सिकाइ केन्द्रमार्फत पढाइ सुचारु

प्रवीर ददेल

रुकुम । रुकुम पश्चिममा कोरोना महामारीका कारण बन्द विद्यालय खुलेका छन् । रुकुम पश्चिमका ६ वटै स्थानीय तहमध्ये ३ स्थानीय तहले सिकाइ केन्द्रमार्फत पठनपाठन सुरु गरेका हुन् ।

रुकुम पश्चिमका मुसीकोट र चौरजहारी नगरपालिकाका साथै सानीभेरी गाउँपालिकाले सिकाइ केन्द्रमार्फत पठन–पाठन सुरु गरेको जिल्ला शिक्षा विकास तथा समन्वय इकाइ प्रमुख ताराप्रसाद पुनले जानकारी दिए ।

उनका अनुसार तीन वटै स्थानीय तहका निजी र सामुदायिक विद्यालयमा पढाइ सुरु गरिएको छ ।

सहरबजारका बालबालिकाले डिजिटल माध्यमबाट पठन–पाठन गरे पनि रुकुममा त्यो सम्भव नभएपछि सिकाइ केन्द्रमार्फत पढाइ सञ्चालन गरेको जिल्ला शिक्षा विकास समन्वय इकाइले बताएको छ ।

कार्यालयका अनुसार विद्यालयले आफ्नो भौतिक पूर्वाधारको अवस्थालाई दृष्टिगत गरी बिहान १० देखि २ बजेसम्म र २ देखि ४ बजेसम्म पठनपाठन हुने गरेको छ ।

नेपाल सरकारले वैकल्पिक शिक्षा सञ्चालन निर्देशन, २०७७ र सिकाइ सहजीकरण निर्देशिका, ०७७ जारी गरेको छ ।

उक्त निर्देशिकामा इन्टरनेटको माध्यमबाट डिजिटल कक्षा, सिकाइ केन्द्र र सञ्चार माध्यमबाट पठनपाठन गर्नुपर्ने व्यवस्था उल्लेख छ ।

भर्चुअल कक्षा सम्भव नभएपछि सिकाइ केन्द्रमार्फत पठनपाठन सुरु गरिएको शिक्षा विकास तथा  समन्वय इकाइ  रुकुम पश्चिमले जानकारी दिएको छ ।

झन्डै ७ महिना बन्द रहेका विद्यालयहरूमा सिकाइमार्फत पठनपाठन सञ्चालनपछि विद्यार्थी खुसी भएका छन् । लामो समयसम्म पढाइबाट वञ्चित बालबालिका सिकाई केन्द्रमा रमाइरमाइ पढ्न थालेको स्थानीय बताउँछन् ।

मुसीकोट एकेडेमीमा कक्षा १ मा अध्ययनरत छात्रा बिहानी ददेलले भनिन्, ‘सिकाइ केन्द्रमा पढ्न पाउँदा खुसी लागेको छ ।’

रुकुम भौगोलिक रुपमा विकट हुँदा   अधिकांश स्थानमा टेलिफोनकै लागि डाँडामाथि पुग्नुपर्छ । टेलिभिजनको पहुँच पनि सोचजस्तो छैन ।

सञ्चार माध्यमका विभिन्न उपकरणमध्ये यहाँका नागरिकले रेडियो बढी प्रयोग गर्छन् ।

अहिले यहाँका मानिसहरू रेडियोको पँहुचमा भए पनि प्रभावकारी पठनपाठनका लागि सिकाइ केन्द्रमार्फत पठनपाठन सुरु गरेको मुसीकोटस्थित सरस्वती आधारभूत विद्यालयका प्रधानाध्यापक कर्णबहादुर ओलीले बताए ।

उनले भने, ‘इन्टरनेटको सहज पहुँच नहुँदा जोखिमपूर्ण तरिकाले सिकाइ केन्द्रमार्फत पठनपाठन सुरु गरेका छौं ।’

प्रतिक्रिया [0]