ढुवानी सहज हुँदा नाकामा बढ्न थाल्यो जाँचपास, बन्दरगाहमा घट्दै कन्टेनरको चाप 

ओमप्रकाश खनाल

जेठ १२, वीरगञ्ज  । लकडाउन खुकुलो भएसँगै ढुवानी सहज हुन थालेको छ । आयातकर्ताले वीरगञ्ज नाकाबाट मालसामान छुटाउने क्रम बढेको भन्सार कार्यालयहरूले बताएका छन् । 

कोरोना संक्रमण नियन्त्रणका लागि लकडाउन लगाइएलगत्तै वीरगञ्ज भन्सारबाट दिनमा करीब १०० गाडी मालसामान पास हुन्थे । अहिले यो संख्या २०० को हाराहारीमा पुगेको भन्सार कार्यालयका प्रमुख भन्सार प्रशासक ढुण्डीप्रसाद निरौलाले बताए । 

वीरगञ्ज नाकाबाट नयाँ सवारी साधनको जाँचपास पनि बढेको छ । पेट्रोलियम पदार्थ, खाद्यान्न, औषधी, औद्योगिक कच्चा पदार्थलगायतका बस्तु भित्रिइरहेको भन्सारको तथ्यांकले देखाउँछ । नाकाबाट छुट्ने गाडीका लागि भन्सारबाटै ढुवानीको पास उपलब्ध गराउने व्यवस्था मिलाइएको पर्साका सहायक प्रमुख जिल्ला अधिकारी ललितकुमार बस्नेतले बताए । 

भन्सारबाट अनुमति लिएका साधनले जुनसुकै बेला ढुवानी गर्न सक्ने उनले जानकारी दिए । सरकारले भन्सारलाई अत्यावश्यकीय सेवामा राखेको छ । अत्यावश्यकीय उत्पादन र सेवाबाहेकका ढुवानीलाई साँझ ६ देखि बिहान ६ बजेसम्मको समय छुट्याइएको प्रशासनले बताएको छ । वीरगञ्ज सुक्खा बन्दरगाहमा कण्टेनरको चाप घट्न थालेको छ । 

सरकारले लकडाउन खुकुलो तुल्याएर ४४ प्रकारका उद्योग र व्यवसाय सञ्चालन गर्न दिने भएपछि नाकामा आइपुगेको मालसामान छुट्न थालेको हो । शुरूमा ढुवानी र पूँजीको समस्या भएको भन्दै आयातकर्ताले चासो देखाएका थिएनन् । 

वीरगञ्ज बन्दरगाहमा सोमवारसम्ममा ३ हजार ४०० कन्टेनर रहेको बन्दरगाह सञ्चालक हिमालयन टर्मिनल प्रालिका वरिष्ठ अधिकृत अनिमेशकुमारले जानकारी दिए । 
‘बितेका २/ ३ दिनयता आयातकर्ताले बन्दरगाहबाट मालसामान छुटाउनेक्रम बढेको छ,’ उनले आर्थिक अभियानसित भने । 

अघिल्लो हप्तासम्म बन्दरगाहमा ४ हजारभन्दा बढी कन्टेनर थुप्रिएका थिए । बन्दरगाह भन्सारबाट अहिले दैनिक २०० भन्दा बढी गाडी निस्किइरहेको भन्सार प्रमुख उमेश श्रेष्ठले बताए ।

अघिल्लो हप्तासम्म दैनिक १०० जति कन्टेनरमात्र जाँचपास हुन्थे । बारा–पर्सा औद्योगिक कोरिडोरका फलाम र खाद्यान्न उद्योगले पनि कच्चा पदार्थ ढुवानी गर्न थालेका छन् । बन्दरगाहबाट दैनिक ५० मेट्रिकटनको हाराहारीमा फलाम बाहिरिइरहेको हिमालयन टर्मिनलले बताएको छ ।
 

कोलकातामा घटे कन्टेनर :

भारतको कोलकाता बन्दरगाहमा पनि तेस्रो मुलुकबाट नेपालका लागि आएका कन्टेनरको चाप उल्लेख्य परिमाणले घटेको छ । भारतमा लकडाउन खुकुलो बनाइएसँगै आयातकर्ताले त्यहाँ थुप्रिएका कन्टेनर भित्र्याउन थालेका छन् । 

अहिले कोलकातामा नेपालका लागि आएका कण्टेनर २ हजार ५०० जति भएको कोलकाता पोर्ट ट्रष्टका अध्यक्ष विनितकुमारले बताए । तीमध्ये रेलमार्फत ढुवानी हुने करीब ३०० र बाँकी सडकमार्गका रहेको उनले जानकारी दिए । 

यसअघि बन्दरगाहमा कण्टेनर थुप्रिएर सञ्चालनमै समस्या भएको थियो । लडकडाउनमा ढुवानी ठप्प भएपछि नेपाली आयातकर्ताका कन्टेनरको संख्या ४ हजारभन्दा बढी पुगिसकेको थियो । बन्दरगाहले यसअघि नै ७०० कन्टेनरलाई नजिकका कन्टेनर फ्रेट स्टेसनमा पठाइसकेको छ ।  
 

हटाइयो सहुलियत :

बन्दरगाह, एकीकृत जाँच चौकी (आईसीपी) र सिपिङ कम्पनीहरूले आयातित मालसामानमा विलम्ब शुल्क मिनाहा दिन छोडेका छन् । यसअघि लकडाउनले ढुवानी असहज भएको भन्दै कोलाता बन्दरगाह र सिपिङ कम्पनीहरूले पनि यस्तो सहुलियत दिएका थिए । 

भारतमा लकडाउन शुरू भएको मार्च २५ देखि मे ३ तारिखसम्म यस्तो सहुलियत दिइएको थियो । यो अवधिमा कण्टेनर र गोदाममा विलम्ब शुल्क मिनाहा गरिएको थियो । भारतमा लकडाउन खुकुलो बनाइएसँगै मे ३ तारिखदेखि यस्तो सहुलियत हटाइएको छ । 

कोलकाता बन्दरगाहले नेपाली आयातर्ताका लागि रेलमार्गका कण्टेनरलाई २० र सडकमार्गमा १० दिनको नि ः शुल्क समय भने यथावत राखेको अध्यक्ष विनितकुमारले बताए । भारतमा लकडाउनलाई मे ३१ तारिखसम्म लम्ब्याइएको छ । 

नेपाल इन्टरमोडल यातायात विकास समितिले पनि सुक्खा बन्दरगाह र आईसीपीमा गोदाम भाडा र पार्किड शुल्क मिनाहाको व्यवस्था हटाएको छ । जेठ ६ गतेबाट यस्तो सहुलियत हटाइएको हो । चैत ११ देखिको लकडाउनले ढुवानी अवरुद्ध भएको भन्दै चैत २८ यता यस्तो सहुलियत दिइएको थियो । 
 

आयातकर्ताको आग्रह : 

आयातकर्ता भने लकडाउन अवधिभरि यस्तो सहुलियत पाउनुपर्ने बताउँछन् । लकडाउन खुकुलो गरिएको भनिए पनि उत्पादन, ढुवानी र बजार पूर्णरुपमा सहज भइनसकेको वीरगञ्ज उद्योग वाणिज्य संघका महासचिव माधव राजपालले बताए । 

कम्तीमा लकडाउन अवधिसम्म शुल्क र जरीवाना मिनाहालाई निरन्तरता दिइनुपर्ने आयातकर्ता सुरेश रुङ्गटाले बताए । भारतीय बन्दरगाह र सिपिङ कम्पनीसँग यसबारेमा पहल गरिदिन आयातकर्ताले सरकारलाई आग्रह गरेका छन् । 
 

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस