साल्ट ट्रेडिङ कर्पोरिशन प्रदेश नं २ द्वारा ५ महीनामा १४ करोड बराबरको नून विक्री

पुस १४, वीरगञ्ज । साल्ट ट्रेडिङ कर्पोरिशन लिमिटेड प्रदेश नं २ कार्यालयले चालू आर्थिक वर्षको पछिल्लो पाँच महीनाका अवधिमा कुल रू. चौध करोड मूल्य बराबरको नूनजन्य सामग्री विक्री गर्न सफल भएको छ  ।

कार्यालयका अनुसार आव २०७८/७९ साउनदेखि मंसिर मसान्तसम्मका अवधिमा कुल रू. चौध करोड ३५ लाख २५ हजार ३२५ बराबरको नूनजन्य सामग्री विक्री गरेको थियो ।  

कार्यालय प्रमुख अमोज लामिछानेले गत आर्थिक वर्ष २०७७/७८ मा रू. २७ करोड १० लाख ५५ हजार ८५० बराबरको नूनजन्य सामग्री विक्री गरेको जानकारी दिए । २०२० साल भदौ २७ गते सार्वजानिक निजी साझेदारीमा स्थापित सो कर्पोरेशनले पछिल्लो समय ऐतिहासिक फड्को मारेको छ । संस्थामा सरकारको २२ प्रतिशत शेयर लगानी छ । 

स्थापनाका ५८ वर्षमा कर्पोरेशनले दैनिक उपभोग्य वस्तु नून, चिनी, चामल, दालअन्य गेडागुडी, खाने तेल, आँटा, मैदा, ग्यास लगायतका वस्तु सर्वसुलभ रुपमा विक्री वितरण गर्दै आएको छ । कर्पोरेशनले आफ्नो लगानीमा गोरखकाली रबर उद्योग, खाद्य उद्योग, नेपाल वनस्पति ध्यू उद्योग लिमिटेड लगायत हिमालय खाद्य एवम् प्याकिङ उद्योग स्थापना गरेको थियो । 

यसैगरी, नेशनल फाइनान्स लि, सगरमाथा इन्स्योरेन्स जस्ता संस्थाको स्थापना गरेर देशलाई औद्योगिकरणको दिशामा अघि बढाएको छ । सरकारले दिएको नीति निर्देशनमा कर्पोरेशनले समयमै आयात व्यवस्था गरेर चिनी, नून, चामल र मलको कमी हुन दिएको छैन । 

कर्पोरेशनले विक्रीवितरण गर्दै आएको आयोडिनयुक्त नून दक्षिण एशियामै सस्तो छ । कर्पोरेशनले ७ वर्षअघिकै मूल्यमा नूनको सहजरुपमा  विक्रीवितरण गर्दै आएको छ । आयोडिनयुक्त नूनकै कारणले पहाडी र दुर्गम क्षेत्रमा लुलो लङ्गडो हुने, गाँड आउने, हात्तीपाइले, अन्धो हुनेजस्ता रोग हटेको जानकारी दिइएको छ ।  

सरकारले मल आयात र विक्री वितरणको सम्पूर्ण जिम्मा कर्पोरेशनलाई दिने हो भने बाली लगाउने र किसानलाई चाहिने बेलामा मलको हाहाकार नहुने जानकारी दिइएको छ । 

कर्पोरेशनले विसं २०७२ वैशाखको विनासकारी भूकम्प पछि घर पुनर्निर्माण गर्न जस्तापाता आयात गरी विक्री वितरण समेत गरेको थियो । रासस

प्रतिक्रिया [0]