बाबा बैजुनाथ चिनी मिल सञ्चालनमा

दिपेश पौडेल

रौतहट । रौतहटको कटहरियामा रहेको बाबा बैजुनाथ सुगर एण्ड केमिकल इण्डस्ट्रिज (चिनी उद्योग) सञ्चालनमा आएको छ । रौतहट सहित बारा र सर्लाहीका कृषकले मिलमा उखु ल्याउन थालिसकेका छन् । अन्य चिनी मिलमा भुक्तानी समस्या र ढिला गरी सञ्चालनमा आउने भएपछि कृषकले उक्त मिलमा उखु ल्याएका हुन् ।

उखु खरीद गरेको १५ दिनमै कृषकले भुक्तानी पाउने व्यवस्था गरिएको उद्योगका सञ्चालक बैजु बबराले बताए । उद्योग समयमै सञ्चालनमा आएको र भुक्तानीमा समस्या नरहेकाले यस आर्थिक वर्षमा लक्ष्यभन्दा बढी उखु क्रसिङ हुने अपेक्षा गरिएको उनले बताए । यस वर्ष मिलले करीब १५ लाख क्विन्टल उखु क्रसिङ गर्ने लक्ष्य लिएको छ ।

गतवर्ष करीब ५ लाख क्वीन्टल उखु क्रसिङ गरेर बन्द भएको मिलले यस वर्ष दोब्बरभन्दा बढी क्रसिङ गर्ने लक्ष्य लिएको बबराले बताए । बाबा बैजुनाथ चिनी मिलको दैनिक २५ हजार क्वीन्टलसम्म उखु क्रसिङ गर्ने सक्ने क्षमता छ । २ वर्षअघि कटहरिया नगरपालिका–८ स्थित पिप्रा पोखरियामा स्थापना भएको मिलले पछिल्लो समयमा उखु क्रसिङ क्षमता बढाउँदै लगेको छ । मिलमा ५०० जनाभन्दा बढीले रोजगारी पाएका छन् ।

प्रतिक्रिया [0]