बारा–पर्सा औद्योगिक कोरिडोरमा कोरोना संक्रमणको त्रास

उद्योगी भन्छन् –लकडाउनमा बाहिरबाट कामदार आएका छैनन्

ओमप्रकाश खनाल

साउन १३, वीरगञ्ज । वीरगञ्ज–पथलैया औद्योगिक कोरिडोरका केही उद्योगका कामदारमा कोरोना संक्रमण भेटिएपछि त्रास फैलिएको छ । शंकास्पद बिरामीको सम्पर्कमा नआएका र कतै यात्रासमेत नगरेकामा संक्रमण भेटिन थालेसँगै बारा र पर्साका ३ ओटा उद्योगका केही कामदारमा पनि कोरोना पुष्टि भएको हो । 

करीब चार महीना लामो लकडाउनपछि कोरिडोरका उद्योग सामान्य अवस्थामा फर्किने प्रयत्न गरिरहेका बेला उद्योगमै संक्रमति फेला पर्न थालेपछि कामदार कर्मचारीमा त्रास उत्पन्न भएको छ । उद्योगका सञ्चालकहरू समेत अन्योलमा परेका छन् । संक्रमति बढेपछि वीरगञ्जमा अनिश्चितकालीन निषेधाज्ञा लगाइएको छ । 

संक्रमित फेला परेका दुई ओटा औषधी र एउटा डण्डी उद्योग सिल गरिएको छ । अन्य उद्योग प्रतिष्ठानका सञ्चालकलाई समेत उद्योग सञ्चालनमा द्विविधा भएको छ । कामदार कर्मचारीहरू उद्योगमा काम गर्न डराइरहेका छन् । 

केही उद्योगले उद्योग परिसरमै आवासीय प्रबन्ध र सतर्कताका उपाय अपनाइएको बताएका छन् । संक्रमणको जोखिम घटाउन कामदारलाई उद्योगको हातामै खाने र बस्ने व्यवस्था मिलाएर काममा लगाइएको चाचान समूहका अध्यक्ष बाबुलाल चाचानले बताए ।

 ‘उद्योग आवासीय व्यवस्था मिलाएर सञ्चालन गरिएको छ । सतर्कता अन्य सबै प्रबन्ध मिलाइएका छौं,’ चाचानले आर्थिक अभियानसित भने । बन्दाबन्दीको समयमा भारतबाट कामदार ल्याएर उद्योग चलाएकाले संक्रमण फैलिएको आशंकामा जिल्ला प्रशासन कार्यालय पर्सा र वाणिज्य, आपूर्ति तथा उभोक्ता संरक्षण कार्यालयले स्थानीय केही उद्योगमा अनुगमन गरेको छ । तर, संक्रमित भेटिएका उद्योगले कार्यरत भारतीय कामदार बन्दाबन्दी अघिदेखि नै यहीँ रहेको बताएका छन् । 
आफूकहाँ काम गरिरहेका कामदार ६ महीनादेखि पर्सामै रहेको जगदम्बा इन्टरप्राइजेजका सञ्चालक अनिलकुमार रुङ्गटाले बताए । 

‘बन्दाबन्दीको समयमा कुनै पनि कामदार कर्मचारी बाहिरबाट आएका छैनन् । काममा लगाइएका सबैजना छ महीनाभन्दा लामो समयदेखि यहीं छन्,’ सञ्चालक रुङ्गटाले भने ।
 उक्त उद्योगका प्रमुख कार्यकारी अधिकृतसहित तीन जनामा संक्रमण पुष्टि भएको छ । 

बारा र पर्सामा लक्षणसहितका संक्रमित भेटिएकाले बन्दाबन्दीको बेलामा लुकिछिपी भित्रएकाले ल्याएको आशंका प्रशासनको छ । तर, भारतीय कामदारलाई काममा लगाएका उद्योगले पनि पीसीआर परीक्षण गराएरमात्रै उद्योगमा प्रवेश गराएको बताएका छन् । 

बाराको मारुती फर्मास्विटिकल्सका ९ जना कर्मचारीमा कोरोना संक्रमण भेटिएको छ । तर, उक्त उद्योगमा एक जना पनि भारतीय कामदार नरहेको दाबी सञ्चालक प्रभात रुङ्गटाले गरे । ‘उद्योगमा भारतीय कामदार एकजना पनि छैनन् । संक्रमण कसरी फैलियो भन्नेमा हामी आफैं अन्योलमा छौं,’ रुङ्गटाले आर्थिक अभियानसित भने । 

केही कामदारहरूमा ज्वरो देखिएपछि गराइएको परीक्षणमा तीन जनालाई कारोना पोजेटिभ देखिएको थियो । स्थानीय प्रशासन, उद्योग वाणिज्य संघ र वीरगञ्ज महानगरमा तत्कालै जानकारी पठाएकोमा पाँच दिनपछि स्वाव संकलन भएको गुनासो उनले गरे ।  

स्वाब लिइएका मारुतीका ४५ जना कर्मचारीलाई वीरगञ्जको सिद्धार्थ मावि क्वारेन्टाइनमा राखिएकोमा ६ बितिसक्दा पनि जाँचको रिपोर्ट दिइएको छैन । जनशक्तिको कमी र महागनरले समुदायमा थालेको परीक्षणका कारण चाप बढेकाले समयमा रिपोर्ट दिन नसकिएको नारायणी अस्पताल प्रयोगशालाले बताएको छ । 

कोरिडोरका ५० ओटा उद्योगलाई त्यहाँ कार्यरत भारतीय कामदारको विवरण, उनीहरूको ट्राभल हिस्ट्रीलगायतका जानकारी मागिएको पर्साका सहायक प्रमुख जिल्ला अधिकारी ललितकुमार बस्नेतले जानकारी दिए । सशस्त्र प्रहरीको औद्योगिक सुरक्षा बलको सहयोगमा ५०० ओटा उद्योगसित विवरण संकलन गरिने पनि बस्नेतले बताए । 

उद्योगका कामदारमा संक्रमण भेटिएमा संक्रमितको सम्पर्कमा आएकाको परीक्षण, क्वारेन्टाइन र आइसोलेशनको प्रबन्ध सम्बन्धित उद्योगले नै मिलाउनुपर्ने प्रशासनले बताएको छ । वीरगञ्जमा कोरानाका संक्रमति र मृत्यु हुनेको संख्या बढ्न थालेपछि समुदायमा संक्रमण फैलिएको आशंका गरिएको छ । 

वीरगञ्जमा अहिलेसम्म कोरोनाका कारण सात जनाको मृत्यु भएकोमा पछिल्लो पटक तीन दिनमै चार जनाको ज्यान गएको थियो । १२५ जना नयाँ संक्रमति भेटिएका छन् । सबै संक्रमितलाई आईसोलेशनसमेत उपलब्ध गराइएको छैन । 
 

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस