाट अनुदान पाउन र छोराछोरीलाई विदेश पठाउनका लागि आयस्रोत देखाउन दर्ता भएको कार्यालयले जानकारी दिएको छ । ‘उद्योग दर्ता गर्नु राम्रो पक्ष हो तर यसमा केही विकृति पनि छ,’ शर्माले भने, ‘कार्यालयमा दर्ता भएका करीब ३० प्रतिशत उद्योग स्थलगत अनुगमनमा जाँदा भेटिँदैनन् ।’

प्रतिक्रिया [0]