नदीजन्य पदार्थ ओसारपसार गर्ने १४ ओटा टिपर नियन्त्रणमा

दिपेश पौडेल

भदौ १९, रौतहट  । नदीजन्य पदार्थको उत्खनन गरी ओसारपसार गर्ने १४ ओटा टिपरलाई सशस्त्र प्रहरीले नियन्त्रणमा लिएको छ । 

वाग्मती नदीमा नदीजन्य पदार्थ गिट्टी बालुवा संकलन गरी रहेको अवस्थामा सशस्त्र प्रहरीले टिपर नियन्त्रणमा लिएको हो । नियन्त्रणमा लिएको टिपरलाई सशस्त्र प्रहरीले शुक्रवार जिल्ला समन्वय समिति रौतहटमा बुझाएको छ । 

अवैध रुपमा नदीजन्य पदार्थको उत्खनन गरी ओसारपसार गर्ने टिपरहरुलाई नियन्त्रणमा लिएको सशस्त्र प्रहरी बल सन्तपुरका प्रहरी नायव उपरिक्षक विकास भुजेलले बताए । वाग्मती नदीबाट उत्खनन गरिएको गिट्टी, बालुवा जिल्लाको विभिन्न भागमा ढुवानी भइरहेको अवस्थामा नियन्त्रणमा लिइएको उनले बताए । 

नदी उत्खननको ठेक्का बन्द रहेको अवस्थामा अवैध तरिकाले निकालिएको  नदीजन्य पदार्थहरु नियन्त्रणमा लिएको सशस्त्र प्रहरी ११ नं. गण रौतहटले जानकारी दिएको छ । 

जिल्ला समन्वय समितिका लेखापाल देव कुमार यादवले व्यवसायिक प्रयोजनका लागि नदीजन्य पदार्थको उत्खनन गरी ओसारपसार गर्ने साधनलाई कारवाही गरिने बताए । 

प्रतिक्रिया [0]