नाकामा थन्किए सामान, बजारमा आपूर्ति असहज

भन्सारमा अड्किएका मालसामान छुटाउन आयातकर्तालाई आग्रह

ओमप्रकाश खनाल

चैत १५, वीरगञ्ज । आयातित मालसामान भन्सारमा अड्किएपछि बजारमा उपभोग्य वस्तुको अभाव भएको छ । लकडाउनका कारण मालसामान नाकामा रोकिएर आपूर्तिमा समस्या भएको भन्दै सरकारले जाँचपासमा सहजीकरण गर्न भन्सारलाई निर्देशन दिएको छ ।
 

सरकारको निर्देशनपछि भन्सार कार्यालयहरू सहजीकरणमा जुटेका छन् । वीरगञ्ज नाकामा आयातित मालसामान थुप्रिन थालेपछि त्यस्ता सामान जाँचपास गराएर लैजान भन्सार कार्यालयले आयातकर्तालाई आग्रह गरेको छ । भन्सारले सूचना निकालेर यस्तो आग्रह गरेको हो । 

कोरोना संक्रमण पैmलिन नदिन सरकारले लकडाउन गरेपछि आयातकर्ता मालसामान छुटाउन नआएको भन्सारले बतायो । लकडाउन कार्यान्वयन गर्न खटिएका सुरक्षाकर्मीले प्रतिनिधिलाई भन्सारसम्म जानै नदिएको आयातकर्ताले बताएका छन् । 

प्रहरीले प्रतिनिधिलाई आवागमनमा रोक लगाएपछि भन्सारले स्थानीय प्रशासनसँग समन्वय गरेर जाँचपास प्रयोजनका लागि अनुमतिपत्र दिएको छ । सरकारले लकडाउनका बेला आयातनिर्यात नरोकिने बताए पनि पेट्रोलियम पदार्थ, औषधि र केही दैनिक उपभोग्य वस्तुमात्र जाँचपास भएपछि अन्य सामान भन्सारमै अड्किएका छन् । 

लक डाउनयता मालसामानको जाँचपास ह्वात्तै घटेकाले आयातकर्तालाई मालसामान लैजान आग्रह गरिएको वीरगञ्ज भन्सार कार्यालयका प्रमुख भन्सार प्रशासक ढुण्डीप्रसाद निरौलाले जानकारी दिए । 

‘लकडाउनपछि अत्यावश्यक सामानमात्र छुटाउन पाइने गलत बुझाइका कारण आयातकर्ता आएका छैनन्, भन्सारले सबै खालका वस्तु लैजान आयातकर्तालाई सूचित गरेको छ,’ निरौलाले आर्थिक अभियानलाई बताए । 

लकडाउनका बेला भन्सार हिंडेका आयातकर्ताका प्रतिनिधिलाई प्रहरीले बाटैमा रोकेको र कुटपिटसमेत गरेको वीरगञ्ज उद्योग वाणिज्य संघका महासचिव माधव राजपालले बताए । 

भन्सारमा आएर रोकिएको मालसामान छुटाउनै समस्या भएपछि व्यवसायीले स्थानीय प्रशासन, भन्सार र उद्योग वाणिज्य तथा आपूर्ति मन्त्रालयसमेतमा समस्या समाधानका लागि आग्रह गरेको नेपाल उद्योग वाणिज्य महासंघ पारवहन समितिका अध्यक्ष अशोककुमार टेमानीले बताए । 

‘जाँचपास असहज भएपछि सबै निकायमा आग्रह गर्‍यौं,तर, ती कुनै पनि निकाय गम्भीर भएनन्,’ टेमानीले भने । वीरगञ्ज भन्सारमा अहिले औद्योगिक कच्चा पदार्थ र उपभोग्य वस्तुका ५०० भन्दा बढी ट्रक रोकिएको भन्सार प्रशासक निरौलाले बताए । 

‘भन्सारमा मालसामान रोकिएको छ, तर आयातकर्ता छुटाउन आएनन्,’ उनले भने । वीरगञ्ज सुक्खा बन्दरगाहबाट शनिवार ६० ओटा कन्टेनर जाँचपास भएको जानकारी बन्दरगाह भन्सार कार्यालयका प्रमुख उमेश श्रेष्ठले दिए । ‘मालसामान छुटाउन आउने आयातकर्तालाई सहजीकरण गरेका छौं, लकडाउनमा आवतजावत सहज बनाउन पासको व्यवस्था मिलाइएको छ,’ उनले भने । 

सुक्खा बन्दरगाहमा शनिवारसम्ममा २ हजार  १२ कन्टेनर थुप्रिएका छन् । तीमध्ये आयातित मालसामानका १ हजार ८७० र ९४२ ओटा खाली कन्टेनर रहेको बन्दरगाह सञ्चालक हिमालयन टर्मिनलले बताएको छ । 

भारतको कोलकाता र विशाखापत्तनम् बन्दरगाहबाट वीरगञ्जका लागि हिँडेका ३२ ओटा मालवाहक रेल बाटोमा रहेको टर्मिनलका अधिकृत अनिमेष कुमारले जानकारी दिए । 
 

खाद्यान्न उद्योग ठप्प

लकडाउनका कारण खाद्यान्न उद्योगको उत्पादन ठप्प भएको उद्योगीहरूले बताएका छन् । नेपाल चामल तेल दाल उद्योग संघका अध्यक्ष सुबोधकुमार गुप्ताले शनिवार विज्ञप्ति निकालेर अत्यावश्यकीय वस्तुमा पर्ने चामल, तेल र दाल उद्योगको उत्पादन र ओसारपसार ५ दिनदेखि अवरुद्ध भएको बताएका छन् । 

खाद्य उद्योग सञ्चालन र ओसारपसारको वातावरण सहज बनाउन संघले माग गरेको छ । श्रमिक कर्मचारीलाई  उद्योगमा गई काम गर्ने वातावरण बनाउनुपर्ने उनले बताए । 

खाद्यवस्तु ढुवानीका साधन विभिन्न ठाउँमा अड्किएकाले त्यसको उचित व्यवस्थापनका लागि सरकारको ध्यानाकर्षण गराइएको छ । मजदूरको स्वास्थ्यलाई ध्यानमा राखी स्यानिटाइजर, मास्कजस्ता वस्तुको व्यवस्था मिलाइएको पनि विज्ञप्तिमा उल्लेख छ । 

कोरोना भाइरस संक्रमण फैलिन नदिन लगाइएको लकडाउन सराहनीय भए पनि अत्यावश्यक खाद्यान्नको उत्पादन र ओसारपसारमा असहज भएको गुनासो उद्योगीको छ । उद्योग सञ्चालनका लागि नगद ल्याउने र लैजाने व्यवस्था मिलाउन पनि माग गरिएको छ । 

प्रतिक्रिया [0]